ന്യൂഡൽഹി, 2026 ജൂൺ 20 –

പൊതുജനാരോഗ്യം സംരക്ഷിക്കാനും മരുന്നുകളുടെ യുക്തിസഹമായ ഉപയോഗം ഉറപ്പാക്കാനും ലക്ഷ്യമിട്ട് കേന്ദ്ര ആരോഗ്യ കുടുംബക്ഷേമ മന്ത്രാലയം 16 സ്ഥിരമാത്രാ മരുന്ന് സംയോജനങ്ങളുടെ നിർമ്മാണം, വിൽപ്പന, വിതരണം എന്നിവയ്ക്ക് രാജ്യവ്യാപകമായി വിലക്കേർപ്പെടുത്തി. ഔഷധ-സൗന്ദര്യവർധക നിയമത്തിലെ വ്യവസ്ഥകൾ പ്രകാരമാണ് നടപടി. വിജ്ഞാപനം പുറത്തിറങ്ങിയതോടെ വിലക്ക് ഉടൻ പ്രാബല്യത്തിൽ വന്നു.

രാജ്യത്ത് ലഭ്യമായ ഇത്തരം മരുന്ന് സംയോജനങ്ങൾ സമഗ്രമായി പരിശോധിക്കണമെന്ന സുപ്രീംകോടതി നിർദേശത്തെ തുടർന്നാണ് നടപടി. ഇതിനായി ഔഷധ സാങ്കേതിക ഉപദേശക സമിതി വിദഗ്ധ സമിതിയെ നിയോഗിച്ചു. ചികിത്സാപരമായ ന്യായീകരണം ഇല്ലാത്തതും മനുഷ്യാരോഗ്യത്തിന് അപകടസാധ്യത ഉണ്ടാക്കാനിടയുള്ളതുമായ 16 സംയോജനങ്ങളെയാണ് ശാസ്ത്രീയ പഠനത്തിനും വിദഗ്ധ സമിതിയുടെ ശുപാർശകൾക്കും പിന്നാലെ സർക്കാർ നിരോധിച്ചത്. ത്വക്ക് ചികിത്സാ മരുന്നുകൾ, വേദനസംഹാരികൾ, രോഗാണുനാശിനി അടിസ്ഥാനമാക്കിയ മരുന്നുകൾ തുടങ്ങിയ വിഭാഗങ്ങളിലെ സംയോജനങ്ങളാണ് ഇതിൽ ഉൾപ്പെട്ടിരിക്കുന്നത്.

സുരക്ഷിതവും ഫലപ്രദവും ശാസ്ത്രീയമായി അംഗീകരിക്കപ്പെട്ടതുമായ മരുന്നുകൾ മാത്രം ജനങ്ങൾക്ക് ലഭ്യമാക്കാനുള്ള സർക്കാരിന്റെ തുടർച്ചയായ ശ്രമങ്ങളുടെ ഭാഗമാണ് ഈ നടപടിയെന്ന് മന്ത്രാലയം വ്യക്തമാക്കി. മുമ്പും സമാനമായ ശാസ്ത്രീയ പരിശോധനകൾക്ക് ശേഷം യുക്തിരഹിതമായ നിരവധി മരുന്ന് സംയോജനങ്ങൾ നിരോധിച്ചിരുന്നു. സംസ്ഥാനങ്ങളിലെ ഔഷധ നിയന്ത്രണ ഉദ്യോഗസ്ഥർക്കും മറ്റ് നിയന്ത്രണ-നടപ്പാക്കൽ ഏജൻസികൾക്കും വിലക്ക് കർശനമായി നടപ്പാക്കാൻ നിർദേശം നൽകിയിട്ടുണ്ട്. നിർമ്മാതാക്കൾക്കും ഇറക്കുമതിക്കാർക്കും വിതരണക്കാർക്കും നിയമാനുസൃതമായ തിരുത്തൽ നടപടികൾ സ്വീകരിക്കാനും നിർദേശമുണ്ട്.