ന്യൂഡൽഹി  / 2026 / ഓഗസ്റ്റ് 28 

സുരക്ഷയ്ക്ക് ഒന്നാം പരിഗണന നൽകി ആണവോർജത്തെ രാജ്യത്തിന്റെ വികസനത്തിന്റെ പ്രധാന തൂണായി കൂടുതൽ വ്യാപിപ്പിക്കുകയാണ് ഇന്ത്യ. വീടുകൾക്കും വ്യവസായങ്ങൾക്കും കുറഞ്ഞ കാർബൺ പുറന്തള്ളലുള്ള വിശ്വസനീയ വൈദ്യുതി നൽകുന്നതിനൊപ്പം ആരോഗ്യസംരക്ഷണം, കൃഷി, ഭക്ഷ്യസംരക്ഷണം, വ്യവസായം, ജലശുദ്ധീകരണം, ശാസ്ത്രഗവേഷണം, സെമികണ്ടക്ടർ മേഖല, ഗ്രീൻ ഹൈഡ്രജൻ എന്നിവയിലും ആണവ സാങ്കേതികവിദ്യ ഉപയോഗിക്കുന്നതായി പി.ഐ.ബി പശ്ചാത്തല രേഖ വ്യക്തമാക്കുന്നു. 1969ൽ താരാപൂർ ആണവ വൈദ്യുത നിലയം പ്രവർത്തനം തുടങ്ങിയതോടെയാണ് ഇന്ത്യയുടെ ആണവോർജ യാത്രയ്ക്ക് തുടക്കമായത്. നിലവിൽ ഏഴ് കേന്ദ്രങ്ങളിലായി 24 ആണവ റിയാക്ടറുകൾ പ്രവർത്തിക്കുന്നുണ്ട്. ഇവയുടെ ആകെ സ്ഥാപിത ശേഷി 8.78 ജിഗാവാട്ടാണ്. ഒൻപത് റിയാക്ടറുകളുടെ നിർമാണം പുരോഗമിക്കുകയാണ്. പത്ത് യൂണിറ്റുകൾക്കായുള്ള തയ്യാറെടുപ്പുകളും നടക്കുന്നു. വികസിത ഭാരതത്തിനായുള്ള ആണവോർജ ദൗത്യത്തിലൂടെ 2047ഓടെ 100 ജിഗാവാട്ട് ആണവ വൈദ്യുതി ശേഷിയിലെത്തുകയാണ് ലക്ഷ്യം. 2025–26 കേന്ദ്ര ബജറ്റിൽ തദ്ദേശീയ ചെറു മോഡുലാർ റിയാക്ടറുകൾക്കായി 20,000 കോടി രൂപ വകയിരുത്തിയിട്ടുണ്ട്. 2025ലെ ശാന്തി നിയമം സുരക്ഷിതവും ഭാവിക്ക് അനുയോജ്യവുമായ ആണവോർജ വികസനത്തിനുള്ള സംവിധാനവും ശക്തിപ്പെടുത്തുന്നു.

കുറഞ്ഞ കാർബൺ വൈദ്യുതി മുതൽ ചികിത്സ വരെ

സ്ഥാപിത ശേഷിയുടെ അടിസ്ഥാനത്തിൽ ഇന്ത്യയിലെ ഏറ്റവും കാർബൺ കാര്യക്ഷമമായ ശുദ്ധ ഊർജ സ്രോതസ്സാണ് ആണവ വൈദ്യുതിയെന്നാണ് രേഖ പറയുന്നത്. 2025–26 സാമ്പത്തിക വർഷത്തിൽ ഒരു ജിഗാവാട്ട് ആണവ വൈദ്യുതി ശേഷി ഏകദേശം 54 ലക്ഷം ടൺ കാർബൺ ഡൈഓക്സൈഡ് തുല്യ പുറന്തള്ളൽ ഒഴിവാക്കി. ജലവൈദ്യുതിക്ക് ഇത് 27 ലക്ഷം ടൺ, കാറ്റാടി വൈദ്യുതിക്ക് 16 ലക്ഷം ടൺ, സൗരോർജത്തിന് ഒൻപത് ലക്ഷം ടൺ എന്നിങ്ങനെയാണ്. 1969 മുതൽ ഇന്ത്യയുടെ ആണവ വൈദ്യുതി പദ്ധതി മൊത്തത്തിൽ 85.1 കോടി ടൺ കാർബൺ ഡൈഓക്സൈഡ് തുല്യ പുറന്തള്ളൽ ഒഴിവാക്കിയതായി കണക്കാക്കുന്നു. ഇത് 3,800 കോടിയിലധികം വളർച്ചയെത്തിയ മരങ്ങൾ ഒരു വർഷം ആഗിരണം ചെയ്യുന്ന കാർബണിന് തുല്യമാണെന്നും രേഖ പറയുന്നു.

