കാഠ്മണ്ഡു, 2026 മെയ് 31 –

ഇന്ത്യയും നേപ്പാളും തമ്മിലുള്ള ദീർഘകാല അതിർത്തി തർക്കവുമായി ബന്ധപ്പെട്ട് നേപ്പാൾ പ്രധാനമന്ത്രി ബലേന്ദ്ര ഷാ പാർലമെന്റിൽ നടത്തിയ പ്രസ്താവന ഹിമാലയൻ രാജ്യത്ത് വലിയ രാഷ്ട്രീയ വിവാദത്തിന് കാരണമായി. ഇന്ത്യ നേപ്പാളിന്റെ ഭൂമി കൈയേറിയെന്ന വിഷയത്തിൽ വിശദീകരണം നൽകുന്നതിനിടെയാണ് നേപ്പാളും ഇന്ത്യയുടെ ചില പ്രദേശങ്ങൾ കൈയേറിയിട്ടുണ്ടെന്ന് അദ്ദേഹം പറഞ്ഞത്. കലാപാനി, ലിപുലേഖ്, ലിംപിയാധുര എന്നീ മേഖലകളെ ചൊല്ലിയാണ് ഇരു രാജ്യങ്ങളും പഴക്കമേറിയ അതിർത്തി തർക്കത്തിൽ തുടരുന്നത്.

അതിർത്തി പ്രശ്നത്തിന് പരിഹാരം കാണാൻ ചരിത്രകാരൻമാർ, സർവേ വിദഗ്ധർ, ബന്ധപ്പെട്ട മറ്റു വിദഗ്ധർ എന്നിവരുടെ സഹായത്തോടെ ചർച്ച നടത്താൻ ഇരു രാജ്യങ്ങളും ധാരണയിലെത്തിയതായി ബലേന്ദ്ര ഷാ പാർലമെന്റിൽ പറഞ്ഞു. ലിപുലേഖ് ഉൾപ്പെടെയുള്ള പ്രദേശങ്ങൾ ഇന്ത്യ കൈയേറിയെന്ന ആരോപണം ഉന്നയിച്ച് നേപ്പാൾ സർക്കാർ ഇന്ത്യയ്ക്ക് ഔദ്യോഗിക നയതന്ത്ര കുറിപ്പും നൽകിയതായി അദ്ദേഹം വ്യക്തമാക്കി. അതിന് ഇന്ത്യ മറുപടിയും നൽകിയതായി ഷാ പറഞ്ഞു. വിഷയത്തിൽ നേപ്പാൾ ചൈനയുമായും ബ്രിട്ടനുമായും നയതന്ത്രതല ചർച്ചകൾ നടത്തിയതായും അദ്ദേഹം കൂട്ടിച്ചേർത്തു.

അതേസമയം, വിവാദ പ്രദേശങ്ങൾ ഉത്തരാഖണ്ഡിന്റെ ഭാഗമാണെന്ന നിലപാടിലാണ് ഇന്ത്യ തുടരുന്നത്. പ്രശ്നം ഉഭയകക്ഷി ചർച്ചകളിലൂടെ പരിഹരിക്കണമെന്നതാണ് ഇന്ത്യയുടെ ഔദ്യോഗിക പ്രതികരണം. വർഷങ്ങളായി തുടരുന്ന അതിർത്തി തർക്കത്തിൽ പുതിയ രാഷ്ട്രീയ ചർച്ചകൾക്കും നയതന്ത്ര നീക്കങ്ങൾക്കും ഈ പ്രസ്താവന വഴിവെക്കുമെന്നാണ് വിലയിരുത്തൽ.