കോഴിക്കോട്: കരിപ്പൂർ വിമാനത്താവളത്തിൽ എട്ടുമാസം പ്രായമുള്ള കുഞ്ഞിന്റെ ഡയപ്പറിൽ ഒളിപ്പിച്ച് സ്വർണം കടത്താൻ ശ്രമിച്ച സംഭവത്തിൽ കൂടുതൽ വിവരങ്ങൾ പുറത്ത്. കുഞ്ഞിന്റെ അമ്മ നാല് ദിവസം മുൻപ് നെടുമ്പാശ്ശേരി വിമാനത്താവളത്തിൽ 1.78 കിലോ സ്വർണവുമായി പിടിയിലായിരുന്നുവെന്നാണ് വിവരം. ഏകദേശം രണ്ട് കോടി രൂപ വിലമതിക്കുന്ന സ്വർണമാണ് യുവതിയിൽ നിന്ന് പിടിച്ചെടുത്തത്.

ഭർത്താവിന്റെ യാത്ര നിരീക്ഷിച്ച് അന്വേഷണം

28കാരിയായ യുവതി സ്വർണം ഒളിപ്പിച്ച് കടത്താൻ ശ്രമിച്ച കേസിൽ പിടിയിലായതിന് പിന്നാലെ ഡിആർഐ നടത്തിയ ചോദ്യം ചെയ്യലിലാണ് ഭർത്താവിനെക്കുറിച്ചുള്ള വിവരം ലഭിച്ചത്. പൊന്നാനി സ്വദേശിയായ ഭർത്താവാണ് സ്വർണം ഒളിപ്പിച്ച് യാത്രയാക്കിയതെന്ന് യുവതി മൊഴി നൽകിയെന്നാണ് വിവരം. തുടർന്ന് ഭർത്താവിന്റെ യാത്രകൾ ഡിആർഐ നിരീക്ഷിച്ചുവരികയായിരുന്നു.

റാസൽഖൈമയിൽ നിന്ന് ചൊവ്വാഴ്ച രാത്രി മൂന്ന് മക്കളോടൊപ്പം കരിപ്പൂരിലെത്തിയപ്പോഴാണ് ഇയാൾ പിടിയിലായത്. എട്ടുമാസം പ്രായമുള്ള കുഞ്ഞിന്റെ ഡയപ്പറിൽ ഒളിപ്പിച്ച നിലയിലാണ് സ്വർണം കണ്ടെത്തിയത്. ഏകദേശം ഒരുകോടി രൂപ വിലമതിക്കുന്ന സ്വർണമാണ് പിടികൂടിയത്. തുടർന്നുള്ള പരിശോധനയിൽ ഇയാളുടെ ശരീരത്തിൽ ഒളിപ്പിച്ചിരുന്ന സ്വർണമിശ്രിതവും കണ്ടെത്തി.

കുടുംബത്തെ ഉപയോഗിച്ചുള്ള സ്വർണക്കടത്ത്

അമ്മ പിടിയിലായതിന് പിന്നാലെ ഭർത്താവിന്റെ യാത്ര നിരീക്ഷിച്ചതിലൂടെയാണ് കരിപ്പൂരിലെ സ്വർണക്കടത്ത് കണ്ടെത്തിയതെന്നാണ് വിവരം. കുഞ്ഞിനെയും മറ്റ് രണ്ട് മക്കളെയും ഒപ്പം കൂട്ടിയാണ് ഇയാൾ യാത്ര ചെയ്തിരുന്നത്. സംഭവത്തിൽ ഡിആർഐ അന്വേഷണം തുടരുകയാണ്.

ഓഗസ്റ്റിലും വൻ സ്വർണവേട്ട

കേരളത്തിലെ വിമാനത്താവളങ്ങളിൽ ഓഗസ്റ്റ് മാസത്തിലും വ്യാപകമായി സ്വർണം പിടികൂടിയിരുന്നു. ഓഗസ്റ്റ് ആദ്യവാരം മാത്രം വിവിധ വിമാനത്താവളങ്ങളിൽ നിന്ന് കസ്റ്റംസ് 11 കോടിയിലധികം രൂപ വിലമതിക്കുന്ന എട്ട് കിലോയോളം സ്വർണം പിടിച്ചെടുത്തിരുന്നു. 14 കേസുകളിലായി ആറ് മലയാളികൾ ഉൾപ്പെടെ ഒമ്പത് പേരെ അറസ്റ്റ് ചെയ്തതായാണ് കണക്കുകൾ.