വൈദ്യുതിക്ക് പുറമെ ആരോഗ്യരംഗത്തും ആണവ സാങ്കേതികവിദ്യയ്ക്ക് വലിയ പങ്കുണ്ട്. ഭാഭാ ആണവ ഗവേഷണ കേന്ദ്രം, ഇന്ദിരാഗാന്ധി ആണവ ഗവേഷണ കേന്ദ്രം, ടാറ്റ മെമ്മോറിയൽ സെന്റർ, ടാറ്റ ഇൻസ്റ്റിറ്റ്യൂട്ട് ഓഫ് ഫണ്ടമെന്റൽ റിസർച്ച്, ഹരീഷ് ചന്ദ്ര റിസർച്ച് ഇൻസ്റ്റിറ്റ്യൂട്ട് തുടങ്ങിയ ആണവോർജ വകുപ്പിന് കീഴിലുള്ള സ്ഥാപനങ്ങൾ തദ്ദേശീയ റേഡിയോഫാർമസ്യൂട്ടിക്കൽ മരുന്നുകൾ, പുരോഗമിച്ച രോഗചിത്രീകരണ സംവിധാനം, പുതിയ കാൻസർ ചികിത്സകൾ എന്നിവ വികസിപ്പിക്കുന്നു. രോഗം നേരത്തെ കണ്ടെത്താനും കൃത്യമായ കാൻസർ ചികിത്സയ്ക്കും വൈദ്യശാസ്ത്ര ഗവേഷണത്തിനും ഈ സാങ്കേതികവിദ്യ ഉപയോഗിക്കുന്നു.

കുറഞ്ഞ ചെലവിൽ കാൻസർ ചികിത്സ കൂടുതൽ ആളുകളിലെത്തിക്കാനും സർക്കാർ ശ്രമിക്കുന്നു. 2025ൽ മുസഫർപൂരിൽ 150 കിടക്കകളുള്ള ഹോമി ഭാഭാ കാൻസർ ആശുപത്രിയും ഗവേഷണ കേന്ദ്രവും ഉദ്ഘാടനം ചെയ്തു. 2024–25 സാമ്പത്തിക വർഷത്തിൽ ടാറ്റ മെമ്മോറിയൽ സെന്ററിൽ 1.3 ലക്ഷം രോഗികൾ രജിസ്റ്റർ ചെയ്തു. വായ്, സ്തന, ഗർഭാശയമുഖ കാൻസറുകൾ കണ്ടെത്തുന്നതിനായി ഏകദേശം അഞ്ച് ലക്ഷം സ്ത്രീകളെ പരിശോധിച്ചു. തദ്ദേശീയ റേഡിയേഷൻ സാങ്കേതികവിദ്യ ഉപയോഗിച്ച് 1.53 കോടി മെഡിക്കൽ ഉപകരണങ്ങൾ അണുവിമുക്തമാക്കി. ഇതിലൂടെ രോഗികളുടെ സുരക്ഷ മെച്ചപ്പെടുത്താനും ആശുപത്രികളുമായി ബന്ധപ്പെട്ട അണുബാധ കുറയ്ക്കാനും കഴിഞ്ഞതായി രേഖ വ്യക്തമാക്കുന്നു.

കൃഷി, ഭക്ഷ്യസംരക്ഷണം, അപൂർവ ധാതുക്കൾ

റേഡിയേഷൻ ഉപയോഗിച്ച് ജനിതക വ്യതിയാനം സൃഷ്ടിക്കുകയും സങ്കരയിന വികസനവുമായി ചേർത്തുപയോഗിക്കുകയും ചെയ്താണ് മെച്ചപ്പെട്ട വിളയിനങ്ങൾ വികസിപ്പിക്കുന്നത്. കൂടുതൽ വിളവ്, വലിയ വിത്ത്, മികച്ച ഗുണനിലവാരം, നേരത്തെ പാകമാകൽ, വരൾച്ച, ചൂട്, ഉപ്പുരസം, രോഗങ്ങൾ എന്നിവയെ നേരിടാനുള്ള കഴിവ് തുടങ്ങിയ സവിശേഷതകളുള്ള ഇനങ്ങളാണ് വികസിപ്പിക്കുന്നത്. ഭക്ഷ്യധാന്യങ്ങളുടെയും കാർഷിക ഉൽപന്നങ്ങളുടെയും സംഭരണകാലം കൂട്ടാനും വിളവെടുപ്പിന് ശേഷമുള്ള നഷ്ടം കുറയ്ക്കാനും രാസവസ്തുക്കളില്ലാതെ ധാന്യങ്ങളും സുഗന്ധവ്യഞ്ജനങ്ങളും സംരക്ഷിക്കാനും കയറ്റുമതിക്കുള്ള അന്താരാഷ്ട്ര സസ്യാരോഗ്യ മാനദണ്ഡങ്ങൾ പാലിക്കാനും റേഡിയേഷൻ സാങ്കേതികവിദ്യ പ്രോത്സാഹിപ്പിക്കുന്നു.

