യൂട്യൂബർ തൊപ്പിക്കെതിരെ അന്വേഷണം; ഡി.ജി.പി ഉത്തരവിറക്കി

കോഴിക്കോട്, 2026 ജൂൺ 13 –

വിവാദ യൂട്യൂബറായ തൊപ്പി എന്ന നിഹാദിനും സുഹൃത്തുക്കൾക്കുമെതിരെ അന്വേഷണത്തിന് സംസ്ഥാന പൊലീസ് മേധാവി ഉത്തരവിട്ടു. അഡ്വ. ശ്രീജിത്ത് പെരുമന നൽകിയ പരാതിയുടെ അടിസ്ഥാനത്തിലാണ് ഡി.ജി.പി റവാഡ ചന്ദ്രശേഖർ അന്വേഷണത്തിന് നിർദേശം നൽകിയത്. സൈബർ പൊലീസ് സൂപ്രണ്ട് അങ്കിത് അശോകനാണ് അന്വേഷണത്തിന്റെ ചുമതല വഹിക്കുന്നത്.

പോക്സോ കേസുകൾ, മയക്കുമരുന്നായ എം.ഡി.എം.എ ഉപയോഗം, മാനസികവും ശാരീരികവുമായ പീഡനങ്ങൾ, അശ്ലീല പ്രചാരണം, ഗുരുതര സൈബർ കുറ്റകൃത്യങ്ങൾ തുടങ്ങിയ ആരോപണങ്ങളിലാണ് അന്വേഷണം പ്രഖ്യാപിച്ചിരിക്കുന്നത്. പരാതിയിൽ ഉന്നയിച്ച വിഷയങ്ങളുടെ സത്യാവസ്ഥ പരിശോധിച്ച് റിപ്പോർട്ട് സമർപ്പിക്കാനാണ് അന്വേഷണ സംഘത്തിന് നൽകിയിരിക്കുന്ന നിർദേശം.

തൊപ്പിയും സംഘവും നിയമവിരുദ്ധ പ്രവർത്തനങ്ങളിൽ ഏർപ്പെടുന്നുവെന്ന് ആരോപിച്ച് ഡി.ജി.പി‍ക്ക് പരാതി നൽകിയതും തുടർന്ന് പൊലീസ് നടപടി ആരംഭിച്ചതും അഡ്വ. ശ്രീജിത്ത് പെരുമനയാണ് സാമൂഹിക മാധ്യമങ്ങളിലൂടെ അറിയിച്ചത്. കുട്ടികളെയും യുവാക്കളെയും വഴിതെറ്റിക്കുന്ന തരത്തിലുള്ള ഉള്ളടക്കങ്ങൾക്കെതിരെ കർശന നടപടി ഉണ്ടാകുമെന്ന സൂചനയും ഇതോടൊപ്പം ഉയരുന്നുണ്ട്.