കണ്ണൂര്: കൂത്തുപറമ്പിനടുത്ത് കടവത്തൂരിൽ മുസ്ലീംലീഗ് പ്രവര്ത്തകനെ വെട്ടിക്കൊലപ്പെടുത്തി. പുല്ലൂക്കര പാറാല് സ്വദേശി മന്സൂര് ആണ് മരിച്ചത്. കണ്ണൂര് പാനൂരിന് അടുത്ത് കടവത്തൂര് മുക്കില്പീടികയിലാണ് ആക്രമണം നടന്നത്.
06/04/21 ചൊവ്വാഴ്ച വോട്ടെടുപ്പിന് പിന്നാലെയാണ് കൊലപാതകം. മന്സൂറിന്റെ സഹോദരന് മുഹ്സിനും പരുക്കേറ്റിട്ടുണ്ട്. ആക്രമണത്തിന് പിന്നില് സിപിഐഎം ആണെന്ന് മുസ്ലീം ലീഗ് ആരോപിച്ചു.
വോട്ടെടുപ്പുമായി ബന്ധപ്പെട്ട് ഇവിടെ സിപിഐഎം -ലീഗ് സംഘര്ഷമുണ്ടായിരുന്നു. ഇതിന്റെ തുടര്ച്ചയായാണ് രാത്രിയോടെ ആക്രമണമുണ്ടായത്. ബോംബ് എറിഞ്ഞ് ഭീതിപടര്ത്തിയശേഷം സഹോദരന്മാരായ മുഹ്സിനെയും മന്സൂറിനെയും വെട്ടിപരുക്കേല്പ്പിക്കുകയായിരുന്നു.
ഇരുവരെയും ആശുപത്രിയില് പ്രവേശിപ്പിച്ചുവെങ്കിലും ഇന്ന് പുലര്ച്ചയോടെ മന്സൂര് മരിക്കുകയായിരുന്നു. മന്സൂറിനെ ഇന്നലെ രാത്രിതന്നെ കോഴിക്കോട്ടെ ബേബി മെമ്മോറിയല് ആശുപത്രിയിലേക്ക് മാറ്റിയിരുന്നെങ്കിലും ജീവന് രക്ഷിക്കാനായില്ല.
