തിരുവനന്തപുരം:പോസ്റ്റൽ വോട്ടുകളിൽ വ്യാപക ക്രമക്കേട് നടന്നൂവെന്ന ആരോപണവുമായി പ്രതിപക്ഷ നേതാവ് രമേശ് ചെന്നിത്തല.പോസ്റ്റല് വോട്ടുകളുടെ വിശദാംശങ്ങള് പുറത്തുവിടണമെന്ന് ആവശ്യപ്പെട്ട് രമേശ് ചെന്നിത്തല 13/04/21 ചൊവ്വാഴ്ച കേന്ദ്ര മുഖ്യ തെരഞ്ഞെടുപ്പ് കമ്മീഷണര്ക്ക് കത്തയച്ചു. പോസ്റ്റല് വോട്ടില് ക്രമക്കേട് നടന്നെന്ന് ആരോപിച്ചാണ് വിതരണം ചെയ്തവയുടെ വിശദാംശങ്ങള് പുറത്തുവിടണമെന്ന് മുഖ്യ തെരഞ്ഞെടുപ്പ് കമ്മീഷണര് സുശീല് ചന്ദ്രയ്ക്ക് നല്കിയ കത്തില് ആവശ്യപ്പെട്ടിരിക്കുന്നത്.
‘തെരഞ്ഞെടുപ്പ് ഡ്യൂട്ടിയില് ഉണ്ടായിരുന്ന സര്ക്കാര് ഉദ്യോഗസ്ഥര്ക്ക് പോസ്റ്റല് ബാലറ്റ് വിതരണം ചെയ്തതില് വന് ക്രമക്കേടുണ്ടായിട്ടുണ്ട്. അതുകൊണ്ട് സംസ്ഥാനത്തൊട്ടാകെ വിതരണം ചെയ്ത പോസ്റ്റര് ബാലറ്റുകളുടെ വിശദവിവരം പുറത്തുവിടണം. പോസ്റ്റല് വോട്ട് ലഭിച്ചവരുടെയും പ്രത്യേക ചകേന്ദ്രങ്ങളില് വോട്ട് ചെയ്ത ഉദ്യോഗസ്ഥരുടെയും വിവരങ്ങളും പുറത്തുവിടണം’, ചെന്നിത്തല കത്തില് ആവശ്യപ്പെട്ടു.
കൂടാതെ, റിട്ടേണിങ് ഓഫീസര്മാരുടെ കൈവശമുള്ള ബാക്കി വന്ന പോസ്റ്റല് വോട്ടുകളുടെയും ബൂത്ത് തലത്തിലുള്ള വിവരങ്ങളും അറിയിക്കണമെന്നും ചെന്നിത്തല ആവശ്യപ്പെട്ടിട്ടുണ്ട്. 80 വയസ് കഴിഞ്ഞ വോട്ടര്മാരെ ഉദ്ദേശിച്ച് എത്ര പോസ്റ്റല് ബാലറ്റുകളാണ് വിതരണം ചെയ്തത്, അവയില് എത്രയെണ്ണം ബാക്കിയായി, റിട്ടേണിങ് ഓഫീസര്മാരുടെ പക്കല് എത്രയെണ്ണം ബാക്കിയുണ്ട് തുടങ്ങിയ വിവരങ്ങളും പുറത്തുവിടണമെന്നും അദ്ദേഹം കത്തില് പറഞ്ഞു.
