തിരുവനന്തപുരം: ഗവർണറുടെ നയപ്രഖ്യാപന പ്രസംഗം ബഹിഷ്കരിച്ച പ്രതിപക്ഷ എംഎൽഎ മാർ നിയമസഭാ കവാടത്തില് കുത്തിയിരുന്ന് പ്രതിഷേധിക്കുന്നു.
ഡോളര് കടത്തില് സംശയത്തിന്റെ നിഴലിലായ സ്പീക്കര് രാജിവച്ച് സഭയുടെ അന്തസ് കാത്തുസൂക്ഷിക്കുക, മുഖ്യമന്ത്രിയുടെ ഓഫീസ് കള്ളക്കടത്തുകാരുടെ താവളം, സ്വര്ണക്കടത്തിന്റെയും അഴിമതിയുടെയും പ്രഭവകേന്ദ്രം മുഖ്യമന്ത്രിയുടെ ഓഫീസ്, തുടങ്ങിയ പ്ലക്കാര്ഡുകളും ബാനറുകളുമായാണ് പ്രതിപക്ഷം സഭാ കവാടത്തില് കുത്തിയിരിക്കുന്നത്.
വെള്ളിയാഴ്ച(08/01/21) രാവിലെ ഒന്പതുമണിക്ക് തന്നെ ഗവര്ണര് ആരിഫ് മുഹമ്മദ് ഖാന് നയപ്രഖ്യാപന പ്രസംഗം ആരംഭിച്ചിരുന്നു. നയപ്രഖ്യാപനം തടസപ്പെടുത്താന് ശ്രമിച്ച പ്രതിപക്ഷത്തെ ഗവര്ണര് വിമര്ശിച്ചു. ഭരണഘടനാപരമായ തന്റെ ഉത്തരവാദിത്വം നിര്വഹിക്കാന് അനുവദിക്കണമെന്ന് ഗവര്ണര് പ്രതിപക്ഷത്തോട് ആവശ്യപ്പെട്ടു. സഭ തുടങ്ങിയപ്പോള് തന്നെ പ്രതിപക്ഷം സഭ തടസപ്പെടുത്താന് ശ്രമം തുടങ്ങിയെങ്കിലും നയപ്രഖ്യാപന പ്രസംഗം തുടരുകയായിരുന്നു. തുടർന്നാണ് പ്രതിപക്ഷം സഭ ബഹിഷ്കരിച്ചത്.
