സാമൂഹ്യനീതി ശാക്തീകരണ മന്ത്രാലയത്തിന്റെ നേതൃത്വത്തിൽ ജൂൺ 17 മുതൽ 26 വരെ രാജ്യവ്യാപകമായി ലഹരിമുക്ത ഭാരത് സപ്താഹം സംഘടിപ്പിക്കുന്നു. “ലഹരിമുക്ത ഭാരത് അഭിയാൻ – വികസിത ഭാരതത്തിന്റെ അടയാളം” എന്ന ആശയത്തോടെയാണ് പരിപാടി നടക്കുന്നത്. മയക്കുമരുന്ന് ദുരുപയോഗത്തിനും അനധികൃത കടത്തിനുമെതിരായ അന്താരാഷ്ട്ര ദിനത്തോടനുബന്ധിച്ചാണ് ഈ പ്രത്യേക ആചരണം. രാജ്യത്തെ വിവിധ സംസ്ഥാനങ്ങളിലും കേന്ദ്രഭരണ പ്രദേശങ്ങളിലും ജില്ലകളിലുമായി നിരവധി പരിപാടികൾ നടക്കും.

മയക്കുമരുന്ന് ഉപയോഗം തടയാനും ആരോഗ്യകരമായ ജീവിതശൈലി പ്രോത്സാഹിപ്പിക്കാനുമാണ് ഈ നീക്കം. സാമൂഹ്യനീതി ശാക്തീകരണ കേന്ദ്രമന്ത്രി ഡോ. വീരേന്ദ്ര കുമാർ ജൂൺ 17ന് സപ്താഹത്തിന് ഓൺലൈൻ ഉദ്ഘാടനം നിർവഹിക്കും. ലഹരിമുക്തി മിത്രയ്ക്കുള്ള വ്യക്തിഗത വിവരഫലകവും ബോധവത്കരണ ഹ്രസ്വചിത്രവും ചടങ്ങിൽ പുറത്തിറക്കും. കേന്ദ്ര മന്ത്രാലയങ്ങൾ, സംസ്ഥാനങ്ങൾ, ജില്ലാ ഭരണകൂടങ്ങൾ, ആത്മീയ സംഘടനകൾ, ധനസഹായം ലഭിക്കുന്ന സ്ഥാപനങ്ങൾ എന്നിവയും പരിപാടിയുടെ ഭാഗമാകും. ബോധവത്കരണ റാലികൾ, സൈക്കിൾ റാലികൾ, യുവജന പ്രചാരണങ്ങൾ, മത്സരങ്ങൾ, സംവാദങ്ങൾ, തെരുവുനാടകങ്ങൾ, സാംസ്കാരിക പരിപാടികൾ എന്നിവ സംഘടിപ്പിക്കും.

മയക്കുമരുന്ന് ആവശ്യകത കുറയ്ക്കുന്നതിനുള്ള ചുമതലയുള്ള വകുപ്പാണ് സാമൂഹ്യനീതി ശാക്തീകരണ വകുപ്പ്. യുവജനങ്ങളുടെ പങ്കാളിത്തത്തിന് പ്രത്യേക പ്രാധാന്യം നൽകിയാണ് ഇത്തവണത്തെ പരിപാടികൾ ഒരുക്കിയിരിക്കുന്നത്. സ്കൂളുകൾ, കോളജുകൾ, ഉന്നത വിദ്യാഭ്യാസ സ്ഥാപനങ്ങൾ എന്നിവയെ കേന്ദ്രീകരിച്ചും പ്രവർത്തനങ്ങൾ നടക്കും. ജൂൺ 21ലെ അന്താരാഷ്ട്ര യോഗ ദിനത്തോടനുബന്ധിച്ച് യോഗ, ധ്യാനം, ആരോഗ്യപരിപാലന പരിപാടികൾ എന്നിവയും നടത്തും. സമൂഹമാധ്യമങ്ങൾ ഉൾപ്പെടെയുള്ള വിപുലമായ പ്രചാരണത്തിലൂടെ കൂടുതൽ ജനപങ്കാളിത്തം ഉറപ്പാക്കാനാണ് ലക്ഷ്യം.

.