ജാംനഗർ  / 2026  / ഒക്ടോബർ 05

കുട്ടികൾ ഉറക്കത്തിൽ കിടക്കയിൽ മൂത്രമൊഴിക്കുന്ന പ്രശ്നം നിയന്ത്രിക്കാൻ ആയുർവേദ മരുന്നും യോഗാസനങ്ങളും ചേർന്ന ചികിത്സയിൽ ആശാവഹമായ ഫലമെന്ന് പഠനം. കേന്ദ്ര ആയുഷ് മന്ത്രാലയത്തിന് കീഴിലുള്ള ദേശീയ പ്രാധാന്യമുള്ള സ്ഥാപനമായ ജാംനഗറിലെ ഇൻസ്റ്റിറ്റ്യൂട്ട് ഓഫ് ടീച്ചിങ് ആൻഡ് റിസർച്ച് ഇൻ ആയുർവേദയാണ് പഠനം നടത്തിയത്. ആറുമുതൽ പതിനാലുവരെ വയസ്സുള്ള ഏകദേശം 38 കുട്ടികളെ ഉൾപ്പെടുത്തി എട്ടാഴ്ചയാണ് പഠനം നടന്നത്. ആയുർവേദ മരുന്നിനൊപ്പം തിരഞ്ഞെടുത്ത യോഗാസനങ്ങൾ പതിവായി ചെയ്ത കുട്ടികളിൽ, മരുന്ന് മാത്രം സ്വീകരിച്ചവരെക്കാൾ മെച്ചപ്പെട്ട ഫലം കണ്ടെത്തി. ഒക്ടോബർ അഞ്ചിന് പുറത്തുവിട്ട വിവരങ്ങൾ പ്രകാരം, പഠനഫലം അന്താരാഷ്ട്ര അംഗീകാരമുള്ള ആയു ജേണലിൽ പ്രസിദ്ധീകരിച്ചിട്ടുണ്ട്.

രണ്ട് സംഘങ്ങളായി തിരിച്ച് പഠനം

സ്ഥാപനത്തിലെ കൗമാരഭൃത്യ അഥവാ ശിശുരോഗ വിഭാഗമാണ് പഠനം നടത്തിയത്. പങ്കെടുത്ത കുട്ടികളെ രണ്ട് സംഘങ്ങളായി തിരിച്ചു. ആദ്യ സംഘത്തിന് ആയുർവേദ മരുന്ന് മാത്രം നൽകി. ബ്രഹ്മി, ശംഖുപുഷ്പി, യഷ്ടിമധു അഥവാ ഇരട്ടിമധുരം, ഗുഡൂചി അഥവാ ചിറ്റമൃത് എന്നിവ അടങ്ങിയ മേധ്യ രസായന ചൂർണം ദിവസത്തിൽ രണ്ടുതവണ പാലിനൊപ്പം നൽകി. രണ്ടാമത്തെ സംഘത്തിന് ഇതേ മരുന്നിനൊപ്പം നാല് യോഗാസനങ്ങളും ഉൾപ്പെടുത്തി. ഉത്കടാസനം, അർധശലഭാസനം, ഭുജംഗാസനം, ശവാസനം എന്നിവ രാവിലെയും വൈകുന്നേരവും പതിവായി പരിശീലിപ്പിച്ചു.

മൂത്രമൊഴിക്കൽ ആവൃത്തിയിൽ 70 ശതമാനം വരെ കുറവ്

ആയുർവേദ മരുന്ന് മാത്രം സ്വീകരിച്ച കുട്ടികളിൽ കിടക്കയിൽ മൂത്രമൊഴിക്കുന്നതിന്റെ ആവൃത്തിയിൽ ഏകദേശം 38 ശതമാനം കുറവുണ്ടായി. മരുന്നും യോഗയും ചേർന്ന ചികിത്സ സ്വീകരിച്ചവരിൽ ഇത് ഏകദേശം 70 ശതമാനമായിരുന്നു. ഓർമശക്തിയിലും പുരോഗതി റിപ്പോർട്ട് ചെയ്തു. സംയോജിത ചികിത്സ സ്വീകരിച്ച കുട്ടികളിൽ ഏകദേശം 61 ശതമാനവും മരുന്ന് മാത്രം സ്വീകരിച്ചവരിൽ ഏകദേശം 31 ശതമാനവും മെച്ചപ്പെട്ടു. മരുന്നും യോഗയും സ്വീകരിച്ച സംഘത്തിൽ അസഹിഷ്ണുത ഏകദേശം 66 ശതമാനം കുറഞ്ഞു. പെരുമാറ്റവുമായി ബന്ധപ്പെട്ട ഘടകങ്ങളിലും പുരോഗതിയുണ്ടായി. പതിവായ യോഗപരിശീലനത്തോടൊപ്പം അമിത ചടുലതയിൽ ഏകദേശം 71 ശതമാനം കുറവും ശ്രദ്ധ കേന്ദ്രീകരിക്കാനുള്ള കഴിവിലും മനോബലത്തിലും ആശാവഹമായ പുരോഗതിയും കണ്ടെത്തി.

