കൊച്ചി | മേയ് 26

ൽ എൻഫോഴ്‌സ്‌മെന്റ് ഡയറക്ടറേറ്റിന് അന്വേഷണം തുടരാമെന്ന് ഹൈക്കോടതി. സിഎംആർഎൽ കമ്പനിയും അതിലെ ഉദ്യോഗസ്ഥരും നൽകിയ ഹർജികളാണ് കോടതി തള്ളിയത്. ഇതോടെ കേസിൽ ഇഡിക്ക് കൂടുതൽ ശക്തമായി മുന്നോട്ട് പോകാൻ വഴിയൊരുങ്ങി.

സിഎംആർഎൽ കമ്പനിക്കെതിരായ ഇഡി അന്വേഷണം റദ്ദാക്കണമെന്നായിരുന്നു ഹർജിക്കാരുടെ ആവശ്യം. എന്നാൽ അന്വേഷണത്തിൽ ഈ ഘട്ടത്തിൽ ഇടപെടാനാവില്ലെന്ന് ഹൈക്കോടതി വ്യക്തമാക്കി. ഇതോടെ നേരത്തെ ചില ഉദ്യോഗസ്ഥർക്കെതിരായ കടുത്ത നടപടികൾക്ക് ഉണ്ടായിരുന്ന തടസവും നീങ്ങും.

സിഎംആർഎൽ മാനേജിംഗ് ഡയറക്ടർ ശശിധരൻ കർത്ത, ചീഫ് ഫിനാൻഷ്യൽ ഓഫീസർ കെ എസ് സുരേഷ് കുമാർ, സീനിയർ മാനേജർ എൻ സി ചന്ദ്രശേഖരൻ, സീനിയർ ഓഫീസർ അഞ്ജു റേച്ചൽ കുരുവിള എന്നിവരാണ് ഇഡി സമൻ റദ്ദാക്കണമെന്നാവശ്യപ്പെട്ട് കോടതിയെ സമീപിച്ചിരുന്നത്. എന്നാൽ കോടതി ഇവരുടെ ആവശ്യം അംഗീകരിച്ചില്ല.

വീണ വിജയനെ അടുത്ത ദിവസങ്ങളിൽ വീണ്ടും ചോദ്യം ചെയ്യാനിടയുണ്ടെന്നാണ് സൂചന. സിഎംആർഎൽ ഉദ്യോഗസ്ഥർക്കും വീണ്ടും സമൻസ് നൽകാനാണ് സാധ്യത. അടുത്ത സമൻസ് നൽകാൻ രണ്ടാഴ്ചത്തെ സമയം വേണമെന്ന കമ്പനിയുടെ ആവശ്യവും കോടതി തള്ളി.

ഇല്ലാത്ത സേവനത്തിന് പണം നൽകിയെന്ന ആരോപണമാണ് കേസിന്റെ കേന്ദ്ര വിഷയം. എക്സാലോജിക് സൊല്യൂഷൻസ് എന്ന കമ്പനിക്ക് സേവനം ഒന്നും ലഭിക്കാതെയാണ് ഏകദേശം 1.72 കോടി രൂപ നൽകിയതെന്നാണ് കണ്ടെത്തൽ. ആദ്യം സീരിയസ് ഫ്രോഡ് ഇൻവെസ്റ്റിഗേഷൻ ഓഫീസ് അന്വേഷണം ആരംഭിച്ചു. അതിന് പിന്നാലെയാണ് കള്ളപ്പണം വെളുപ്പിക്കൽ സാധ്യത പരിശോധിച്ച് ഇഡിയും അന്വേഷണം തുടങ്ങിയത്.

കോടതിയുടെ പുതിയ ഉത്തരവ് രാഷ്ട്രീയ തലത്തിലും വലിയ ചർച്ചയ്ക്കാണ് വഴിവെച്ചിരിക്കുന്നത്. അന്വേഷണം തുടരാമെന്ന് കോടതി വ്യക്തമാക്കിയതോടെ കേസിന്റെ ഗൗരവം ഇപ്പോഴും നിലനിൽക്കുന്നതായാണ് വിലയിരുത്തൽ. അതേസമയം അന്വേഷണം തുടരുന്നു എന്നത് മാത്രം കുറ്റം തെളിഞ്ഞുവെന്നർഥമല്ലെന്നും നിയമ വിദഗ്ധർ ചൂണ്ടിക്കാട്ടുന്നു.