ഭാഭാ ആണവ ഗവേഷണ കേന്ദ്രം ഇതുവരെ 70 വിളയിനങ്ങൾ വികസിപ്പിച്ചിട്ടുണ്ട്. 2025ൽ പുറത്തിറക്കിയ ടി.ബി.എം.-9 വാഴയും ആർ.ടി.എസ്.-43 ചോളവും ഇതിൽ ഉൾപ്പെടുന്നു. കൂടുതൽ വിളവും നേരത്തെ പാകമാകുന്ന സ്വഭാവവുമുള്ള ഈ ഇനങ്ങൾ രാജ്യത്തിന്റെ വിവിധ ഭാഗങ്ങളിൽ കൃഷി ചെയ്യുന്നു. ഇന്ത്യൻ കാർഷിക ഗവേഷണ കൗൺസിലുമായും കാർഷിക സർവകലാശാലകളുമായും ചേർന്ന് വിള മെച്ചപ്പെടുത്തലും ഭക്ഷ്യസുരക്ഷയും ശക്തിപ്പെടുത്തുകയാണ് ഭാഭാ ആണവ ഗവേഷണ കേന്ദ്രം.

കാർഷിക ഉൽപന്നങ്ങൾ, മത്സ്യം, സുഗന്ധവ്യഞ്ജനങ്ങൾ എന്നിവയുടെ സംഭരണകാലം നീട്ടാനും കേടുപാട് കുറയ്ക്കാനും റേഡിയേഷൻ ഉപയോഗിക്കുന്നു. മാങ്ങയുടെ സംഭരണകാലം കൂട്ടിയതോടെ കുറഞ്ഞ ചെലവിൽ കടൽമാർഗം കയറ്റുമതി സാധ്യമായി. ഉള്ളിയുടെയും ഉരുളക്കിഴങ്ങിന്റെയും സംഭരണകാലം കൂട്ടുന്നത് നാശനഷ്ടം കുറയ്ക്കുകയും കർഷകർക്ക് സാമ്പത്തിക നേട്ടം നൽകുകയും ചെയ്യുന്നു. വിവിധ ഭക്ഷ്യവസ്തുക്കളുടെ റേഡിയേഷൻ സംസ്കരണത്തിന് ഇന്ത്യൻ ഭക്ഷ്യസുരക്ഷാ നിലവാര അതോറിറ്റിയുടെ അംഗീകാരമുണ്ട്.

ഭക്ഷ്യ റേഡിയേഷൻ സൗകര്യങ്ങൾ വികസിപ്പിക്കാൻ 2025ൽ സർക്കാർ 17 ധാരണാപത്രങ്ങൾ ഒപ്പുവച്ചു. ആറ് ഗാമ റേഡിയേഷൻ സംസ്കരണ കേന്ദ്രങ്ങൾ കൂടി പ്രവർത്തനം ആരംഭിച്ചതോടെ രാജ്യത്തെ പ്രവർത്തനക്ഷമമായ ഇത്തരം കേന്ദ്രങ്ങളുടെ എണ്ണം 40 ആയി. പഴങ്ങൾ, പച്ചക്കറികൾ, ധാന്യങ്ങൾ, വേഗത്തിൽ നശിക്കുന്ന മറ്റ് ഉൽപന്നങ്ങൾ എന്നിവയുടെ ഗുണമേന്മ നിലനിർത്താൻ ഇവ സഹായിക്കുന്നു.

നിർണായക ധാതുക്കളുടെയും അപൂർവ ഭൂമൂലകങ്ങളുടെയും മേഖല ശക്തിപ്പെടുത്തുന്നതിനും ആണവ സാങ്കേതികവിദ്യ ഉപയോഗിക്കുന്നു. ധാതുക്കളുടെ കണ്ടെത്തൽ, സ്വഭാവനിർണയം, സംസ്കരണം എന്നിവയിൽ പുരോഗമിച്ച ആണവ വിശകലന രീതികൾ ഉപയോഗിക്കുന്നതിലൂടെ അയിരിന്റെ കൃത്യമായ വിലയിരുത്തലും ഖനന കാര്യക്ഷമതയും ഗുണനിലവാര നിയന്ത്രണവും മെച്ചപ്പെടുത്താനാകും.

അപൂർവ ഭൂമൂലകങ്ങൾക്ക് ഇന്ത്യയിലെ ആദ്യ സർട്ടിഫൈഡ് റഫറൻസ് മെറ്റീരിയലായ ഫെറോകാർബണറ്റൈറ്റ് — ഭാഭാ ബി1401 — പുറത്തിറക്കിയിട്ടുണ്ട്. ഇന്ത്യയിൽ ഇതാദ്യത്തേതും ലോകത്ത് നാലാമത്തേതുമാണിത്. ഭൂരാസ വിശകലനത്തിനുള്ള മാനദണ്ഡമായി ഇത് ഉപയോഗിക്കാം. അപൂർവ ഭൂമൂലകങ്ങളുടെ വിശ്വസനീയമായ കണ്ടെത്തൽ, കാര്യക്ഷമമായ വേർതിരിക്കൽ, സംസ്കരണ നിയന്ത്രണം എന്നിവയ്ക്കൊപ്പം രാജ്യത്തിന്റെ നിർണായക ധാതു സുരക്ഷയ്ക്കും ഇത് സഹായിക്കുമെന്ന് രേഖ പറയുന്നു.

