സെക്രട്ടേറിയറ്റിനു മുന്നിൽ ആശാ വർക്കർമാരുടെ വിജയസംഗമം

തിരുവനന്തപുരം, 22 മേയ് 2026:

ആശാ വർക്കർമാരുടെ ഓണറേറിയം 3000 രൂപ ഉയർത്തിയ സർക്കാർ നടപടിയിൽ ആഹ്ളദം പ്രകടിപ്പിച്ച് സെക്രട്ടേറിയറ്റിനു മുന്നിൽ ആശാ കേരളം വിജയസംഗമം നടത്തി. ദീർഘകാല സമരത്തിന്‍റെ ഫലമായാണ് ഇപ്പോഴത്തെ വർധന എന്ന് ആശാ വർക്കർമാർ പറഞ്ഞു.

സമരത്തിന്‍റെ ഫലമായി 5000 രൂപ വർധന

വി. ഡി. സതീശൻ സർക്കാരിന്‍റെ ആദ്യ മന്ത്രിസഭയിൽതന്നെ 3000 രൂപ ഉയർത്തിയതോടെ, മുൻപുണ്ടായ വർധന കൂടി ചേർത്ത് ആശാ വർക്കർമാർ നേടിയത് മൊത്തം 5000 രൂപയുടെ വർധനയാണ്. ഇതിനെ വിജയമായി കാണ്ടാണ് ആശാ വർക്കർമാർ വിജയസംഗമം നടത്തിയത്.

സമര പ്രവർത്തകർക്കും പിന്തുണ നൽകിയ ജനങ്ങൾക്കും പായസം വിതരണം ചെയ്തു. സമരത്തിൽ വോളണ്ടിയേഴ്സായി പ്രവർത്തിച്ചവരെ പൊന്നാട അണിയിച്ച് ആദരിക്കുകയും ചെയ്തു.

പ്രേംകുമാർ ഉദ്ഘാടനം നിർവഹിച്ചു

ആശാ സമരത്തെ പിന്തുണച്ചതിന്‍റെ പേരിൽ ചലച്ചിത്ര അക്കാദമി അധ്യക്ഷ സ്ഥാനം നഷ്ടമായ ചലച്ചിത്ര താരം പ്രേംകുമാർ പരിപാടി ഉദ്ഘാടനം ചെയ്തു. സമരത്തിന്‍റെ ന്യായത്തിന് ഒപ്പം നിന്ന എല്ലാവർക്കും ആശാ വർക്കർമാർ നന്ദി അറിയിച്ചു.

നേതാക്കളും സാമൂഹിക പ്രവർത്തകരും പങ്കെടുത്തു

കേരള ആശ ഹെൽത്ത് വർക്ക് അസോസിയേഷൻ സംസ്ഥാന പ്രസിഡന്‍റ് വി. കെ. സദാനന്ദൻ അധ്യക്ഷത വഹിച്ച യോഗത്തിൽ ജനറൽ സെക്രട്ടറി എം. എ. ബിന്ദു, എസ്. മിനി, കെ. പി. റോസമ്മ, കൊടിക്കുന്നിൽ സുരേഷ് എംപി, എൻ. കെ. പ്രേമചന്ദ്രൻ എംപി ഉൾപ്പെടെ രാഷ്ട്രീയ-സാമൂഹിക രംഗത്തെ നിരവധി പേർ പങ്കെടുത്തു.

ദീർഘസമരത്തിന്‍റെ വിജയമായി വിലയിരുത്തൽ

കൂലി വർധന ആവശ്യപ്പെട്ടു ആശാ വർക്കർ ദീർഘകാലമായി സമരം നടത്തിവരുന്നു. സർക്കാർ വാഗ്ദാനം നടപ്പാക്കിയത് സമരത്തിന്‍റെ വിജയമാണെന്നാണ് സംഘടനകൾ പറയുന്നത്. ഇനി മറ്റ് ആനുകൂല്യങ്ങളുടെ കാര്യത്തിലും സർക്കാർ നടപടി ഉണ്ടാകുമെന്ന പ്രതീക്ഷയും ആശാ വർക്കർ പങ്കുവെച്ചു.