ഗോവ, 2026 നവംബർ 07 

ഗോവയിൽ നടക്കുന്ന 2026ലെ ഇന്ത്യ അന്താരാഷ്ട്ര ചലച്ചിത്രമേളയുടെ ഭാഗമായ വേവ്സ് ബസാറിൽ പങ്കെടുക്കാൻ സിനിമാ സാങ്കേതികവിദ്യാ മേഖലയിലെ സ്റ്റാർട്ടപ്പുകളിൽനിന്ന് കേന്ദ്ര വാർത്താവിതരണ പ്രക്ഷേപണ മന്ത്രാലയം അപേക്ഷ ക്ഷണിച്ചു. വേവ്എക്സ് സ്റ്റാർട്ടപ്പ് പവിലിയനിലെ പോഡുകൾ ബുക്ക് ചെയ്യാനുള്ള അവസരമാണ് തുറന്നിരിക്കുന്നത്. സിനിമയിലും അനുബന്ധ മേഖലകളിലും പ്രവർത്തിക്കുന്ന പുതിയ സംരംഭങ്ങൾക്ക് തങ്ങളുടെ ഉൽപ്പന്നങ്ങളും സാങ്കേതികവിദ്യകളും അവതരിപ്പിക്കാം.

ആഗോള സിനിമാ മേഖലയുമായി ബന്ധം സ്ഥാപിക്കാം

പുതുമയുള്ള ഉൽപ്പന്നങ്ങളും സാങ്കേതികവിദ്യകളും വിവിധ ആവശ്യങ്ങൾക്കുള്ള പരിഹാരങ്ങളും ദേശീയ, അന്തർദേശീയ സിനിമാ മാധ്യമ മേഖലയ്ക്ക് മുന്നിൽ അവതരിപ്പിക്കാൻ പ്രത്യേക വേദിയൊരുക്കുകയാണ് പദ്ധതിയുടെ ലക്ഷ്യം. വേവ്എക്സ് ബൂത്തുകളിലൂടെ വളർന്നുവരുന്ന സംരംഭങ്ങൾക്ക് ആഗോള ശ്രദ്ധ നേടാനും അവസരമൊരുങ്ങും. ചലച്ചിത്ര പ്രവർത്തകർ, നിർമാണ കമ്പനികൾ, നിക്ഷേപകർ എന്നിവരുമായി പരിചയപ്പെടാനും ആശയങ്ങൾ കൈമാറാനും സഹകരണ സാധ്യതകൾ കണ്ടെത്താനും സ്റ്റാർട്ടപ്പുകൾക്ക് കഴിയും.

അപേക്ഷിക്കാൻ വ്യവസായ പ്രോത്സാഹന വകുപ്പിന്റെ രജിസ്ട്രേഷൻ വേണം

സിനിമയിലും അനുബന്ധ സാങ്കേതികവിദ്യാ മേഖലകളിലും പ്രവർത്തിക്കുന്ന, കേന്ദ്ര വ്യവസായ ആഭ്യന്തര വ്യാപാര പ്രോത്സാഹന വകുപ്പിൽ രജിസ്റ്റർ ചെയ്ത സ്റ്റാർട്ടപ്പുകൾക്കാണ് അപേക്ഷിക്കാനാകുക. വേവ്എക്സ് രൂപീകരിക്കുന്ന തിരഞ്ഞെടുപ്പ് സമിതി അപേക്ഷകൾ പരിശോധിച്ച് വിലയിരുത്തും. ഇതിന്റെ അടിസ്ഥാനത്തിലായിരിക്കും അർഹരായ സംരംഭങ്ങളെ തിരഞ്ഞെടുക്കുക. രാജ്യാന്തര വേദിയിൽ തങ്ങളുടെ പുതുമകൾ അവതരിപ്പിക്കാനുള്ള അവസരം പ്രയോജനപ്പെടുത്താൻ താൽപ്പര്യമുള്ള അർഹരായ സ്റ്റാർട്ടപ്പുകളോട് മന്ത്രാലയം അഭ്യർഥിച്ചു. രജിസ്ട്രേഷൻ ഫോമും കൂടുതൽ വിവരങ്ങളും വേവ്എക്സിന്റെ വേവ്സ് ബസാർ വെബ്സൈറ്റിൽ ലഭ്യമാണ്. സംശയങ്ങൾ വേവ്എക്സിന്റെ ഔദ്യോഗിക ഇമെയിലിലൂടെ അറിയിക്കാം.

ലോക സിനിമയെ ഒരുമിപ്പിക്കുന്ന ഗോവ ചലച്ചിത്രമേള

1952ൽ ആരംഭിച്ച ഇന്ത്യ അന്താരാഷ്ട്ര ചലച്ചിത്രമേള ഏഷ്യയിലെ പ്രധാന ചലച്ചിത്രമേളകളിലൊന്നാണ്. ലോക സിനിമയിലെ മികച്ച സൃഷ്ടികളെ ആദരിക്കുന്ന മേള ഇന്ത്യയിലെയും വിദേശത്തെയും സംവിധായകർ, കലാകാരന്മാർ, നിർമാതാക്കൾ, സിനിമാപ്രേമികൾ എന്നിവർക്ക് വേദിയൊരുക്കുന്നു. എല്ലാ വർഷവും ഗോവയിൽ നടക്കുന്ന മേളയിൽ വൈവിധ്യമാർന്ന സിനിമകൾ പ്രദർശിപ്പിക്കുന്നു. സൃഷ്ടിപരമായ ആശയവിനിമയവും സിനിമാ മേഖലയിലെ രാജ്യാന്തര സഹകരണവും പ്രോത്സാഹിപ്പിക്കുന്നതും മേളയുടെ ലക്ഷ്യമാണ്.

മാധ്യമ വിനോദ മേഖലയിലെ പുതുസംരംഭങ്ങൾക്ക് വേവ്എക്സ് പിന്തുണ

കേന്ദ്ര വാർത്താവിതരണ പ്രക്ഷേപണ മന്ത്രാലയത്തിന്റെ സ്റ്റാർട്ടപ്പ് വളർച്ചാ പരിശീലന പദ്ധതിയാണ് വേവ്എക്സ് അഥവാ വേവ്സ് സ്റ്റാർട്ടപ്പ് ആക്സിലറേറ്റർ. മാധ്യമ വിനോദ മേഖലയിലെ പുതുമകൾക്കും സംരംഭകത്വത്തിനും വളർന്നുവരുന്ന പ്രതിഭകൾക്കും പിന്തുണ നൽകുകയാണ് ലക്ഷ്യം. അനിമേഷൻ, ദൃശ്യപ്രഭാവങ്ങൾ, ഗെയിമിങ്, കോമിക്സ്, വിപുലീകൃത യാഥാർഥ്യ സാങ്കേതികവിദ്യ, മാധ്യമ സാങ്കേതികവിദ്യ തുടങ്ങിയ മേഖലകളിലെ സ്റ്റാർട്ടപ്പുകൾക്കാണ് പദ്ധതി പ്രധാനമായും സഹായം നൽകുന്നത്.