സെമികണ്ടക്ടറും ഗ്രീൻ ഹൈഡ്രജനും

തദ്ദേശീയ ഗവേഷണവും പുരോഗമിച്ച വസ്തുക്കളുടെ വികസനവും വഴി ഇന്ത്യയുടെ സെമികണ്ടക്ടർ മേഖലയിലും ആണവ സാങ്കേതികവിദ്യ സംഭാവന ചെയ്യുന്നു. ആണവ സാങ്കേതികവിദ്യ ഉപയോഗിച്ച് നിർമ്മിക്കുന്ന ഉയർന്ന ശുദ്ധിയുള്ള ഐസോട്ടോപ്പുകളും പ്രത്യേക വസ്തുക്കളും സെമികണ്ടക്ടർ നിർമാണത്തിനും അതിസൂക്ഷ്മ നിർമ്മാണത്തിനും പുരോഗമിച്ച ഇലക്ട്രോണിക് ഉപകരണങ്ങൾക്കും തന്ത്രപ്രധാന സാങ്കേതികവിദ്യകൾക്കും ആവശ്യമാണ്.

സെമികണ്ടക്ടർ ആവശ്യങ്ങൾക്ക് 99.8 ശതമാനം ശുദ്ധിയുള്ള ഇലക്ട്രോണിക്സ് നിലവാരത്തിലുള്ള ബോറോൺ-11 സമ്പുഷ്ടീകരണ കേന്ദ്രം താൽച്ചറിൽ സ്ഥാപിച്ചു. രാജ്യത്തെ ഇത്തരത്തിലുള്ള ആദ്യ കേന്ദ്രമാണിത്. സമ്പുഷ്ടീകരിച്ച ഉൽപന്നം കൂടുതൽ സംസ്കരണത്തിനായി ശുദ്ധീകരിച്ച ബോറിക് ആസിഡാക്കി വിജയകരമായി മാറ്റിയിട്ടുണ്ട്. ഇന്ത്യ സെമികണ്ടക്ടർ ദൗത്യത്തെ ശക്തിപ്പെടുത്താനും നിർണായക ഇലക്ട്രോണിക് വസ്തുക്കളുടെ ഇറക്കുമതി ആശ്രയം കുറയ്ക്കാനും സാങ്കേതിക സ്വയംപര്യാപ്തത വർധിപ്പിക്കാനും ഇത് സഹായിക്കുമെന്നാണ് വിലയിരുത്തൽ.

ഭാവിയിലെ പ്രധാന ഊർജവാഹകമായി ഹൈഡ്രജനെ കണക്കാക്കുന്നു. വിശ്വസനീയമായ വൈദ്യുതിയും ഉയർന്ന താപനിലയിലുള്ള താപോർജവും നൽകുന്നതിനാൽ ഫോസിൽ ഇന്ധനം ഉപയോഗിക്കാതെയുള്ള ഹൈഡ്രജൻ ഉൽപാദനത്തിന് ആണവോർജം വഴിയൊരുക്കുന്നു. പരമ്പരാഗത ഹൈഡ്രജൻ ഉൽപാദനവുമായി ബന്ധപ്പെട്ട ഹരിതഗൃഹ വാതക പുറന്തള്ളലും ഇതിലൂടെ കുറയ്ക്കാം.

2026ൽ കൽപ്പാക്കത്ത് ആണവ പ്രക്രിയാ താപം ഉപയോഗിച്ചുള്ള ലോകത്തിലെ ആദ്യ ഹൈഡ്രജൻ ഉൽപാദന കേന്ദ്രം ഇന്ത്യ ഉദ്ഘാടനം ചെയ്തതായി രേഖ വ്യക്തമാക്കുന്നു. തദ്ദേശീയമായി വികസിപ്പിച്ച സാങ്കേതികവിദ്യ ശുദ്ധ ഊർജം, ഊർജസുരക്ഷ, ഇന്ത്യയുടെ നെറ്റ് സീറോ ലക്ഷ്യം, ദേശീയ ഗ്രീൻ ഹൈഡ്രജൻ ദൗത്യം എന്നിവയ്ക്ക് പിന്തുണ നൽകുന്നു. ഗവേഷണം, നവീകരണം, തദ്ദേശീയ സാങ്കേതികവിദ്യകൾ എന്നിവയിൽ തുടർന്നുള്ള നിക്ഷേപം തന്ത്രപ്രധാന മേഖലകളിൽ പുതിയ അവസരങ്ങൾ സൃഷ്ടിക്കുകയും സാമ്പത്തിക വളർച്ചയ്ക്കും ഊർജസുരക്ഷയ്ക്കും ദേശീയ വികസനത്തിനും സഹായിക്കുകയും ചെയ്യുമെന്നാണ് പശ്ചാത്തല രേഖ വ്യക്തമാക്കുന്നത്.

