കാസർകോട്, 2026 ജൂൺ 17 –

കയ്യിൽ കിട്ടിയ വിവാഹക്കത്തിൽ നിന്ന് ലഭിച്ച മേൽവിലാസം പിന്തുടർന്ന് വീട്ടിലെത്തി വയോധികയെ കത്തി കാട്ടി ഭീഷണിപ്പെടുത്തി മോഷണം നടത്തിയ കേസിൽ പ്രതിയെ പൊലീസ് അറസ്റ്റ് ചെയ്തു. സംഭവത്തിന് രണ്ട് മാസങ്ങൾക്ക് ശേഷമാണ് ബക്‌സു അലി എന്ന പ്രതി പിടിയിലായത്. ഏപ്രിൽ 12ന് കാസർകോട് ചീമേനിയിലായിരുന്നു കേസിനാസ്പദമായ സംഭവം.

നാരായണി എന്ന വയോധികയുടെ വീട്ടിലെത്തിയ പ്രതി ആദ്യം വെള്ളം ചോദിച്ചു. വെള്ളമെടുക്കാൻ വീട്ടമ്മ പോയ സമയത്ത് വീടിനുള്ളിൽ കടന്ന ഇയാൾ മേശപ്പുറത്തുണ്ടായിരുന്ന 3,000 രൂപ കൈക്കലാക്കി. തുടർന്ന് കത്തി കഴുത്തിൽ വച്ച് ഭീഷണിപ്പെടുത്തി നാരായണിയുടെ മുക്കാൽ പവൻ സ്വർണക്കമ്മൽ ഊരിവാങ്ങി രക്ഷപ്പെടുകയായിരുന്നു. പേരക്കുട്ടിയുടെ വിവാഹ ചടങ്ങിൽ പങ്കെടുക്കാൻ കുടുംബാംഗങ്ങൾ എല്ലാവരും പോയിരുന്ന സമയത്തായിരുന്നു സംഭവം.

വഴിമധ്യേ ഒരു വിവാഹ ചടങ്ങിൽ എത്തിയ പ്രതി അവിടെ നിന്ന് ഒരു സ്ത്രീയുടെ ബാഗ് മോഷ്ടിക്കുകയും അതിലുണ്ടായിരുന്ന വിവാഹക്കത്തിൽ നിന്ന് വീട്ടുവിലാസം കണ്ടെത്തുകയുമായിരുന്നു. മോഷണത്തിന് ശേഷം ഗുജറാത്തിലേക്ക് മടങ്ങിയ പ്രതിയെ കണ്ടെത്താൻ പൊലീസ് 500ലധികം സിസിടിവി ദൃശ്യങ്ങൾ പരിശോധിച്ചു. ഒടുവിൽ നടത്തിയ അന്വേഷണത്തിലാണ് പ്രതി പിടിയിലായത്.