ന്യൂഡൽഹി, 2026 ജൂൺ 25 –

പൊതുഗതാഗത രംഗത്ത് വലിയ മാറ്റത്തിന് വഴിയൊരുക്കുന്ന ഹൈഡ്രജൻ ബസുകൾ ഉടൻ കേരളത്തിലെത്തുമെന്ന് ഗതാഗത മന്ത്രി സി. പി. ജോൺ പ്രഖ്യാപിച്ചു. ഡൽഹിയിൽ ഹൈഡ്രജൻ ബസിൽ പരീക്ഷണയാത്ര നടത്തിയ ശേഷമാണ് പ്രഖ്യാപനം. ബസുകൾ കേരളത്തിലെത്തിക്കുന്നതുമായി ബന്ധപ്പെട്ട ചർച്ചകൾ ആരംഭിച്ചതായും മന്ത്രി അറിയിച്ചു.

സംസ്ഥാനത്ത് ഹരിത ഇന്ധനങ്ങളുടെ ഉപയോഗം പ്രോത്സാഹിപ്പിക്കാനും ഹൈഡ്രജൻ ബസുകൾ സർവീസ് നടത്തുന്നതിനുള്ള പ്രായോഗിക സാധ്യതകൾ പഠിക്കാനുമാണ് മന്ത്രിയും സംഘവും ഡൽഹിയിലെത്തിയത്. കെ.എസ്.ആർ.ടി.സി സി.എം.ഡി പ്രമോജ് ശങ്കർ, അഡീഷണൽ റസിഡന്റ് കമ്മിഷണർ അശ്വതി ശ്രീനിവാസ് എന്നിവരും സംഘത്തിലുണ്ടായിരുന്നു. ഡൽഹി സെൻട്രൽ സെക്രട്ടേറിയറ്റിൽ നിന്ന് ആരംഭിച്ച് വിവിധ ഭാഗങ്ങൾ വഴി വീണ്ടും സെക്രട്ടേറിയറ്റിൽ അവസാനിക്കുന്ന രീതിയിലായിരുന്നു പരീക്ഷണയാത്ര.

യാത്രയ്ക്കിടെ ഡി.എം.ആർ.സി അധികൃതരുമായും ബസ് ഓപ്പറേറ്റർമാരുമായും മന്ത്രി വിശദമായ ചർച്ച നടത്തി. ബസിന്റെ സാങ്കേതിക സംവിധാനങ്ങൾ, ഇന്ധനക്ഷമത, മറ്റ് പ്രത്യേകതകൾ എന്നിവ വിലയിരുത്തിയ ശേഷമാണ് സംഘം യാത്ര പൂർത്തിയാക്കിയത്. കേരളത്തിൽ ഹൈഡ്രജൻ ബസുകൾ എത്തിക്കുന്നതിനുള്ള നടപടികൾ ഇനി മുന്നോട്ടുപോകുമെന്നാണ് സർക്കാർ പ്രതീക്ഷിക്കുന്നത്.