തിരുവനന്തപുരം, 2026 ജൂൺ 26 –

തിരുവനന്തപുരം നെയ്യാറ്റിൻകര ജനറൽ ആശുപത്രിയിൽ ചികിത്സാ പിഴവുണ്ടായെന്ന് ആരോപിച്ച് യുവതി പരാതി നൽകി. സിസേറിയന് ശേഷം കടുത്ത വയറുവേദന അനുഭവപ്പെട്ട നെയ്യാറ്റിൻകര സ്വദേശിനി സജിതയുടെ ഫാലോപ്യൻ ട്യൂബിൽ അണുബാധ കണ്ടെത്തിയത് സ്വകാര്യ ആശുപത്രിയിൽ നടത്തിയ പരിശോധനയിലാണ്. അഞ്ച് മാസമായി കടുത്ത വേദന അനുഭവിക്കുന്നതായി സജിത പറയുന്നു.

2026 ജനുവരി 28ന് പ്രസവത്തിനായി സജിത ആശുപത്രിയിൽ പ്രവേശിപ്പിക്കപ്പെട്ടു. ഫെബ്രുവരി 6ന് സിസേറിയനിലൂടെ കുഞ്ഞിനെ പുറത്തെടുത്തു. രണ്ട് ദിവസം കഴിഞ്ഞ് കടുത്ത പനിയും വയറുവേദനയും അനുഭവപ്പെട്ടതായി സജിത പറഞ്ഞു. ഫെബ്രുവരി 9ന് ആശുപത്രിയിൽ നിന്ന് ഡിസ്ചാർജ് ചെയ്തെങ്കിലും വേദന തുടർന്നു. തുടർന്ന് നടത്തിയ സ്കാനിങ് റിപ്പോർട്ടുമായി നെയ്യാറ്റിൻകര ജനറൽ ആശുപത്രിയിലെ ഡോക്ടറെ വീണ്ടും കണ്ടപ്പോൾ പ്രശ്നമില്ലെന്നും, യൂറിനറി ഇൻഫെക്ഷനായിരിക്കാമെന്നും പറഞ്ഞ് മരുന്ന് നൽകിയതായും സജിത പറയുന്നു. വേദന മാറാതിരുന്നതിനെ തുടർന്ന് തിരുവനന്തപുരം ജൂബിലി ആശുപത്രിയിൽ നടത്തിയ എംആർഐ പരിശോധനയിലാണ് അണുബാധ കണ്ടെത്തിയതെന്ന് കുടുംബം അറിയിച്ചു. ശസ്ത്രക്രിയയ്ക്കിടെയുണ്ടായ ഒരു പിഴവാകാമെന്നാണ് ജൂബിലി ആശുപത്രി അധികൃതർ അറിയിച്ചതെന്നും ഭർത്താവ് ആരോപിച്ചു.

ചികിത്സയ്ക്കായി രണ്ട് ലക്ഷത്തിലേറെ ചെലവ്; ആരോഗ്യവകുപ്പിന് പരാതി

തുടർചികിത്സയ്ക്കായി ഇതിനോടകം രണ്ട് ലക്ഷത്തിലധികം രൂപ ചെലവായതായി കുടുംബം അറിയിച്ചു. എസ്‌എടി ആശുപത്രിയിൽ ചികിത്സയിൽ കഴിയുന്ന സജിതയ്ക്ക് വീണ്ടും ശസ്ത്രക്രിയ ആവശ്യമാണ്. അണുബാധ മറ്റ് അവയവങ്ങളിലേക്കും വ്യാപിച്ചിട്ടുണ്ടെന്നും കുടുംബം പറയുന്നു. ഇക്കാര്യം ചൂണ്ടിക്കാട്ടി ആരോഗ്യവകുപ്പ് മന്ത്രിക്ക് പരാതി നൽകിയെങ്കിലും ഇടപെടൽ ഉണ്ടായില്ലെന്നും ആരോപണമുണ്ട്. സ്വകാര്യ ആശുപത്രിയിലെ നഴ്‌സായ സജിതയ്ക്ക് പ്രസവത്തിന് ശേഷം ജോലി നഷ്ടമായതായും കുടുംബം അറിയിച്ചു.