പലതട്ടിലുള്ള സുരക്ഷയും റേഡിയേഷൻ നിയന്ത്രണവും

ആണവ നിലയങ്ങളിലെ പ്രധാന സുരക്ഷാ ആശങ്ക ചുറ്റുപാടിലേക്കോ അന്തരീക്ഷത്തിലേക്കോ റേഡിയേഷനും റേഡിയോ ആക്ടീവ് വസ്തുക്കളും അബദ്ധത്തിൽ പുറത്തുപോകാനുള്ള സാധ്യതയാണ്. ഇതിനെ നേരിടാൻ ഇന്ത്യയിലെ ആണവ വൈദ്യുത നിലയങ്ങൾ പലതട്ടിലുള്ള സുരക്ഷാ സംവിധാനങ്ങളോടെയാണ് രൂപകൽപ്പന ചെയ്യുന്നതും നിർമിക്കുന്നതും പ്രവർത്തിപ്പിക്കുന്നതും. ജനങ്ങളെയും പരിസ്ഥിതിയെയും സംരക്ഷിക്കുകയാണ് ലക്ഷ്യം.

ലോകം അംഗീകരിച്ച ‘ഡിഫൻസ് ഇൻ ഡെപ്ത്’ എന്ന പലതട്ടിലുള്ള സുരക്ഷാ രീതിയാണ് ഇന്ത്യൻ ആണവ നിലയങ്ങൾ പിന്തുടരുന്നത്. ഉയർന്ന നിലവാരത്തിലുള്ള രൂപകൽപ്പന, നിർമാണം, കർശന ഗുണനിലവാര പരിശോധന, തകരാറുണ്ടായാലും സുരക്ഷ ഉറപ്പാക്കുന്ന എൻജിനീയറിങ് എന്നിവയിലാണ് സുരക്ഷ ആരംഭിക്കുന്നത്. തുടർച്ചയായ നിരീക്ഷണം, നിശ്ചിത ഇടവേളകളിലെ പരിശോധന, പകരം പ്രവർത്തിക്കാൻ കഴിയുന്ന സുരക്ഷാ സംവിധാനങ്ങൾ എന്നിവ ഉപകരണ തകരാറുകളും മനുഷ്യ പിഴവുകളും കണ്ടെത്താനും നിയന്ത്രിക്കാനും സഹായിക്കുന്നു.

റേഡിയോ ആക്ടീവ് വസ്തുക്കൾ പുറത്തേക്ക് എത്താതിരിക്കാനായി നിരവധി ഭൗതിക തടസ്സങ്ങളുണ്ട്. സെറാമിക് ഇന്ധന പെല്ലറ്റുകൾ, അടച്ച സിർക്കോണിയം അലോയ് ഇന്ധന ദണ്ഡുകൾ, ശക്തമായ പ്രഷർ വെസ്സൽ അല്ലെങ്കിൽ പ്രഷർ ട്യൂബുകൾ, ഉറപ്പുള്ള കോൺക്രീറ്റ് കണ്ടെയിൻമെന്റ് ഘടന എന്നിവ ഇതിൽപ്പെടുന്നു. അടിയന്തര സാഹചര്യത്തിൽ റിയാക്ടർ നിർത്താനും കോർ തണുപ്പിക്കാനും വൈദ്യുതി വിതരണം തുടരാനും സ്വതന്ത്രമായ ബാക്കപ്പ് സംവിധാനങ്ങളുമുണ്ട്. ഭൂകമ്പം, പ്രളയം, ചുഴലിക്കാറ്റ്, സുനാമി തുടങ്ങിയ ബാഹ്യ അപകടങ്ങളെ നേരിടുന്ന രീതിയിലാണ് ഓരോ നിലയവും രൂപകൽപ്പന ചെയ്തിരിക്കുന്നത്.

പ്രവർത്തന സമയത്തെ റേഡിയേഷൻ സമ്പർക്കം കഴിയുന്നത്ര കുറയ്ക്കാൻ ‘അലാറ’ തത്വമാണ് പിന്തുടരുന്നത്. നിലയത്തിന്റെ ക്രമീകരണം, സംരക്ഷണ കവചങ്ങൾ, അറ്റകുറ്റപ്പണി രീതികൾ എന്നിവ ജീവനക്കാരുടെ റേഡിയേഷൻ ഡോസ് ഏറ്റവും കുറഞ്ഞ നിലയിൽ നിലനിർത്തുന്ന രീതിയിലാണ്. ആണവോർജ നിയന്ത്രണ ബോർഡ് നിർദേശിക്കുന്ന പ്രകാരം അഞ്ച് വർഷക്കാലയളവിൽ ഒരു വർഷത്തെ ശരാശരി തൊഴിൽ റേഡിയേഷൻ പരിധി 20 മില്ലിസീവർട്ടാണ്. അഞ്ച് വർഷത്തെ ആകെ പരിധി 100 മില്ലിസീവർട്ടും ഏതെങ്കിലും ഒരു വർഷത്തെ പരമാവധി 30 മില്ലിസീവർട്ടുമാണ്.

ഓരോ ആണവ വൈദ്യുത നിലയത്തിലും പ്രത്യേക ഹെൽത്ത് ഫിസിക്സ് യൂണിറ്റുണ്ട്. റേഡിയേഷൻ തോത്, ജീവനക്കാരുടെ സമ്പർക്കം, നിലയത്തിലെ സംവിധാനങ്ങൾ, പരിസ്ഥിതിയിലേക്കുള്ള പുറന്തള്ളൽ എന്നിവ ഈ വിഭാഗം തുടർച്ചയായി നിരീക്ഷിക്കുന്നു. എൻജിനീയറിങ് നിയന്ത്രണങ്ങൾ, സുരക്ഷാ ഉപകരണങ്ങൾ, വെന്റിലേഷൻ സംവിധാനങ്ങൾ, സ്ഥിരമായ പരിശീലനം എന്നിവയും സുരക്ഷ കൂടുതൽ ശക്തമാക്കുന്നു.

