തിരുവനന്തപുരം: പ്രതിദിനം ആറു കോടിയോളം രൂപ കൈകാര്യം ചെയ്യുന്ന കെ.എസ്.ആര്.ടി.സിയില് പ്രത്യേക അക്കൗണ്ട്സ് വിഭാഗം രൂപവത്കരിക്കും. 2022 ജനുവരി 13നു കോര്പ്പറേഷനും അംഗീകൃത സംഘടനാ പ്രതിനിധികളും ഒപ്പുവച്ച സേവന-വേതന കരാര് പ്രകാരമാണ് പ്രത്യേക അക്കൗണ്ട്സ് വിഭാഗം രൂപവത്കരിക്കുന്നത്.
അക്കൗണ്ട്സ്, ബുക്ക് കീപ്പിങ് എന്നിവയില് യോഗ്യതയുള്ളവരെ നിയോഗിക്കാനോ ദിന-മാസ കണക്കുകള് യഥാസമയം അക്കൗണ്ട്സ്, ഡബിള് എന്ട്രി ബുക്ക് കീപ്പിങ് തത്വങ്ങള് അനുസരിച്ച് കൃത്യമായ കണക്കുകള് രേഖപ്പെടുത്തുന്നതിനോ ഓരോ ബസിന്റെയും യൂണിറ്റിന്റെയും കണക്കു വിശകലനം ചെയ്യുന്നതിനോ പ്രത്യേക അക്കൗണ്ട്സ് വിഭാഗം ഇല്ലായിരുന്നു. ഇതു കാരണം 2017-18 വര്ഷം വരെമാത്രമേ ഓഡിറ്റ് പൂര്ത്തീകരിച്ചിട്ടുള്ളൂ. ദിവസേന യൂണിറ്റുകളില്നിന്നു ശേഖരിക്കുന്ന കണക്കുകളില് വലിയ വ്യത്യാസമാണ് കണ്ടുവന്നിരുന്നത്. പ്രത്യേക അക്കൗണ്ട്സ് വിഭാഗത്തിലേക്കുള്ള നിമയനങ്ങള് നിലവില് താല്ക്കാലികമായിരിക്കും. അടുത്ത ഏപ്രിലില് നിശ്ചിത യോഗ്യതയുള്ളവരെ ഉള്പ്പെടുത്തി പുതിയ കേഡര് വിഭാഗത്തിനു രൂപം നല്കി സ്ഥിരം വിഭാഗമാക്കി മാറ്റും.
