പകർച്ചവ്യാധി പ്രതിരോധത്തിന് ഹൈപവർ കമ്മിറ്റി; വിദഗ്ധരെയും ഉൾപ്പെടുത്തി ആരോഗ്യവകുപ്പ്

തിരുവനന്തപുരം, 2026 ജൂൺ 18 –

സംസ്ഥാനത്ത് പകർച്ചവ്യാധികൾ വ്യാപകമാകുകയും മരണങ്ങൾ റിപ്പോർട്ട് ചെയ്യപ്പെടുകയും ചെയ്യുന്ന സാഹചര്യത്തിൽ രോഗപ്രതിരോധ പ്രവർത്തനങ്ങൾ ശക്തിപ്പെടുത്താൻ ആരോഗ്യവകുപ്പ് ഹൈപവർ കമ്മിറ്റി രൂപവത്കരിച്ചു. സർക്കാർ മേഖലയിലെ ഉദ്യോഗസ്ഥർക്കൊപ്പം സ്വകാര്യ മേഖലയിലെ വിദഗ്ധ ഡോക്ടർമാരെയും വിവിധ സംഘടനകളുടെ പ്രതിനിധികളെയും ഉൾപ്പെടുത്തിയാണ് ഉന്നതാധികാര സമിതി രൂപീകരിച്ചത്. ലോകാരോഗ്യ സംഘടനയുടെ കൺസൾട്ടന്റായ ഡോ. എസ്.എസ്. ലാൽ ചെയർമാനായും ആരോഗ്യവകുപ്പ് പ്രിൻസിപ്പൽ സെക്രട്ടറി ഡോ. ശർമിള മേരി ജോസഫ് കോ-ഓർഡിനേറ്ററായും ഡോ. ശ്രീജിത്ത് എൻ. കുമാർ കൺവീനറായും പ്രവർത്തിക്കും.

നിപ, ഷിഗെല്ല, എലിപ്പനി, മലമ്പനി, ഡെങ്കിപ്പനി, അമീബിക് മസ്തിഷ്കജ്വരം തുടങ്ങിയ രോഗങ്ങൾ സംസ്ഥാനത്ത് ഓരോ വർഷവും റിപ്പോർട്ട് ചെയ്യപ്പെടുന്ന സാഹചര്യത്തിലാണ് പുതിയ സമിതി രൂപീകരിച്ചത്. രോഗബാധിതരുടെ എണ്ണം കുറയ്ക്കാനും മരണങ്ങൾ ഒഴിവാക്കാനുമായി തദ്ദേശതലം മുതൽ സ്വീകരിക്കേണ്ട നടപടികൾ പഠിച്ച് റിപ്പോർട്ട് സമർപ്പിക്കുക എന്നതാണ് സമിതിയുടെ പ്രധാന ചുമതല. പകർച്ചവ്യാധികളുടെയും ജലജന്യ രോഗങ്ങളുടെയും വ്യാപനം തടയുന്നതിനുള്ള ദീർഘകാല പ്രതിരോധ സംവിധാനവും സമിതി നിർദേശിക്കും.

സമിതിയുടെ മേൽനോട്ടത്തിൽ എപ്പിഡമിക് കലണ്ടർ തയ്യാറാക്കി പ്രതിരോധ പ്രവർത്തനങ്ങൾ കൂടുതൽ ക്രമബദ്ധമായി നടപ്പാക്കും. സംസ്ഥാന, ജില്ലാ തലങ്ങളിൽ ഔട്ട്ബ്രേക്ക് മോണിറ്ററിംഗ് യൂണിറ്റുകളും ആക്ഷൻ കമ്മിറ്റികളും രൂപീകരിക്കും. ആരോഗ്യവകുപ്പിന് പുറമെ ആയുഷ്, തദ്ദേശസ്വയംഭരണം, മൃഗസംരക്ഷണം, ഭക്ഷ്യസുരക്ഷ എന്നീ വകുപ്പുകളുടെയും പ്രതിനിധികൾ സമിതിയിലുണ്ടാകും. ഇന്ത്യൻ മെഡിക്കൽ അസോസിയേഷന്റെയും ആരോഗ്യ മേഖലയിലെ വിവിധ സംഘടനകളുടെയും പങ്കാളിത്തവും ഉറപ്പാക്കുമെന്ന് ആരോഗ്യമന്ത്രി കെ. മുരളീധരൻ അറിയിച്ചു.