രാജ്യത്തിന്റെ പരമ്പരാഗത വിജ്ഞാന പൈതൃകം സംരക്ഷിക്കുന്നതിന്റെ ഭാഗമായി ടിഗളാരി, പഴയ കന്നഡ ലിപികളിൽ എഴുതപ്പെട്ട ആയുർവേദ കൈയെഴുത്തുപ്രതികളുടെ ലിപ്യന്തരണത്തിനായുള്ള ശേഷി വികസന ശിൽപശാല ഇന്ന് ഉടുപ്പിയിലെ ശ്രീ പുത്തിഗെ നരസിംഹ സഭാഭവനിൽ ആരംഭിച്ചു. പതിനഞ്ച് ദിവസം നീളുന്ന പരിപാടിയിൽ പ്രസിദ്ധീകരിക്കാത്ത അപൂർവ ആയുർവേദ ഗ്രന്ഥങ്ങൾ പ്രസിദ്ധീകരണത്തിന് തയ്യാറാക്കുന്നതിനുള്ള പ്രവർത്തനങ്ങളാണ് നടക്കുന്നത്.

ആയുഷ് മന്ത്രാലയത്തിന് കീഴിലെ ആയുർവേദ ശാസ്ത്ര ഗവേഷണ കേന്ദ്ര കൗൺസിലും വിദ്യാഭ്യാസ മന്ത്രാലയത്തിന് കീഴിലെ കേന്ദ്ര സംസ്കൃത സർവകലാശാലയും ശ്രീ വാദിരാജ ഗവേഷണ ഫൗണ്ടേഷനുമായി ചേർന്നാണ് ശിൽപശാല സംഘടിപ്പിക്കുന്നത്. കർണാടക തീരപ്രദേശങ്ങളിൽ പ്രധാനമായും കാണപ്പെടുന്ന ടിഗളാരി, പഴയ കന്നഡ ലിപികളിലുള്ള ആയുർവേദ കൈയെഴുത്തുപ്രതികൾ വായിക്കാനും വ്യാഖ്യാനിക്കാനും പകർത്തിയെഴുതാനും പണ്ഡിതന്മാർക്ക് വൈദഗ്ധ്യം നൽകുകയാണ് ലക്ഷ്യം. ആയുർവേദ, സംസ്കൃത പഠന പശ്ചാത്തലമുള്ള യുവ ഗവേഷകർ വിദഗ്ധരോടൊപ്പം ചേർന്ന് കൈയെഴുത്തുപ്രതികൾ പഠിക്കുകയും തിരുത്തി പ്രസിദ്ധീകരണത്തിന് ഒരുക്കുകയും ചെയ്യും.

ആയുർവേദ വിജ്ഞാനത്തിന്റെ സംരക്ഷണത്തിനും പ്രചാരണത്തിനുമായി നടപ്പാക്കുന്ന വിവിധ പദ്ധതികൾ ഉദ്ഘാടന ചടങ്ങിൽ വിശദീകരിച്ചു. വിജ്ഞാന ഭാരതം ദൗത്യത്തിന്റെ ഭാഗമായി രാജ്യത്തിന്റെ സമ്പന്നമായ വിജ്ഞാന പാരമ്പര്യം സംരക്ഷിക്കാനും പ്രോത്സാഹിപ്പിക്കാനും കേന്ദ്ര സർക്കാർ ശ്രമിക്കുന്നുണ്ടെന്നും അറിയിച്ചു. കേന്ദ്ര സംസ്കൃത സർവകലാശാലയും കൗൺസിലും ചേർന്ന് നടത്തുന്ന മൂന്നാമത്തെ ശിൽപശാലയാണിത്. നേരത്തെ ഒഡിഷയിലെ പുരിയിലും കേരളത്തിലെ ഗുരുവായൂരിലും സമാന പരിശീലന പരിപാടികൾ സംഘടിപ്പിച്ചിരുന്നു. ശിൽപശാലയിൽ തയ്യാറാക്കുന്ന ലിപ്യന്തരണം ചെയ്ത കൈയെഴുത്തുപ്രതികൾ പിന്നീട് പ്രസിദ്ധീകരിച്ച് പൊതുജനങ്ങളിലേക്ക് എത്തിക്കും.

.