പശ്ചിമ ബംഗാളിലെ ഹൂഗ്ലി ജില്ലയിൽ ജൂൺ ഇരുപതിന് പ്രധാനമന്ത്രി നരേന്ദ്ര മോദി കാർഷികം, ഗ്രാമവികസനം, മത്സ്യമേഖല, റെയിൽവേ തുടങ്ങിയ മേഖലകളിലെ നിരവധി പദ്ധതികൾ ഉദ്ഘാടനം ചെയ്യുകയും തറക്കല്ലിടുകയും ചെയ്യും. ഇതോടൊപ്പം പ്രധാനമന്ത്രി കിസാൻ സമ്മാൻ നിധി പദ്ധതിയുടെ ഇരുപത്തിമൂന്നാം ഗഡുവും വിതരണം ചെയ്യും. രാജ്യത്തെ ഒമ്പത് കോടി നാൽപ്പത്തിനാല് ലക്ഷം കർഷകരുടെ അക്കൗണ്ടുകളിലേക്ക് ഏകദേശം പതിനെട്ടായിരത്തി എണ്ണൂറ്റി എൺപത് കോടി രൂപ എത്തും.

കേന്ദ്ര കാർഷിക-കർഷകക്ഷേമ, ഗ്രാമവികസന മന്ത്രി ശിവരാജ് സിങ് ചൗഹാൻ ആണ് ഈ വിവരങ്ങൾ അറിയിച്ചത്. കർഷകരുടെ വരുമാന സുരക്ഷ ശക്തിപ്പെടുത്തുക, ഗ്രാമീണ അടിസ്ഥാനസൗകര്യങ്ങൾ വികസിപ്പിക്കുക, ഉൾക്കൊള്ളുന്ന വികസനം ഉറപ്പാക്കുക എന്നിവയാണ് പദ്ധതികളുടെ ലക്ഷ്യം. വിള ഇൻഷുറൻസ് പദ്ധതി, ഡിജിറ്റൽ കാർഷിക ദൗത്യത്തിന്റെ ഭാഗമായി കാർഷിക സാങ്കേതിക വേദി, ദേശീയ പ്രകൃതി കൃഷി ദൗത്യം, പ്രധാനമന്ത്രി ധൻ-ധാന്യ കൃഷി പദ്ധതി എന്നിവയും ആരംഭിക്കും. ഗ്രാമീണ റോഡ് പദ്ധതികൾ, മത്സ്യബന്ധന തുറമുഖ വികസനം, മൃഗസംരക്ഷണ പദ്ധതികൾ, റെയിൽവേ വികസന പ്രവർത്തനങ്ങൾ എന്നിവയും പരിപാടിയുടെ ഭാഗമാണ്.

രണ്ടായിരത്തി പത്തൊൻപതിൽ ആരംഭിച്ച പ്രധാനമന്ത്രി കിസാൻ പദ്ധതിയിലൂടെ രാജ്യത്ത് ഇതുവരെ നാല് ലക്ഷത്തി നാൽപ്പത്തിയാറായിരം കോടി രൂപയ്ക്കുമേൽ വിതരണം ചെയ്തതായി അറിയിച്ചിട്ടുണ്ട്. പശ്ചിമ ബംഗാളിൽ മാത്രം നാൽപ്പത്തിയഞ്ച് ലക്ഷത്തിലധികം ഗുണഭോക്തൃ കർഷകർക്ക് ഏകദേശം തൊള്ളായിരത്തി ഏഴ് കോടി രൂപ ലഭിക്കും. പ്രകൃതി കൃഷി ക്ലസ്റ്ററുകൾ, കാർഷിക ഉൽപ്പാദന വർധന, സംഭരണ-സംസ്കരണ സൗകര്യങ്ങൾ, റെയിൽവേ ആശുപത്രി, മേൽപ്പാലം, മൂന്നാം പാത പദ്ധതി തുടങ്ങിയവ സംസ്ഥാനത്തിന്റെ ഭാവി വികസനത്തിന് കരുത്താകുമെന്ന് കേന്ദ്രമന്ത്രി വ്യക്തമാക്കി.