അമേരിക്കയുടെ ലോകകപ്പ് ആദ്യ മത്സരം; ട്രംപ് എത്തില്ലെന്ന് റിപ്പോർട്ട്

ന്യൂയോർക്ക്, 2026 ജൂൺ 13 –

ഫിഫ ലോകകപ്പിൽ അമേരിക്കയുടെ ആദ്യ മത്സരം കാണാൻ അമേരിക്കൻ പ്രസിഡന്റ് ഡോണൾഡ് ട്രംപ് എത്താനിടയില്ലെന്ന് റിപ്പോർട്ടുകൾ. ലോസ് ആഞ്ചലസിൽ നടക്കുന്ന മത്സരത്തിൽ പരാഗ്വായെയാണ് അമേരിക്ക നേരിടുന്നത്. അമേരിക്കയുടെ  ആദ്യ മത്സരമായതിനാൽ വലിയ ശ്രദ്ധയാണ് ഏറ്റുമുട്ടലിന് ലഭിക്കുന്നത്.

തിരക്കേറിയ ഔദ്യോഗിക പരിപാടികളാണ് ട്രംപിന്റെ അസാന്നിധ്യത്തിന് കാരണമെന്നാണ് റിപ്പോർട്ടുകൾ സൂചിപ്പിക്കുന്നത്. ഞായറാഴ്ച അദ്ദേഹത്തിന്റെ എൺപതാം ജന്മദിനവും ഫ്ലാഗ് ഡേയും അനുബന്ധിച്ച് വൈറ്റ് ഹൗസിൽ നടക്കുന്ന യു.എഫ്.സി ഫ്രീഡം 250 പരിപാടിയിൽ പങ്കെടുക്കാനാണ് നിലവിലെ പദ്ധതി. ഇതുമൂലമാണ് ലോകകപ്പ് മത്സരം നേരിൽ കാണാൻ കഴിയാത്തതെന്നാണ് വിവരം.

പ്രശസ്ത പരിശീലകനായ മൗറീസിയോ പോച്ചെറ്റിനോയുടെ നേതൃത്വത്തിലാണ് അമേരിക്കൻ ടീം ഇത്തവണ കളത്തിലിറങ്ങുന്നത്. ടൂർണമെന്റിൽ ടീമിനെ കുറിച്ച് വലിയ പ്രതീക്ഷകളാണ് ഉയരുന്നത്. സെനഗലിനെതിരായ സൗഹൃദ മത്സരത്തിൽ 3-2ന്റെ വിജയവുമായി ആത്മവിശ്വാസം നേടിയ ശേഷമാണ് അമേരിക്ക ലോകകപ്പ് പോരാട്ടത്തിന് ഇറങ്ങുന്നത്.