ന്യൂഡൽഹി/  2026 / ഓഗസ്റ്റ് 30 

കേന്ദ്ര യുവജനകാര്യ-കായിക മന്ത്രി ഡോ. മൻസുഖ് മാണ്ഡവ്യയുടെ നേതൃത്വത്തിൽ ഫിറ്റ് ഇന്ത്യ സൺഡേസ് ഓൺ സൈക്കിളിന്റെ 88-ാം പതിപ്പ് ഞായറാഴ്ച ന്യൂഡൽഹിയിലെ ജവഹർലാൽ നെഹ്റു സ്റ്റേഡിയത്തിൽ നടന്നു. ദേശീയ കായികദിനത്തോടനുബന്ധിച്ച് ബ്രിക്സുമായി ചേർന്ന് സംഘടിപ്പിച്ച പ്രത്യേക പതിപ്പിൽ ഇന്ത്യൻ ക്രിക്കറ്റ് ടീമിന്റെ മുഖ്യപരിശീലകൻ ഗൗതം ഗംഭീർ, ഗുസ്തിതാരം സംഗ്രാം സിങ്, നടി മധുരിമ തുലി എന്നിവരും പങ്കെടുത്തു. രാജ്യത്തെ 25,000-ത്തിലധികം കേന്ദ്രങ്ങളിൽ ഒരേസമയം പരിപാടി നടന്നു. ന്യൂഡൽഹിയിൽ ബ്രിക്സ് പങ്കാളി രാജ്യങ്ങളുടെ പ്രതിനിധികൾ ഉൾപ്പെടെ 5,000-ത്തിലധികം പേരാണ് പരിപാടിയുടെ ഭാഗമായത്.

ബ്രിക്സ് ഉച്ചകോടിക്ക് മുന്നോടിയായുള്ള പ്രത്യേക പതിപ്പ്

സെപ്റ്റംബർ 12, 13 തീയതികളിൽ ഭാരത് മണ്ഡപത്തിൽ ഇന്ത്യ ആതിഥേയത്വം വഹിക്കുന്ന 18-ാമത് ബ്രിക്സ് ഉച്ചകോടിയുടെ പശ്ചാത്തലത്തിൽ 88-ാം പതിപ്പിന് പ്രത്യേക പ്രാധാന്യമുണ്ടെന്ന് ഡോ. മൻസുഖ് മാണ്ഡവ്യ പറഞ്ഞു. ഈ ആഴ്ചത്തെ പരിപാടി ഉച്ചകോടിയിൽ പങ്കെടുക്കുന്ന ബ്രിക്സ് രാജ്യങ്ങളിലെ വിശിഷ്ടാതിഥികൾക്കും അംഗങ്ങൾക്കുമാണ് സമർപ്പിച്ചതെന്നും അവരെ പരിപാടിയിലേക്ക് സ്വാഗതം ചെയ്യുന്നതിൽ സന്തോഷമുണ്ടെന്നും അദ്ദേഹം വ്യക്തമാക്കി.

സൈക്കിൾ യാത്രയിലൂടെ ശരീരക്ഷമത വർധിപ്പിക്കാം, മലിനീകരണം കുറയ്ക്കാം, ഗതാഗതക്കുരുക്ക് ലഘൂകരിക്കാം എന്നിങ്ങനെ മൂന്ന് പ്രധാന നേട്ടങ്ങളുണ്ടെന്ന് മാണ്ഡവ്യ ചൂണ്ടിക്കാട്ടി. ആഴ്ചയിലെ പതിവ് ജീവിതത്തിന്റെ ഭാഗമാക്കി സൈക്കിൾ യാത്ര മാറ്റണമെന്നും അദ്ദേഹം ജനങ്ങളോട് അഭ്യർഥിച്ചു. രാജ്യത്തുടനീളം സൈക്കിൾ യാത്രയോടുള്ള താൽപര്യം ഉയരുകയാണെന്നും സൺഡേസ് ഓൺ സൈക്കിൾ ജനങ്ങളുടെ ആവേശമായി മാറുകയാണെന്നും അദ്ദേഹം പറഞ്ഞു. ദിവസവും ഒരു മണിക്കൂറെങ്കിലും മൊബൈൽ ഫോണിന്റെയും കമ്പ്യൂട്ടറിന്റെയും സ്ക്രീനുകളിൽ നിന്ന് മാറി പുറത്തേക്കിറങ്ങി സൈക്കിൾ ഓടിക്കാനും കായികപ്രവർത്തനങ്ങളിൽ പങ്കെടുക്കാനും ശരീരക്ഷമത നിലനിർത്താനും അദ്ദേഹം ആഹ്വാനം ചെയ്തു.

