ന്യൂഡൽഹി, ജൂലൈ 15-

നിർബന്ധിത അധ്വാനത്തിലൂടെ (Forced Labour) ഉൽപ്പാദിപ്പിക്കുന്ന വിദേശ ഉൽപ്പന്നങ്ങളുടെ ഇറക്കുമതി തടയുന്നതിനായി കേന്ദ്ര സർക്കാർ പുതിയ അന്വേഷണ ചട്ടക്കൂട് രൂപീകരിച്ചു. ഡയറക്ടറേറ്റ് ജനറൽ ഓഫ് ഫോറിൻ ട്രേഡ് (DGFT) ജൂലൈ 14-നാണ് ഇതുസംബന്ധിച്ച വിശദമായ മാർഗരേഖ പുറപ്പെടുവിച്ചത്. ഉൽപ്പാദന പ്രക്രിയയിൽ നിയമവിരുദ്ധമായ തൊഴിൽ ചൂഷണം നടന്നതായി കണ്ടെത്തിയാൽ, ബന്ധപ്പെട്ട ഉൽപ്പന്നങ്ങളുടെ ഇറക്കുമതി പൂർണമായി നിരോധിക്കാൻ പുതിയ വ്യവസ്ഥകൾ അധികാരം നൽകുന്നു.

വിതരണശൃംഖലയും അന്വേഷണ പരിധിയിൽ

ഇറക്കുമതി ചെയ്യുന്ന ഉൽപ്പന്നങ്ങളുടെ വിതരണശൃംഖലയെക്കൂടി (Supply Chain) കേന്ദ്രീകരിച്ചായിരിക്കും ഇനി അന്വേഷണം നടക്കുക. ഏതെങ്കിലും വിദേശ ഉൽപ്പന്നം നിർബന്ധിത അധ്വാനം ഉപയോഗിച്ചാണ് നിർമിച്ചതെന്ന് വ്യക്തമായാൽ അവയുടെ രാജ്യത്തേക്കുള്ള പ്രവേശനം പൂർണമായി തടയും.

സ്വമേധയാ നടപടി സ്വീകരിക്കാൻ അധികാരം

വിശ്വസനീയമായ തെളിവുകൾ സഹിതമുള്ള പരാതികൾ ലഭിച്ചാലോ അല്ലെങ്കിൽ ഔദ്യോഗികമായി ലഭ്യമാകുന്ന വിവരങ്ങളുടെ അടിസ്ഥാനത്തിലോ അന്വേഷണ ഏജൻസികൾക്ക് സ്വമേധയാ (Suo motu) നടപടികൾ ആരംഭിക്കാം. അന്വേഷണത്തിന്റെ ഭാഗമായി ഇറക്കുമതിക്കാർ, കയറ്റുമതിക്കാർ, വിദേശ നിർമാതാക്കൾ എന്നിവരിൽ നിന്ന് വിവരങ്ങൾ തേടാൻ വ്യവസ്ഥയുണ്ട്. കൂടാതെ, ആഭ്യന്തര-രാജ്യാന്തര സംഘടനകളുടെ സാങ്കേതിക വൈദഗ്ധ്യവും മറ്റ് സർക്കാർ ഏജൻസികളുടെ ശുപാർശകളും ഇതിനായി പ്രയോജനപ്പെടുത്തും.

നിയമലംഘനം തെളിഞ്ഞാൽ ഇറക്കുമതിക്ക് നിരോധനം

വിദേശവ്യാപാര വികസന-നിയന്ത്രണ നിയമപ്രകാരമായിരിക്കും (FTDR Act) വിലക്ക് ഏർപ്പെടുത്തുക. കുറ്റകരമായ രീതിയിൽ ഉൽപ്പാദിപ്പിച്ചതായി കണ്ടെത്തുന്ന സാധനങ്ങളുടെ പട്ടിക സർക്കാർ പിന്നീട് പ്രത്യേകമായി വിജ്ഞാപനം ചെയ്യും. ശിക്ഷാനടപടികൾ ഭയപ്പെടുത്തി, വ്യക്തികളുടെ സമ്മതമില്ലാതെ ചെയ്യിക്കുന്ന എല്ലാ തൊഴിലുകളെയും പുതിയ വ്യാപാരനയത്തിന്റെ പരിധിയിൽ ‘നിർബന്ധിത അധ്വാനമായി’ നിർവചിച്ചിട്ടുണ്ട്.

