മുംബൈ, 2026 ഓഗസ്റ്റ് 21 –

മഹാരാഷ്ട്രയിൽ പാക്ക് ചെയ്യാതെ ചില്ലറയായി പാചക എണ്ണ വിൽക്കുന്നതിന് സംസ്ഥാന ഭക്ഷ്യ-ഔഷധ ഭരണകൂടം വിലക്കേർപ്പെടുത്തി. കമ്മിഷണർ തുക്കാറാം മുണ്ടെയാണ് ഓഗസ്റ്റ് 20ന് മുംബൈയിൽ ഉത്തരവ് പ്രഖ്യാപിച്ചത്. ഉത്തരവ് ഉടൻ പ്രാബല്യത്തിൽ വന്നു. നിയമലംഘനങ്ങൾക്ക് ഏഴ് വർഷം വരെ തടവ് ലഭിക്കാമെന്നാണ് മുന്നറിയിപ്പ്.

മായം കലർത്തിയ എണ്ണക്കെതിരെ കർശന നടപടി

സംസ്ഥാനത്ത് നടത്തിയ പരിശോധനകളിൽ രജിസ്ട്രേഷനില്ലാത്ത എണ്ണ കമ്പനികളും മായം കലർത്തലും കണ്ടെത്തിയതായി മുണ്ടെ പറഞ്ഞു. വിലകുറഞ്ഞ എണ്ണകൾ പ്രഖ്യാപിക്കാതെ ചേർക്കുന്നതും കടുകെണ്ണയിൽ അനധികൃതമായി മറ്റ് എണ്ണകൾ കലർത്തുന്നതും കണ്ടെത്തി. ഉറവിടം വ്യക്തമല്ലാത്ത ചില്ലറ എണ്ണ ഭക്ഷ്യവിഷബാധയ്ക്ക് കാരണമാകാമെന്നാണ് അധികൃതരുടെ മുന്നറിയിപ്പ്. കടുകെണ്ണ നൂറ് ശതമാനം ശുദ്ധമായിത്തന്നെ വിൽക്കണമെന്നും നിർദേശമുണ്ട്.

പഴയ എണ്ണ വീണ്ടും പാക്ക് ചെയ്യുന്നതിനും പിടിവീഴും

കാലാവധി തീരാറായ എണ്ണ വീണ്ടും പാക്ക് ചെയ്യുക, യഥാർഥ ഉറവിടവും തീയതിയും മറയ്ക്കാൻ ലേബൽ മാറ്റുക, ഭക്ഷ്യവസ്തുക്കൾക്ക് അനുയോജ്യമല്ലാത്ത പാക്കിങ് ഉപയോഗിക്കുക തുടങ്ങിയ ക്രമക്കേടുകളും പരിശോധനയിൽ കണ്ടെത്തി. മിനറൽ ഓയിൽ, ലൂബ്രിക്കന്റ്, പെയിന്റ്, രാസവസ്തുക്കൾ എന്നിവ സൂക്ഷിച്ചിരുന്ന പാത്രങ്ങൾ പാചക എണ്ണയ്ക്കായി വീണ്ടും ഉപയോഗിക്കുന്നതും വിലക്കിയിട്ടുണ്ട്. പുതിയ ഉത്തരവ് എണ്ണ ഉൽപാദന യൂണിറ്റുകൾ മുതൽ ഓൺലൈൻ വിൽപ്പനക്കാർ വരെ മുഴുവൻ വിതരണ ശൃംഖലയ്ക്കും ബാധകമാണ്.

വറുത്ത എണ്ണ ആവർത്തിച്ച് ഉപയോഗിക്കരുത്

ഹോട്ടലുകളിലടക്കം വറുക്കാൻ ഉപയോഗിച്ച എണ്ണ വീണ്ടും വീണ്ടും ചൂടാക്കി ഉപയോഗിക്കുന്നതായും കണ്ടെത്തിയിട്ടുണ്ട്. ഇത്തരം എണ്ണയിൽ ആരോഗ്യത്തിന് ഹാനികരമായ ഘടകങ്ങൾ വർധിക്കുമെന്ന് ഭക്ഷ്യ-ഔഷധ ഭരണകൂടം മുന്നറിയിപ്പ് നൽകി. ഉപയോഗിച്ച എണ്ണ അംഗീകൃത ശേഖരണ സംവിധാനത്തിന് കൈമാറണം. അത് വീണ്ടും ഭക്ഷ്യശൃംഖലയിലേക്ക് എത്താൻ പാടില്ല. ഉപഭോക്താക്കൾ സീൽ ചെയ്ത എണ്ണ മാത്രം വാങ്ങണമെന്നും ലേബൽ, ബാച്ച് നമ്പർ, പാക്കിങ് തീയതി, ഉപയോഗിക്കാവുന്ന അവസാന തീയതി എന്നിവ പരിശോധിക്കണമെന്നും നിർദേശിച്ചു.

പത്ത് ലക്ഷം രൂപ വരെ പിഴ

സുരക്ഷിതമല്ലാത്ത ഭക്ഷ്യവസ്തുക്കളുടെ വിൽപ്പനയ്ക്ക് തടവും പത്ത് ലക്ഷം രൂപ വരെ പിഴയും ലഭിക്കാം. നിലവാരമില്ലാത്ത എണ്ണയ്ക്ക് അഞ്ച് ലക്ഷം രൂപ വരെയും തെറ്റായ ലേബലിന് മൂന്ന് ലക്ഷം രൂപ വരെയും പിഴ ചുമത്താം. ലൈസൻസില്ലാതെ പ്രവർത്തിക്കുന്നതിനും മായം ചേർക്കാനുള്ള വസ്തുക്കൾ കൈവശം വയ്ക്കുന്നതിനും തെറ്റിദ്ധരിപ്പിക്കുന്ന പരസ്യങ്ങൾക്കും പത്ത് ലക്ഷം രൂപ വരെ പിഴ ലഭിക്കാം. കമ്പനികളുടെ നിയമലംഘനങ്ങളിൽ ഉത്തരവാദികളായ ഡയറക്ടർമാർ, പങ്കാളികൾ, മാനേജർമാർ എന്നിവർക്കും വ്യക്തിപരമായി ഉത്തരവാദിത്തമുണ്ടാകും.