സെബു,  / 2026  / ഒക്ടോബർ 29

ഭീകരവാദത്തെ നേരിടുന്നതിൽ നേടിയ അനുഭവം പങ്കാളി രാജ്യങ്ങളുമായി പങ്കിടാൻ ഇന്ത്യ തയ്യാറാണെന്ന് പ്രതിരോധമന്ത്രി രാജ്‌നാഥ് സിങ്. ഫിലിപ്പീൻസിലെ സെബുവിൽ വ്യാഴാഴ്ച നടന്ന പതിമൂന്നാമത് ആസിയാൻ പ്രതിരോധമന്ത്രിമാരുടെയും പങ്കാളി രാജ്യങ്ങളുടെയും യോഗത്തിലാണ് അദ്ദേഹം നിലപാട് വ്യക്തമാക്കിയത്. മേഖലയുടെ കൂട്ടായ സുരക്ഷയ്ക്കും എല്ലാത്തരം ഭീകരവാദവും ഇല്ലാതാക്കുന്നതിനും ഇന്ത്യ പ്രതിജ്ഞാബദ്ധമാണെന്നും അദ്ദേഹം പറഞ്ഞു.

സംയുക്ത പരിശീലനവും രഹസ്യവിവര കൈമാറ്റവും

ഭീകരവാദത്തിന് അതിർത്തികളില്ലെന്നും അതിനെ നേരിടാൻ രാജ്യങ്ങൾ ഒരുമിക്കണമെന്നും രാജ്‌നാഥ് സിങ് ആവശ്യപ്പെട്ടു. പതിറ്റാണ്ടുകളായി അതിർത്തികടന്നുള്ള സുരക്ഷാഭീഷണികളെ നേരിട്ടാണ് ഇന്ത്യ അനുഭവം നേടിയതെന്ന് അദ്ദേഹം പറഞ്ഞു. സംയുക്ത സൈനികാഭ്യാസങ്ങൾ, പരിശീലന പരിപാടികൾ, ശക്തമായ രഹസ്യവിവര കൈമാറ്റം എന്നിവയിലൂടെ പങ്കാളി രാജ്യങ്ങളുടെ ശേഷി വർധിപ്പിക്കാനാണ് ഇന്ത്യയുടെ സന്നദ്ധത. ഭീകരകേന്ദ്രങ്ങൾ തകർക്കുകയും ഭരണകൂടങ്ങളുടെ പിന്തുണയോടെയുള്ള ഭീകരവാദത്തിനെതിരായ ഉറച്ച നിലപാട് വ്യക്തമാക്കുകയും ചെയ്ത നടപടിയായിരുന്നു ഓപ്പറേഷൻ സിന്ദൂരെന്നും അദ്ദേഹം അവകാശപ്പെട്ടു. കടലിലൂടെയും വ്യോമമാർഗവുമുള്ള സഞ്ചാരസ്വാതന്ത്ര്യത്തിന് ഇന്ത്യ നൽകുന്ന പിന്തുണ ഏതെങ്കിലും രാജ്യത്തിനെതിരെയല്ലെന്നും മേഖലയിലെ എല്ലാവരുടെയും പൊതുതാൽപര്യം സംരക്ഷിക്കാനാണെന്നും മന്ത്രി വിശദീകരിച്ചു.

യുവാക്കളെ ബന്ധിപ്പിക്കാൻ പ്രതിരോധ യുവസേതു

ആസിയാൻ പ്രതിരോധ സഹകരണ സംവിധാനത്തിലെ ഭീകരവിരുദ്ധ വിദഗ്ധസമിതിക്ക് 2024 മുതൽ 2027 വരെ ഇന്ത്യയും മലേഷ്യയും സംയുക്തമായാണ് നേതൃത്വം നൽകുന്നത്. 2026 ആസിയാൻ–ഇന്ത്യ സമുദ്രസഹകരണ വർഷമായി ആചരിക്കുന്നതും രണ്ടാമത് സംയുക്ത നാവികാഭ്യാസം നടത്തുന്നതും രാജ്‌നാഥ് സിങ് ചൂണ്ടിക്കാട്ടി. 2008 മുതൽ ഏദൻ ഉൾക്കടലിൽ ഇന്ത്യൻ നാവികസേന തുടർച്ചയായി സുരക്ഷാദൗത്യങ്ങൾ നടത്തുന്നുണ്ടെന്നും അദ്ദേഹം പറഞ്ഞു. സഹകരണം കൂടുതൽ ശക്തമാക്കാൻ പ്രതിരോധ ‘യുവസേതു’ രൂപീകരിക്കാനും മന്ത്രി നിർദേശിച്ചു. യുവാക്കൾ തമ്മിലുള്ള ബന്ധം, ഡിജിറ്റൽ നവീകരണം, പരിശീലനം എന്നിവ പ്രോത്സാഹിപ്പിക്കുകയാണ് ലക്ഷ്യം. സമാധാനവും സുരക്ഷയുമുള്ള ഇന്തോ–പസഫിക് മേഖല കെട്ടിപ്പടുക്കുന്നതിൽ യുവാക്കൾക്ക് കൂടുതൽ അവസരങ്ങൾ നൽകണമെന്നും അദ്ദേഹം ആവശ്യപ്പെട്ടു.