രാജ്യാന്തര മാനദണ്ഡങ്ങളിലേക്ക് ഇന്ത്യ

ഇതുവരെ രാജ്യത്തിനകത്തെ നിർബന്ധിത തൊഴിൽ ചൂഷണങ്ങൾ തടയാൻ പ്രധാനമായും തൊഴിൽ നിയമങ്ങളെയും ഇന്ത്യൻ ശിക്ഷാനിയമത്തെയുമാണ് (IPC) രാജ്യം ആശ്രയിച്ചിരുന്നത്. പുതിയ ഭേദഗതിയോടെ രാജ്യത്തിന്റെ വിദേശവ്യാപാര നയത്തിലും ശക്തമായ നിയന്ത്രണ സംവിധാനം നിലവിൽ വന്നു. രാജ്യാന്തര തൊഴിൽ സംഘടനയുടെ (ILO) നിർബന്ധിത അധ്വാന വിരുദ്ധ കൺവെൻഷനിലെ മാനദണ്ഡങ്ങൾക്ക് അനുസൃതമായാണ് ഇന്ത്യയുടെ ഈ നിർണായക ചുവടുവെപ്പ്.

യു.എസ്. നടപടികൾക്കിടയിൽ പ്രഖ്യാപനം

ഇന്ത്യയും ചൈനയും ഉൾപ്പെടെ അറുപതോളം രാജ്യങ്ങളുടെ കയറ്റുമതി വിതരണശൃംഖലയിലെ നിർബന്ധിത അധ്വാന ആരോപണങ്ങളെക്കുറിച്ച് അമേരിക്ക അന്വേഷണം നടത്തുന്ന പശ്ചാത്തലത്തിലാണ് ഇന്ത്യയുടെ ഈ നടപടി. ആരോപണങ്ങൾ സ്ഥിരീകരിച്ചാൽ കയറ്റുമതി ഉൽപ്പന്നങ്ങൾക്ക് മേൽ 12.5 ശതമാനം വരെ അധിക തീരുവ ചുമത്താനാണ് യു.എസ് നീക്കം. എന്നാൽ ഇന്ത്യ ഏർപ്പെടുത്തിയ പുതിയ സംവിധാനം പതിവ് വ്യാപാര നിയന്ത്രണങ്ങളുടെ ഭാഗമാണെന്നും അമേരിക്കയുടെ നിലപാടുകളുമായി ഇതിന് ബന്ധമില്ലെന്നും വാണിജ്യ മന്ത്രാലയം വ്യക്തമാക്കി.

ചൈനീസ് ഉൽപ്പന്നങ്ങളും നിരീക്ഷണ വലയത്തിൽ

പരുത്തി, വസ്ത്രങ്ങൾ, സൗരോർജ ഉൽപ്പന്നങ്ങൾക്കാവശ്യമായ പോളിസിലിക്കൺ, സമുദ്രവിഭവങ്ങൾ, ലോഹങ്ങൾ, ബാറ്ററികൾ, ഇലക്ട്രോണിക്സ് ഉപകരണങ്ങൾ എന്നിവയുടെ ഉൽപ്പാദനത്തിൽ നിർബന്ധിത അധ്വാനം ഉപയോഗിക്കാൻ സാധ്യതയുണ്ടെന്നാണ് അന്താരാഷ്ട്ര ഏജൻസികളുടെ വിലയിരുത്തൽ. പ്രത്യേകിച്ച് ചൈനയിലെ ഷിൻജിയാങ് പ്രവിശ്യയിൽ നിന്നുള്ള ഉൽപ്പന്നങ്ങളെക്കുറിച്ച് ആഗോളതലത്തിൽ ആശങ്ക ശക്തമാണ്. ചൈനയിൽ നിന്ന് ഇന്ത്യ വലിയ തോതിൽ ഉൽപ്പന്നങ്ങൾ ഇറക്കുമതി ചെയ്യുന്നതിനാൽ പുതിയ ചട്ടക്കൂട് ഏറെ നിർണായകമാകും.