വിവരങ്ങൾ വിശദമായി പരിശോധിച്ച് ഗവേഷകർ

പ്രൊഫസർ വൈദ്യ വീരേന്ദ്ര കോരി, വൈദ്യ സാഗർ ഭിൻഡെ, വൈദ്യ അമിഷ ബാവർവ എന്നിവരാണ് ഗവേഷണം നടത്തി പ്രബന്ധം അവതരിപ്പിച്ചത്. പഠനത്തിൽ ലഭിച്ച വിവരങ്ങൾ ഗവേഷകർ വിശദമായി വിശകലനം ചെയ്തു. ഇതിനുശേഷമാണ് ഗവേഷണപ്രബന്ധം ആയു ജേണലിൽ പ്രസിദ്ധീകരിക്കാൻ സ്വീകരിച്ചത്. ചില കുട്ടികളിൽ ഉറക്കത്തിലുള്ള മൂത്രമൊഴിക്കൽ, മൂത്രാശയ നിയന്ത്രണത്തിലെ ബുദ്ധിമുട്ടുകളുമായും മാനസികവും പെരുമാറ്റപരവുമായ ഘടകങ്ങളുമായും ബന്ധപ്പെട്ടിരിക്കാമെന്ന് സ്ഥാപനത്തിന്റെ ഡയറക്ടർ പ്രൊഫസർ ഡോ. തനുജ നേസരി പറഞ്ഞു.

മൂത്രാശയ നിയന്ത്രണത്തിനും മാനസിക ക്ഷേമത്തിനും പിന്തുണ

ഉത്കടാസനം, ഭുജംഗാസനം ഉൾപ്പെടെയുള്ള തിരഞ്ഞെടുത്ത യോഗപരിശീലനങ്ങൾ ഇടുപ്പിനോടു ചേർന്ന പെൽവിക് ഭാഗം ശക്തിപ്പെടുത്താനും മൂത്രാശയ നിയന്ത്രണം മെച്ചപ്പെടുത്താനും സഹായിച്ചേക്കാമെന്നാണ് പഠനം സൂചിപ്പിക്കുന്നത്. ബ്രഹ്മി, ശംഖുപുഷ്പി തുടങ്ങിയ ആയുർവേദ ചേരുവകൾ മനസ്സിനെ ശാന്തമാക്കാനും മാനസിക ക്ഷേമത്തിന് പിന്തുണ നൽകാനും പരമ്പരാഗതമായി ഉപയോഗിച്ചുവരുന്നവയാണ്.

കരുതലും വൈദ്യോപദേശവും ആവശ്യമാണ്

കുട്ടികളിലെ ഉറക്കത്തിലുള്ള മൂത്രമൊഴിക്കൽ നിയന്ത്രിക്കാൻ ആയുർവേദവും യോഗയും സംയോജിപ്പിച്ച സമീപനത്തിനുള്ള സാധ്യതയാണ് പഠനഫലങ്ങൾ ചൂണ്ടിക്കാട്ടുന്നത്. മൊത്തത്തിലുള്ള ആരോഗ്യവും ക്ഷേമവും മെച്ചപ്പെടുത്താൻ പരമ്പരാഗത ചികിത്സാരീതികൾക്കൊപ്പം അനുയോജ്യമായ ജീവിതശൈലികളും ഉൾപ്പെടുത്തേണ്ടതിന്റെ പ്രാധാന്യവും പഠനം വ്യക്തമാക്കുന്നു. കിടക്കയിൽ മൂത്രമൊഴിക്കൽ കുട്ടികളിൽ സാധാരണയായി കാണുന്ന പ്രശ്നമാണ്. അതിനെ കരുതലോടെയും അനുയോജ്യമായ വൈദ്യോപദേശത്തോടെയും സമീപിക്കണമെന്നും അറിയിപ്പിൽ പറയുന്നു.