ഡൽഹി /2026 / ഓഗസ്റ്റ് 12
രാജ്യത്തെ ഡാറ്റാ സെന്ററുകളുടെ സുസ്ഥിര വളർച്ചയ്ക്ക് ഊർജക്ഷമതയും ശുദ്ധ ഊർജ ഉപയോഗവും പ്രോത്സാഹിപ്പിക്കുന്ന വിവിധ നടപടികളുമായി കേന്ദ്ര സർക്കാർ. പ്രധാനമന്ത്രി നരേന്ദ്ര മോദിയുടെ കാഴ്ചപ്പാടനുസരിച്ച് സാങ്കേതികവിദ്യയുടെ വികസനവും ഉപയോഗവും കൂടുതൽ ആളുകളിലേക്ക് എത്തിക്കുകയാണ് ലക്ഷ്യം. നിർമിത ബുദ്ധിയുടെയും ഉയർന്ന പ്രവർത്തനക്ഷമതയുള്ള കംപ്യൂട്ടിങ്ങിന്റെയും വളർച്ച ഡാറ്റാ സെന്റർ ശേഷിക്കുള്ള ആവശ്യം വർധിപ്പിക്കുന്ന സാഹചര്യത്തിലാണ് നടപടി. ഇതുസംബന്ധിച്ച വിവരങ്ങൾ കേന്ദ്ര ഇലക്ട്രോണിക്സ്-വിവരസാങ്കേതിക സഹമന്ത്രി ജിതിൻ പ്രസാദ ഓഗസ്റ്റ് ഏഴിന് രാജ്യസഭയിൽ അറിയിച്ചു.
ഡാറ്റാ സെന്റർ ശേഷി നാലിരട്ടിയിലേറെ ഉയർന്നു
ഡിജിറ്റൽ ഇന്ത്യ അടിസ്ഥാനസൗകര്യ സംവിധാനത്തിന്റെ പ്രധാന ഘടകമാണ് ഡാറ്റാ സെന്ററുകൾ. ഇന്ത്യയിലെ ഈ മേഖല സ്ഥിരമായ വളർച്ചയാണ് രേഖപ്പെടുത്തുന്നത്. മുംബൈ, നവി മുംബൈ, ചെന്നൈ, ഹൈദരാബാദ്, ബെംഗളൂരു, ഡൽഹി ദേശീയ തലസ്ഥാന മേഖല, ജാംനഗർ തുടങ്ങിയ സ്ഥലങ്ങളിലാണ് പ്രധാനമായും ഡാറ്റാ സെന്ററുകൾ പ്രവർത്തിക്കുന്നത്. 2020-ൽ 375 മെഗാവാട്ടായിരുന്ന സ്ഥാപിത ശേഷി ഇപ്പോൾ ഏകദേശം 1,575 മെഗാവാട്ടായി ഉയർന്നു. ആന്ധ്രാപ്രദേശ്, മധ്യപ്രദേശ്, ഛത്തീസ്ഗഢ്, പശ്ചിമ ബംഗാൾ എന്നിവയും പുതിയ നിക്ഷേപ കേന്ദ്രങ്ങളായി മാറുന്നതോടെ മേഖല കൂടുതൽ വ്യാപിക്കുകയാണ്.
2031-32 ഓടെ വൈദ്യുതി ആവശ്യം 17 ജിഗാവാട്ട്
രാജ്യത്തെ നിലവിലെ മൊത്തം സ്ഥാപിത വൈദ്യുതി ശേഷിയുടെ ഒരു ശതമാനത്തിൽ താഴെയാണ് ഡാറ്റാ സെന്ററുകളുടെ ഇപ്പോഴത്തെ ശേഷി. കേന്ദ്ര വൈദ്യുതി അതോറിറ്റിയുടെ കണക്കനുസരിച്ച് 2031-32 വരെ ഡാറ്റാ സെന്ററുകളുടെ വൈദ്യുതി ആവശ്യം ഏകദേശം 17 ജിഗാവാട്ടായി ഉയരുമെന്നാണ് വിലയിരുത്തൽ.
പുനരുപയോഗ ഊർജത്തിന് നിരവധി പദ്ധതികൾ
ഗ്രീൻ എനർജി ഓപ്പൺ ആക്സസ് ചട്ടങ്ങൾ, ഗ്രീൻ എനർജി കോറിഡോർ പദ്ധതി, ഗ്രീൻ ടേം അഹെഡ് മാർക്കറ്റ്, ദേശീയ ഗ്രീൻ ഹൈഡ്രജൻ ദൗത്യം, ഉയർന്ന കാര്യക്ഷമതയുള്ള സോളാർ പി.വി. മൊഡ്യൂളുകൾക്കുള്ള ദേശീയ പദ്ധതി, ഓഫ്ഷോർ വിൻഡ് വയബിലിറ്റി ഗ്യാപ് ഫണ്ടിങ് പദ്ധതി, സോളാർ പാർക്ക് പദ്ധതി തുടങ്ങിയവയിലൂടെ പുനരുപയോഗ ഊർജത്തെ സർക്കാർ പ്രോത്സാഹിപ്പിക്കുന്നു. നിർമിത ബുദ്ധി, ഡാറ്റാ സെന്ററുകൾ തുടങ്ങിയ വളർന്നുവരുന്ന മേഖലകൾക്ക് വിശ്വസനീയമായ ശുദ്ധ വൈദ്യുതി ഉറപ്പാക്കാൻ സുസ്ഥിര ആണവ ഊർജ വിനിയോഗവും വികസനവും ലക്ഷ്യമിട്ട ശാന്തി നിയമവും നടപ്പാക്കിയിട്ടുണ്ട്. ഭാവിയിൽ ചെറിയ മോഡുലാർ ആണവ റിയാക്ടറുകളും മൈക്രോ ആണവ റിയാക്ടറുകളും വിന്യസിക്കുന്നതും ഇതിൽ ഉൾപ്പെടുന്നു.