ബ്രിക്സ് രാജ്യങ്ങളുടെ നയതന്ത്ര പ്രതിനിധികളും പങ്കെടുത്തു

ബ്രിക്സ് പങ്കാളി രാജ്യങ്ങളെ പ്രതിനിധീകരിച്ച് മലേഷ്യൻ ഹൈക്കമ്മീഷനിലെ ഷരീഫ എസ്നീഡ വഫ സയ്യിദ് സുൽക്കർനൈൻ വഫ, വിയറ്റ്നാം എംബസിയിലെ നിയുക്ത അംബാസഡർ ട്രിൻ മിൻ മാൻ, ഇന്തോനേഷ്യൻ എംബസിയിലെ യുധോ സസോങ്കോ, ബെലാറസ് അംബാസഡർ മിഖായിൽ കാസ്കോ, ക്യൂബൻ അംബാസഡർ ഹുവാൻ കാർലോസ് മാർസൻ അഗ്വിലേര, എത്യോപ്യൻ അംബാസഡർ നെബിയു ടെഡ്ല നെഗാഷ്, റഷ്യൻ എംബസിയിലെ മന്ത്രി-കൗൺസിലറും ഡെപ്യൂട്ടി ചീഫ് ഓഫ് മിഷനുമായ റോമൻ ബാബുഷ്കിൻ എന്നിവർ പങ്കെടുത്തു.

കായികവകുപ്പ് സെക്രട്ടറി ഹരി രഞ്ജൻ റാവു, യുവജനകാര്യ വകുപ്പ് സെക്രട്ടറി സുനിൽ പാലിവാൾ, വിദേശകാര്യ മന്ത്രാലയത്തിലെ സാമ്പത്തിക ബന്ധ വിഭാഗം സെക്രട്ടറി സുധാകർ ദലേല എന്നിവരുൾപ്പെടെയുള്ള മുതിർന്ന സർക്കാർ ഉദ്യോഗസ്ഥരും ചടങ്ങിൽ സന്നിഹിതരായിരുന്നു.

സൈക്കിൾ യാത്ര ഫ്ലാഗ് ഓഫ് ചെയ്ത് ഗൗതം ഗംഭീർ

പത്മശ്രീ ഗൗതം ഗംഭീറാണ് സൈക്കിൾ യാത്ര ഫ്ലാഗ് ഓഫ് ചെയ്തത്. ഫിറ്റ് ഇന്ത്യയ്ക്കായി സർക്കാർ സംഘടിപ്പിക്കുന്ന ഈ പരിപാടി മികച്ച സംരംഭമാണെന്ന് അദ്ദേഹം പറഞ്ഞു. ഇന്ത്യ എത്രത്തോളം ശരീരക്ഷമതയുള്ള രാജ്യമാകുന്നുവോ അത്രത്തോളം ശക്തവും സ്വയംപര്യാപ്തവുമായ രാജ്യമാകുമെന്നും അദ്ദേഹം അഭിപ്രായപ്പെട്ടു. അതിനാൽ ഇതിനെ ഒരു പരിപാടിയായി മാത്രം കാണാതെ ഒരു പ്രസ്ഥാനമായി മാറ്റണമെന്നും ഗംഭീർ പറഞ്ഞു.

