പ്രഖ്യാപന സമയം മുതൽ പ്രേക്ഷക ശ്രദ്ധയാകർഷിച്ച ചിത്രമാണ് അജിത്ത് കുമാര് നായകനാവുന്ന ‘വലിമൈ’. ചിത്രവുമായി ബന്ധപ്പെട്ട് വരുന്ന വാർത്തകൾക്കും സ്റ്റില്ലുകൾക്കും ലഭിക്കുന്ന സ്വീകാര്യത തന്നെ അതിന് ഉദാഹരണമാണ്.
‘യെന്നൈ അറിന്താലി’നു ശേഷം അജിത്ത് കുമാര് വീണ്ടും പൊലീസ് വേഷത്തില് എത്തുന്ന ചിത്രമാണ് വലിമൈ. എച്ച് വിനോദ് ആണ് സംവിധാനം. ആക്ഷന് രംഗങ്ങള്ക്ക് ഏറെ പ്രാധാന്യമുള്ള ചിത്രത്തില് ബൈക്ക് സ്റ്റണ്ട് ചിത്രീകരിക്കുന്നതിനിടെ രണ്ടുതവണ അജിത്തിന് പരുക്കേറ്റത് വാര്ത്തയായിരുന്നു. ഒരു പൊലീസ് ത്രില്ലര് എന്നു കരുതപ്പെടുന്ന ചിത്രത്തില് യാമി ഗൗതം, ഇലിയാന ഡിക്രൂസ്, ഹുമ ഖുറേഷി എന്നിവരാണ് നായികമാര്.
ചിത്രം പ്രീ-റിലീസ് ബിസിനസിലൂടെ 200 കോടി ക്ലബ്ബില് ഇതിനകം ഇടംപിടിച്ചതായും റിപ്പോര്ട്ടുകള് നേരത്തെ പുറത്തെത്തിയിരുന്നു. ആഗോള തിയട്രിക്കല്, സാറ്റലൈറ്റ്, ഡിജിറ്റല് റൈറ്റുകളുടെ വില്പ്പനയിലൂടെയാണ് ഈ തുക നേടിയതെന്നാണ് വിവരം.