മനുഷ്യശരീരത്തിലെ റേഡിയേഷന്റെ സ്വാധീനം അളക്കുന്നതിനുള്ള അളവാണ് മില്ലിസീവർട്ട്. ഇന്ത്യയിൽ പൊതുജനങ്ങൾക്ക് ഒരു വർഷത്തെ റേഡിയേഷൻ ഡോസ് പരിധി ഒരു മില്ലിസീവർട്ടാണ്. സാധാരണ പ്രവർത്തന സമയത്ത് ജനങ്ങളുടെയും പരിസ്ഥിതിയുടെയും സുരക്ഷ ഉറപ്പാക്കാൻ ഈ പരിധി സഹായിക്കുന്നതായി രേഖ പറയുന്നു. മാനദണ്ഡങ്ങൾ പാലിക്കുന്നുണ്ടോയെന്ന് ഉറപ്പാക്കാൻ ആണവോർജ നിയന്ത്രണ ബോർഡ് നിശ്ചിത ഇടവേളകളിൽ പരിശോധന നടത്തുന്നു.

റേഡിയോ ആക്ടീവ് മാലിന്യങ്ങളുടെ സുരക്ഷിത കൈകാര്യം ഇന്ത്യയുടെ ആണവ പദ്ധതിയുടെ പ്രധാന ഘടകമാണ്. സംസ്കരണം മുതൽ അന്തിമ നിക്ഷേപം വരെയുള്ള എല്ലാ ഘട്ടങ്ങളും പലതട്ടിലുള്ള നിയന്ത്രണ ചട്ടക്കൂടിലാണ്. ആണവോർജ നിയന്ത്രണ ബോർഡാണ് മാലിന്യ കൈകാര്യം മേൽനോട്ടം വഹിക്കുന്നത്. 1987ലെ ആണവോർജ റേഡിയോ ആക്ടീവ് മാലിന്യങ്ങളുടെ സുരക്ഷിത നിക്ഷേപ ചട്ടങ്ങളും ആണവോർജ നിയന്ത്രണ ബോർഡിന്റെ സുരക്ഷാ ചട്ടങ്ങളും പാലിച്ചാണ് പ്രവർത്തനം.

ഭാഭാ ആണവ ഗവേഷണ കേന്ദ്രത്തിന്റെ പരിസ്ഥിതി സർവേ ലബോറട്ടറികൾ പരിസ്ഥിതിയുടെ സുരക്ഷ നിരന്തരം പരിശോധിക്കുന്നു. മാലിന്യ കൈകാര്യം ചെയ്യുന്ന കേന്ദ്രങ്ങൾ മുഴുവൻ സമയ നിരീക്ഷണത്തിലുമാണ്. ദ്രവ റേഡിയോ ആക്ടീവ് മാലിന്യം സംസ്കരിക്കുകയും ആവശ്യമായ തോതിൽ നേർപ്പിക്കുകയും കർശന സുരക്ഷാ മാനദണ്ഡം പാലിച്ചതിന് ശേഷം മാത്രമേ പുറത്തുവിടുകയുള്ളൂ. ഖരമാലിന്യം പ്രത്യേകം രൂപകൽപ്പന ചെയ്ത നിലയത്തിനുള്ളിലെ സംവിധാനങ്ങളിൽ സംസ്കരിച്ച് സൂക്ഷിക്കുന്നു. മാലിന്യത്തിന്റെ റേഡിയോ ആക്ടിവിറ്റി അനുസരിച്ചാണ് നിക്ഷേപ രീതി തീരുമാനിക്കുന്നത്. ഓരോ കേന്ദ്രത്തിനും പ്രത്യേകം പുറന്തള്ളൽ പരിധി ആണവോർജ നിയന്ത്രണ ബോർഡ് നിശ്ചയിക്കുന്നു. പാലനവും പതിവായി പരിശോധിക്കുന്നു.

മാലിന്യ ഉൽപാദനം കുറയ്ക്കാൻ പുതിയ സാങ്കേതികവിദ്യകളും പ്രവർത്തനരീതികളും ആണവ നിലയങ്ങൾ ഉപയോഗിക്കുന്നു. ഉയർന്ന തോതിലുള്ള റേഡിയോ ആക്ടീവ് മാലിന്യം സുരക്ഷിതമായി കൈകാര്യം ചെയ്യുന്നതിനുള്ള തദ്ദേശീയ ‘വിട്രിഫിക്കേഷൻ’ സാങ്കേതികവിദ്യയുള്ള അപൂർവ രാജ്യങ്ങളിലൊന്നാണ് ഇന്ത്യ. ഭാഭാ ആണവ ഗവേഷണ കേന്ദ്രം വികസിപ്പിച്ച ഈ രീതിയിൽ ഉയർന്ന റേഡിയോ ആക്ടീവ് മാലിന്യം സ്ഥിരതയുള്ള ഗ്ലാസ് ബ്ലോക്കുകളാക്കി ദീർഘകാലം സുരക്ഷിതമായി കൈകാര്യം ചെയ്യുന്നു. ദേശീയ ചട്ടങ്ങളും അന്താരാഷ്ട്ര സുരക്ഷാ മാനദണ്ഡങ്ങളും പാലിച്ചാണ് ആണവ കേന്ദ്രങ്ങൾ പ്രവർത്തിക്കുന്നതെന്നും രേഖ വ്യക്തമാക്കുന്നു.