പ്രത്യേകിച്ച് യുവാക്കൾ ഈ ദൗത്യം ഏറ്റെടുത്ത് രാജ്യത്തെ യുവാക്കളെയും മറ്റെല്ലാവരെയും ശരീരക്ഷമതയുള്ളവരാക്കാൻ ശ്രമിക്കണം. അതിലൂടെ കൂടുതൽ ആരോഗ്യകരവും ശക്തവുമായ രാജ്യം സൃഷ്ടിക്കാനാകുമെന്നും അദ്ദേഹം പറഞ്ഞു. ബ്രിക്സ് റൺ ആൻഡ് റൈഡ് 2026 സംരംഭത്തിന്റെ ഭാഗമായി യുവാക്കൾ, മുതിർന്ന പൗരന്മാർ, ബ്രിക്സ് പങ്കാളി രാജ്യങ്ങളുടെ പ്രതിനിധികൾ എന്നിവരുൾപ്പെടെ 5,000-ത്തിലധികം പേർ ജവഹർലാൽ നെഹ്റു സ്റ്റേഡിയത്തിൽ ആവേശത്തോടെ നൃത്തം ചെയ്യുകയും സൈക്കിൾ ഓടിക്കുകയും വിവിധ പ്രവർത്തനങ്ങളിൽ പങ്കെടുക്കുകയും ചെയ്തു.

ഐടിബിപി ബ്രാസ് ബാൻഡും ആഘോഷത്തിന് മാറ്റുകൂട്ടി

ഇന്തോ-ടിബറ്റൻ ബോർഡർ പൊലീസിന്റെ ബ്രാസ് ബാൻഡ് പ്രകടനവും പരിപാടിയുടെ ആഘോഷാന്തരീക്ഷത്തിന് മാറ്റുകൂട്ടി. ദേശീയ കായികദിനത്തിന് തൊട്ടടുത്ത ദിവസം ഞായറാഴ്ച രാവിലെ പരിപാടി നടന്നത് ശരീരക്ഷമത, കായികരംഗം, ജനങ്ങളുടെ സജീവ പങ്കാളിത്തം എന്നിവയുടെ സന്ദേശത്തിന് കൂടുതൽ പ്രാധാന്യം നൽകി.

കേന്ദ്ര യുവജനകാര്യ-കായിക മന്ത്രി ഡോ. മൻസുഖ് മാണ്ഡവ്യ മുന്നോട്ടുവച്ച ആശയമാണ് ഫിറ്റ് ഇന്ത്യ സൺഡേസ് ഓൺ സൈക്കിൾ. കേന്ദ്ര യുവജനകാര്യ-കായിക മന്ത്രാലയം, സൈക്ലിങ് ഫെഡറേഷൻ ഓഫ് ഇന്ത്യ, രാഹ്ഗിരി ഫൗണ്ടേഷൻ, മൈ ഭാരത് എന്നിവ ചേർന്നാണ് പരിപാടി സംഘടിപ്പിക്കുന്നത്. സ്പോർട്സ് അതോറിറ്റി ഓഫ് ഇന്ത്യയുടെയും ഖേലോ ഇന്ത്യയുടെയും ശൃംഖലകളിലൂടെ എല്ലാ സംസ്ഥാനങ്ങളിലും കേന്ദ്രഭരണ പ്രദേശങ്ങളിലും പരിപാടി നടത്തുന്നു.

രാജ്യത്തെ കായികകേന്ദ്രങ്ങളിലും ഒരേസമയം സൈക്കിൾ യാത്ര

എല്ലാ സംസ്ഥാനങ്ങളിലും കേന്ദ്രഭരണ പ്രദേശങ്ങളിലും ഒരേസമയം സൈക്കിൾ യാത്ര സംഘടിപ്പിച്ചു. സ്പോർട്സ് അതോറിറ്റി ഓഫ് ഇന്ത്യയുടെ മേഖലാ കേന്ദ്രങ്ങൾ, നാഷണൽ സെന്റേഴ്സ് ഓഫ് എക്സലൻസ്, സായ് പരിശീലന കേന്ദ്രങ്ങൾ, ഖേലോ ഇന്ത്യ സംസ്ഥാന മികവിന്റെ കേന്ദ്രങ്ങൾ, ഖേലോ ഇന്ത്യ കേന്ദ്രങ്ങൾ എന്നിവിടങ്ങളിലും പരിപാടി നടന്നു.