ന്യൂഡൽഹി /  2026  / ഒക്ടോബർ  30

സർദാർ സരോവർ പദ്ധതിയുമായി ബന്ധപ്പെട്ട് നാല് സംസ്ഥാനങ്ങൾക്കിടയിൽ നിലനിൽക്കുന്ന കുടിശ്ശികയും സാമ്പത്തിക ബാധ്യതകളും ഒറ്റത്തവണയായി തീർപ്പാക്കാനുള്ള ധാരണയ്ക്ക് അംഗീകാരം. ഒക്ടോബർ 27ന് വീഡിയോ കോൺഫറൻസിലൂടെ ചേർന്ന നർമദ നിയന്ത്രണ അതോറിറ്റിയുടെ അവലോകന സമിതിയുടെ പതിനഞ്ചാമത് യോഗമാണ് പണം നൽകുന്നതിനുള്ള നടപടിക്രമങ്ങൾ അംഗീകരിച്ചത്. കേന്ദ്ര ജലശക്തി മന്ത്രിയും സമിതി അധ്യക്ഷനുമായ സി. ആർ. പാട്ടീലിന്റെ അധ്യക്ഷതയിലായിരുന്നു യോഗം. നർമദ ജലതർക്ക ട്രൈബ്യൂണൽ വിധിപ്രകാരമുള്ള പദ്ധതികളുടെ കുടിശ്ശിക 2026–27 സാമ്പത്തികവർഷത്തിനുള്ളിൽ നൽകാനാണ് തീരുമാനം.

നാല് സംസ്ഥാനങ്ങളിലെ മുഖ്യമന്ത്രിമാർ പങ്കെടുത്തു

ഗുജറാത്ത് മുഖ്യമന്ത്രി ഭൂപേന്ദ്ര പട്ടേൽ, മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്‌നാവിസ്, മധ്യപ്രദേശ് മുഖ്യമന്ത്രി മോഹൻ യാദവ്, രാജസ്ഥാൻ മുഖ്യമന്ത്രി ഭജൻലാൽ ശർമ എന്നിവർ യോഗത്തിൽ പങ്കെടുത്തു. സംസ്ഥാനങ്ങൾക്കിടയിൽ തീർപ്പാകാതെ കിടക്കുന്ന കുടിശ്ശികകൾ, അവകാശവാദങ്ങൾ, സാമ്പത്തിക ബാധ്യതകൾ എന്നിവ ഒറ്റത്തവണയായി പരിഹരിക്കുന്നതിനുള്ള ഇന്ത്യയുടെ അറ്റോർണി ജനറലിന്റെ അഭിപ്രായവും ധാരണാപത്രവും സമിതി അംഗീകരിച്ചു.

ജൂലൈയിൽ ഒപ്പിട്ട ധാരണ നടപ്പാക്കും

2026 ജൂലൈ ഏഴിന് ന്യൂഡൽഹിയിലാണ് നാല് സംസ്ഥാനങ്ങളും ധാരണാപത്രത്തിൽ ഒപ്പിട്ടത്. കേന്ദ്ര ആഭ്യന്തര, സഹകരണ മന്ത്രി അമിത് ഷാ, കേന്ദ്ര ജലശക്തി മന്ത്രി സി. ആർ. പാട്ടീൽ എന്നിവരുടെ സാന്നിധ്യത്തിലായിരുന്നു ഒപ്പിടൽ. ഈ ധാരണയുടെ അടിസ്ഥാനത്തിൽ ശേഷിക്കുന്ന കുടിശ്ശിക നൽകുന്നതിനുള്ള നടപടിക്രമങ്ങൾക്കും അവലോകന സമിതി അംഗീകാരം നൽകി.

ചെലവ് പങ്കിടുന്നതിലെ ദീർഘകാല തർക്കത്തിന് പരിഹാരം

സർദാർ സരോവർ പദ്ധതിയുടെ നിർമാണച്ചെലവ് പങ്കിടുന്നതിൽ മധ്യപ്രദേശ്, ഗുജറാത്ത്, രാജസ്ഥാൻ, മഹാരാഷ്ട്ര സംസ്ഥാനങ്ങൾക്കിടയിൽ ദീർഘകാലമായി തർക്കം നിലനിന്നിരുന്നു. ധാരണാപത്രം അംഗീകരിച്ചത് ഈ തർക്കങ്ങൾ അവസാനിപ്പിക്കുന്നതിലേക്കുള്ള ചരിത്രപരമായ ചുവടുവെപ്പാണ്. ഇതിലൂടെ തീർപ്പാകാതെ കിടക്കുന്ന കുടിശ്ശിക ഒറ്റത്തവണയായി നൽകാനുള്ള കാര്യത്തിലും പരിഹാരമായി.

സംസ്ഥാനങ്ങളുടെ സഹകരണത്തിന് നന്ദി പറഞ്ഞ് പാട്ടീൽ

അറ്റോർണി ജനറലിന്റെ അഭിപ്രായവും ജൂലൈ ഏഴിലെ ധാരണാപത്രവും അംഗീകരിക്കുന്നതിൽ സഹകരിച്ച നാല് മുഖ്യമന്ത്രിമാർക്കും സി. ആർ. പാട്ടീൽ നന്ദി പറഞ്ഞു. ഈ സാമ്പത്തികവർഷത്തിനുള്ളിൽ കുടിശ്ശിക നൽകുന്നതിനുള്ള നടപടിക്രമങ്ങൾ അന്തിമമാക്കുന്നതിലെ സഹകരണത്തിനും അദ്ദേഹം നന്ദി അറിയിച്ചു. പ്രധാനമന്ത്രി നരേന്ദ്ര മോദിയുടെ മാർഗനിർദേശത്തിൽ സംസ്ഥാനങ്ങൾക്കിടയിലെ നദീജല പ്രശ്നങ്ങൾ പരിഹരിക്കാൻ എല്ലാ ശ്രമങ്ങളും നടത്തുകയാണെന്ന് പാട്ടീൽ പറഞ്ഞു. ധാരണാപത്രം തയ്യാറാക്കുന്നതിലും അതിന് അംഗീകാരം നൽകാൻ പതിനഞ്ചാമത് അവലോകനയോഗം വിളിച്ചുചേർക്കുന്നതിലും കാര്യക്ഷമമായി പ്രവർത്തിച്ച ബന്ധപ്പെട്ട സംസ്ഥാനങ്ങളിലെ ഉദ്യോഗസ്ഥർ, ജലവിഭവ, നദീവികസന, ഗംഗാ പുനരുജ്ജീവന വകുപ്പ്, നർമദ നിയന്ത്രണ അതോറിറ്റി എന്നിവർക്കും അദ്ദേഹം നന്ദി പറഞ്ഞു.

.