അടിയന്തരസജ്ജീകരണവും തെറ്റിദ്ധാരണകൾക്ക് വിശദീകരണവും

ആണവമോ റേഡിയേഷൻ സംബന്ധമായോ അടിയന്തര സാഹചര്യം ഉണ്ടായാൽ നേരിടാൻ ദേശീയ, സംസ്ഥാന, ജില്ലാ, ആണവ നിലയ തലങ്ങളെ ബന്ധിപ്പിച്ച ബഹുതല ഭരണ സംവിധാനം ഇന്ത്യ ഒരുക്കിയിട്ടുണ്ട്. ആണവോർജ വകുപ്പാണ് സാങ്കേതിക സജ്ജീകരണത്തിനും പ്രതികരണത്തിനും നേതൃത്വം നൽകുന്നത്. ആണവോർജ നിയന്ത്രണ ബോർഡ് നിയന്ത്രണ മേൽനോട്ടം വഹിക്കുന്നു. വേഗത്തിലുള്ള ഏകോപിത പ്രതികരണത്തിലൂടെ ജനങ്ങളെ സംരക്ഷിക്കുകയാണ് ലക്ഷ്യം.

ആണവ, റേഡിയേഷൻ അടിയന്തര സാഹചര്യങ്ങൾ ദേശീയ ദുരന്തനിവാരണ പദ്ധതിയുടെ ഭാഗമാണ്. ഇവ ജില്ലാ ദുരന്തനിവാരണ പദ്ധതികളിലും ഉൾപ്പെടുത്തിയിട്ടുണ്ട്. പ്രത്യേക പ്രതിസന്ധി നിയന്ത്രണ പദ്ധതിയിലൂടെ ആണവോർജ വകുപ്പ് സാങ്കേതിക സജ്ജീകരണത്തിനും പ്രതികരണത്തിനും നേതൃത്വം നൽകുന്നു. ഓരോ ആണവ നിലയത്തിനും ആണവോർജ നിയന്ത്രണ ബോർഡിന്റെ അംഗീകാരമുള്ള നിലയത്തിനുള്ളിലും നിലയത്തിന് പുറത്തുമുള്ള നിർബന്ധിത അടിയന്തര പ്രതികരണ പദ്ധതികളുണ്ട്.

ആണവ നിലയങ്ങൾ, ജില്ലാ ഭരണകൂടം, ജില്ലാ ദുരന്തനിവാരണ അതോറിറ്റികൾ എന്നിവ പതിവായി മാതൃകാ പരിശീലനങ്ങളും അടിയന്തര അഭ്യാസങ്ങളും നടത്തുന്നു. പൊലീസ്, അടിയന്തര സേവന ഉദ്യോഗസ്ഥർ, മറ്റ് ഏജൻസികൾ എന്നിവയ്ക്ക് പ്രത്യേക പരിശീലനം നൽകുന്നു. പ്രധാന കേന്ദ്രങ്ങളിൽ റേഡിയേഷൻ കണ്ടെത്താനുള്ള ഉപകരണങ്ങളും സ്ഥാപിച്ചിട്ടുണ്ട്.

ആരോഗ്യ കുടുംബക്ഷേമ മന്ത്രാലയം, ആണവോർജ വകുപ്പ്, ന്യൂക്ലിയർ പവർ കോർപ്പറേഷൻ ഓഫ് ഇന്ത്യ ലിമിറ്റഡ് എന്നിവ ചേർന്ന് ഡോക്ടർമാർക്കും മറ്റ് ആരോഗ്യ പ്രവർത്തകർക്കും പരിശീലനം നൽകുന്നു. പ്രത്യേക ചികിത്സയ്ക്കായി റേഡിയേഷൻ അടിയന്തര മെഡിക്കൽ ശൃംഖലകളും നിലനിർത്തുന്നു. കുറഞ്ഞ ജനസാന്ദ്രതയുള്ള പ്രദേശങ്ങളിലാണ് ആണവ നിലയങ്ങൾ സ്ഥാപിക്കുന്നത്. പ്രത്യേക സുരക്ഷാ മേഖലകളും ആവശ്യമുണ്ടായാൽ ഏകോപിത പ്രതികരണം സാധ്യമാക്കാൻ 16 കിലോമീറ്റർ അടിയന്തര ആസൂത്രണ മേഖലയും നിശ്ചയിച്ചിട്ടുണ്ട്.

