ചങ്ങനാശേരി, 2026 ജൂൺ 25 –

ചങ്ങനാശേരി നഗരപരിധിയിലെ റെയിൽവേ ഭൂമിയിലുള്ള തകർന്ന റോഡുകൾ നവീകരിക്കാൻ അനുമതി തേടി നഗരസഭ റെയിൽവേ അധികൃതരെ സമീപിച്ചു. സെന്റ് ആൻസ് സ്കൂൾ പാവനാശ്രമം റോഡ്, പഴയ ആർ.എം.എസ് റോഡ്, മോർക്കുളങ്ങര ലെവൽ ക്രോസിൽ നിന്ന് റെയിൽവേ മേൽപ്പാലത്തിലേക്കുള്ള രണ്ട് റോഡുകൾ, മോർക്കുളങ്ങര ലെവൽ ക്രോസ്, റെയിൽവേ സ്റ്റേഷന് സമീപത്തെ ഗുഡ്സ് ഷെഡ് റോഡ് എന്നിവ നവീകരിക്കാൻ അനുമതി നൽകണമെന്നാണ് ആവശ്യം.

റോഡുകൾ തകർന്നതിനാൽ വാഹനയാത്രയും കാൽനടയാത്രയും ദുരിതത്തിലാണെന്ന് നഗരസഭ ചൂണ്ടിക്കാട്ടി. വാഴൂർ റോഡിനെ ചങ്ങനാശേരി ബൈപാസുമായി ബന്ധിപ്പിക്കുന്ന മോർക്കുളങ്ങര ലെവൽ ക്രോസിന്റെ ഇരുവശങ്ങളിലുമുള്ള അപ്രോച്ച് റോഡുകൾ മഴക്കാലത്ത് ചെളിക്കുളമാകുന്നത് പതിവാണ്. റെയിൽവേ മേൽപ്പാലത്തിലേക്കുള്ള രണ്ട് റോഡുകളും അറ്റകുറ്റപ്പണികളില്ലാതെ സഞ്ചാരയോഗ്യമല്ലാത്ത നിലയിലാണ്. റെയിൽവേ സ്റ്റേഷന് സമീപത്തെ ഗുഡ്സ് ഷെഡ് റോഡിന്റെയും അവസ്ഥ സമാനമാണ്. ഈ റോഡിന്റെ നിർമാണത്തിനായി റെയിൽവേ അമ്പത് ലക്ഷം രൂപ അനുവദിച്ചെങ്കിലും പ്രവൃത്തി വൈകുകയാണ്.

ഇത് സംബന്ധിച്ച് കൊടിക്കുന്നിൽ സുരേഷ് എം.പി, മുനിസിപ്പൽ ചെയർമാൻ ജോമി ജോസഫ്, വൈസ് ചെയർപേഴ്സൺ കെ.എം. നെജിയ എന്നിവർ റെയിൽവേ ഡിവിഷണൽ മാനേജറുമായി ചർച്ച നടത്തി. റെയിൽവേ ഭൂമി പോർട്ടലിൽ റോഡുകളുടെ എസ്റ്റിമേറ്റ് സമർപ്പിക്കാൻ നഗരസഭയ്ക്ക് നിർദേശം നൽകിയതോടെയാണ് തുടർനടപടികൾ ആരംഭിക്കുന്നത്.