വധശ്രമക്കേസ് പ്രതിക്ക് കാപ്പ; വിയ്യൂർ ജയിലിലടച്ചു

കൊച്ചി, 2026 ജൂൺ 14 –

വധശ്രമക്കേസിൽ പ്രതിയായ ആലുവ പൈപ്പ്‌ലൈൻ റോഡ് ഭാഗത്ത് ഫ്രണ്ട്ഷിപ് ഹൗസിന് സമീപം വാടകയ്ക്ക് താമസിക്കുന്ന വിഷ്ണു (38)വിനെ കാപ്പ ചുമത്തി വിയ്യൂർ സെൻട്രൽ ജയിലിലടച്ചു. എറണാകുളം റൂറൽ ജില്ലാ പോലീസ് മേധാവി കെ.എസ്. സുദർശന്റെ റിപ്പോർട്ടിന്റെ അടിസ്ഥാനത്തിൽ ജില്ലാ കളക്ടർ പ്രിയങ്ക ജിയാണ് ഉത്തരവിറക്കിയത്.

കഴിഞ്ഞ ഏപ്രിൽ അവസാനം ആലുവ പ്രൈവറ്റ് ബസ് സ്റ്റാൻഡിൽ വച്ച് ബസിന് മുന്നിൽ സ്കൂട്ടർ നിർത്തി മാർഗതടസം സൃഷ്ടിച്ചതിനെ ചോദ്യം ചെയ്ത ബസ് ഡ്രൈവറെ വിഷ്ണുവും കൂട്ടാളിയും ആക്രമിച്ചെന്നാണ് കേസ്. സ്കൂട്ടറിന്റെ താക്കോൽ ഉപയോഗിച്ച് ഡ്രൈവറുടെ മുഖത്ത് കുത്തി പരിക്കേൽപ്പിക്കുകയും തടയാൻ ശ്രമിച്ച മറ്റൊരു സ്വകാര്യ ബസിലെ ജീവനക്കാരനെ ആക്രമിക്കുകയും ബസിന്റെ ഗ്ലാസ് തകർക്കുകയും ചെയ്തതായി പോലീസ് പറയുന്നു. ഇതുമായി ബന്ധപ്പെട്ട് ആലുവ ഈസ്റ്റ് പോലീസ് രജിസ്റ്റർ ചെയ്ത കേസിലെ പ്രതിയാണ് വിഷ്ണു.

2021ന് ശേഷം ആലുവ ഈസ്റ്റ് പോലീസ് സ്റ്റേഷൻ പരിധിയിൽ മാത്രം മൂന്ന് വധശ്രമക്കേസുകളിലും മറ്റ് ആക്രമണക്കേസുകളിലും ഇയാൾ ഉൾപ്പെട്ടിട്ടുണ്ടെന്ന് പോലീസ് അറിയിച്ചു. ആലുവ ഈസ്റ്റ് പോലീസ് സംഘമാണ് പ്രതിയെ അറസ്റ്റ് ചെയ്തത്. ഈ വർഷം ഇതുവരെ എറണാകുളം റൂറൽ ജില്ലയിൽ നിരന്തര കുറ്റകൃത്യങ്ങളിൽ ഉൾപ്പെട്ട 14 പേർക്കെതിരെ കാപ്പ ചുമത്തി ജയിലിലടച്ചതായി പോലീസ് അറിയിച്ചു.