ഊർജവും വെള്ളവും ലാഭിക്കാൻ പുതിയ മാനദണ്ഡങ്ങൾ
ക്ലൗഡ് കംപ്യൂട്ടിങ്, വിവരസാങ്കേതികവിദ്യ, ഡാറ്റാ സെന്ററുകൾ എന്നിവയ്ക്കായുള്ള സാങ്കേതിക സമിതി എൽ.ഐ.ടി.ഡി. 31 വഴി ഇന്ത്യൻ സ്റ്റാൻഡേർഡ്സ് ബ്യൂറോ നിരവധി മാനദണ്ഡങ്ങൾ പ്രസിദ്ധീകരിച്ചിട്ടുണ്ട്. വൈദ്യുതി ഉപയോഗ കാര്യക്ഷമത, കാർബൺ ഉപയോഗ കാര്യക്ഷമത, തണുപ്പിക്കൽ കാര്യക്ഷമത അനുപാതം, ജല ഉപയോഗ കാര്യക്ഷമത എന്നിവയുമായി ബന്ധപ്പെട്ടതാണ് ഈ മാനദണ്ഡങ്ങൾ. കെട്ടിടങ്ങൾക്ക് ഊർജക്ഷമതയും ജലസംരക്ഷണവും ഉറപ്പാക്കുന്ന വ്യവസ്ഥകളോടെ ഊർജ സംരക്ഷണ കെട്ടിട ചട്ടം 2017-ഉം ഊർജ സംരക്ഷണ-സുസ്ഥിര കെട്ടിട ചട്ടം 2024-ഉം ഊർജക്ഷമതാ ബ്യൂറോ വിജ്ഞാപനം ചെയ്തിട്ടുണ്ട്. ഡാറ്റാ സെന്ററുകൾക്ക് ബാധകമായ വ്യവസ്ഥകളും ഇതിലുണ്ട്.
തണുപ്പിക്കൽ സാങ്കേതികവിദ്യയിലും മാറ്റം
ഡാറ്റാ സെന്ററുകൾക്ക് വേണ്ട വെള്ളത്തിന്റെ അളവ് അവിടെ ഉപയോഗിക്കുന്ന തണുപ്പിക്കൽ സാങ്കേതികവിദ്യയെ ആശ്രയിച്ചിരിക്കും. വ്യവസായ ആവശ്യങ്ങൾ ഉൾപ്പെടെയുള്ള ഭൂഗർഭജല ഉപയോഗത്തിന്റെ നിയന്ത്രണം ജലശക്തി മന്ത്രാലയത്തിന്റെ മാർഗനിർദേശങ്ങൾ അനുസരിച്ചാണ്. നിർമിത ബുദ്ധി അടിസ്ഥാനസൗകര്യങ്ങൾ വളരുന്നതിനൊപ്പം ചിപ്പിലേക്ക് നേരിട്ട് ദ്രാവകം എത്തിക്കുന്ന തണുപ്പിക്കൽ, അഡയബാറ്റിക് തണുപ്പിക്കൽ, ഇമ്മർഷൻ തണുപ്പിക്കൽ, ക്ലോസ്ഡ് ലൂപ്പ് ദ്രാവക തണുപ്പിക്കൽ തുടങ്ങിയ സാങ്കേതികവിദ്യകളും ഡാറ്റാ സെന്ററുകൾ സ്വീകരിച്ചുവരുന്നു. ഉയർന്ന പ്രവർത്തനക്ഷമതയുള്ള കംപ്യൂട്ടിങ്, നിർമിത ബുദ്ധി ജോലികൾ കാര്യക്ഷമമായി കൈകാര്യം ചെയ്യാൻ ഉയർന്ന സാന്ദ്രതയുള്ള റാക്കുകളും വ്യവസായം സ്ഥാപിക്കുന്നു. ഇതിലൂടെ വൈദ്യുതിയും വെള്ളവും കൂടുതൽ ലാഭിക്കാനാണ് ശ്രമം. വൈദ്യുതി ഉപഭോഗം, ഊർജക്ഷമത, പുനരുപയോഗ ഊർജ ഉപയോഗം, ഊർജ പുനരുപയോഗം, തണുപ്പിക്കൽ കാര്യക്ഷമത, കാർബൺ പുറന്തള്ളൽ, ജല ഉപയോഗം എന്നിവ നിയന്ത്രിക്കുന്നതിനുള്ള സമഗ്ര ചട്ടക്കൂടാണ് ഈ നടപടികൾ ചേർന്ന് ഒരുക്കുന്നതെന്ന് സർക്കാർ അറിയിച്ചു
