തിരുവനന്തപുരം ഏപ്രിൽ 18: തിരുവനന്തപുരം -കാസര്കോട് അര്ധ അതിവേഗ റെയില്പാതയുടെ (സില്വര് ലൈന്) വിശദമായ പദ്ധതി റിപ്പോര്ട്ട് (ഡിപിആര്) കേരള റെയില് ഡെവലപ്മെന്റ് കോര്പറേഷന് (കെ-റെയില്) ബോര്ഡ് യോഗം അംഗീകരിച്ചു.
സാധ്യതാ പഠനറിപ്പോര്ട്ടിലെ അതേ അലൈന്മെന്റ് ഏറെക്കുറെ അംഗീകരിച്ചുകൊണ്ട് തിരുവനന്തപുരം മുതല് തിരൂര് വരെ ഇപ്പോഴത്തെ റെയില്പാതയില്നിന്ന് മാറിയും തുടര്ന്ന് കാസര്കോട് വരെ ഇപ്പോഴത്തെ പാതയ്ക്ക് സമാന്തരവുമായിട്ടായിരിക്കും സില്വര് ലൈന് നിര്മിക്കുക . അഞ്ചു വര്ഷം കൊണ്ട് പൂര്ത്തിയാക്കാനാണ് ലക്ഷ്യമിടുന്നത്.
ഡിപിആര് പ്രകാരം 63,941 കോടി രൂപയാണ് ചെലവ് പ്രതീഷിക്കുന്നത് . ഡിപിആര് ഇനി സംസ്ഥാന സര്ക്കാരിനും റെയില്വെ മന്ത്രാലയത്തിനും സമര്പ്പിക്കും.
പദ്ധതിക്ക് തുടര്ന്ന് നീതി ആയോഗ്, കേന്ദ്ര മന്ത്രിസഭ എന്നിവയുടെ അനുമതി വാങ്ങണം.
തിരുവനന്തപുരത്തുനിന്ന് 11 ജില്ലകളിലൂടെ 530.6 കിലോമീറ്റര് നാലു മണിക്കൂര് കൊണ്ട് പിന്നിട്ട് കാസര്കോടെത്തുന്ന സില്വര് ലൈനില് 11 സ്റ്റേഷനുകളുണ്ടാകും.
