കൊച്ചി, 2026 ജൂൺ 18 –

മാസപ്പടി കേസിൽ എക്സാലോജിക് കമ്പനി ഉടമയും പ്രതിപക്ഷ നേതാവ് പിണറായി വിജയന്റെ മകളുമായ വീണ ടി. ഇന്ന് എൻഫോഴ്‌സ്‌മെന്റ് ഡയറക്ടറേറ്റിന് മുന്നിൽ ഹാജരാകും. നേരത്തെ വെള്ളിയാഴ്ച ഹാജരാകാൻ ഇഡി നിർദേശിച്ചിരുന്നെങ്കിലും ആരോഗ്യപരമായ കാരണങ്ങൾ ചൂണ്ടിക്കാട്ടി വീണ കൂടുതൽ സമയം ആവശ്യപ്പെട്ടിരുന്നു. ഇതിനെ തുടർന്നാണ് ബുധനാഴ്ച ഹാജരാകാൻ ഇഡി പുതിയ നിർദേശം നൽകിയത്.

സി.എം.ആർ.എല്ലുമായി നടത്തിയ സാമ്പത്തിക ഇടപാടുകൾ ഉൾപ്പെടെയുള്ള വിഷയങ്ങളിലാണ് ഇഡി വിശദീകരണം തേടുന്നത്. കേസുമായി ബന്ധപ്പെട്ട വിവിധ രേഖകളും സാമ്പത്തിക ഇടപാടുകളും അന്വേഷണ ഏജൻസി പരിശോധിച്ചുവരികയാണ്. ഇന്നത്തെ ചോദ്യം ചെയ്യലിൽ ഇതുസംബന്ധിച്ച കാര്യങ്ങൾ പ്രധാനമായും ഉയർന്നുവരുമെന്നാണ് സൂചന.

അതേസമയം, കേസുമായി ബന്ധപ്പെട്ട് ചൊവ്വാഴ്ച ശശിധരൻ കർത്തയുടെ ഭാര്യ ജയ കർത്തയും മകൻ ശരൺ എസ്. കർത്തയും ഇഡിക്ക് മുന്നിൽ ഹാജരായിരുന്നു. കേസിലെ സാമ്പത്തിക ഇടപാടുകളുടെ വിവിധ വശങ്ങൾ കേന്ദ്രീകരിച്ചാണ് അന്വേഷണം പുരോഗമിക്കുന്നത്.