ഓരോ ആണവ നിലയത്തിലും പരിസ്ഥിതി സർവേ ലബോറട്ടറിയുണ്ട്. സാധാരണ പ്രവർത്തന സമയത്തും അപൂർവമായ അടിയന്തര സാഹചര്യങ്ങളിലും വായു, വെള്ളം, മണ്ണ്, സസ്യങ്ങൾ, ഭക്ഷണം എന്നിവ തുടർച്ചയായി പരിശോധിക്കുന്നു.

ഇന്ത്യൻ പ്രഷറൈസ്ഡ് ഹെവി വാട്ടർ റിയാക്ടറുകളിൽ പരസ്പരം സ്വതന്ത്രവും വ്യത്യസ്ത രീതിയിലും പ്രവർത്തിക്കുന്ന രണ്ട് റിയാക്ടർ അടച്ചുപൂട്ടൽ സംവിധാനങ്ങളുണ്ട്. അസാധാരണ പ്രവർത്തന സാഹചര്യം കണ്ടെത്തിയാൽ ഇവ റിയാക്ടർ സ്വയം നിർത്തും. അതിന് ശേഷം പ്രത്യേക ശീതീകരണ സംവിധാനം റിയാക്ടർ കോറിൽ നിന്നുള്ള ചൂട് നീക്കം ചെയ്ത് സുരക്ഷ നിലനിർത്തും.

ആണവോർജത്തെക്കുറിച്ച് നിലനിൽക്കുന്ന തെറ്റിദ്ധാരണകൾക്കും പശ്ചാത്തല രേഖ വിശദീകരണം നൽകുന്നു. ആണവ നിലയത്തിന് സമീപം താമസിക്കുന്നത് ആരോഗ്യത്തിന് ഹാനികരമാണെന്ന വാദത്തിന് മറുപടിയായി, പ്രവർത്തിക്കുന്ന നിലയങ്ങളിൽ നിന്നുള്ള റേഡിയേഷൻ നിശ്ചിത സുരക്ഷാ പരിധിക്കുള്ളിലാണെന്നും സമീപവാസികൾക്ക് അധിക ആരോഗ്യ അപകടം തെളിയിച്ചിട്ടില്ലെന്നും രേഖ പറയുന്നു.

റേഡിയോ ആക്ടീവ് മാലിന്യം സുരക്ഷിതമായി കൈകാര്യം ചെയ്യാനാവില്ലെന്ന ധാരണയും രേഖ തള്ളുന്നു. നിരവധി സുരക്ഷാ തടസ്സങ്ങൾ, തുടർച്ചയായ നിരീക്ഷണം, കർശന നിയന്ത്രണ മേൽനോട്ടം എന്നിവയോടെയാണ് മാലിന്യം കൈകാര്യം ചെയ്യുന്നത്. ഏതൊരു അളവിലുള്ള റേഡിയേഷനും ഹാനികരമാണെന്ന ധാരണയും ശരിയല്ലെന്ന് രേഖ പറയുന്നു. സൂര്യൻ, മണ്ണ്, വായു, ഭക്ഷണം എന്നിവയിൽ നിന്നുള്ള കുറഞ്ഞ തോതിലുള്ള സ്വാഭാവിക റേഡിയേഷൻ മനുഷ്യരുടെ ദൈനംദിന ജീവിതത്തിന്റെ ഭാഗമാണ്.

ഇന്ത്യയിലെ ആണവ നിലയങ്ങൾ സുരക്ഷിതമല്ലെന്ന വാദത്തിന് മറുപടിയായി, രാജ്യം പതിറ്റാണ്ടുകളായി ശക്തമായ ആണവ സുരക്ഷാ ചരിത്രം നിലനിർത്തുന്നുവെന്നും നിരവധി സുരക്ഷാ സംവിധാനങ്ങളും ഭൗതിക തടസ്സങ്ങളും നിലയങ്ങളുടെ സുരക്ഷിത പ്രവർത്തനം ഉറപ്പാക്കുന്നുവെന്നും രേഖ പറയുന്നു. റോഡിലൂടെയോ റെയിൽവേയിലൂടെയോ ആണവ വസ്തുക്കൾ കൊണ്ടുപോകുന്നത് പൊതുജനങ്ങൾക്ക് വലിയ അപകടമാണെന്ന ആശങ്കയ്ക്കും വിശദീകരണമുണ്ട്. ദേശീയവും അന്താരാഷ്ട്രവുമായ മാനദണ്ഡങ്ങൾ പാലിക്കുന്ന പ്രത്യേകമായി രൂപകൽപ്പന ചെയ്ത് പരീക്ഷിച്ച കണ്ടെയ്നറുകളിലാണ് ആണവ വസ്തുക്കൾ കൊണ്ടുപോകുന്നത്.

കൽക്കരിയെയും എണ്ണയെയും പോലെ ആണവ വൈദ്യുതിയും പരിസ്ഥിതിയെ ദോഷകരമായി ബാധിക്കുമെന്ന ധാരണയും തെറ്റാണെന്ന് രേഖ പറയുന്നു. ഫോസിൽ ഇന്ധനം കത്തിക്കാതെ കുറഞ്ഞ കാർബൺ വൈദ്യുതി ഉൽപാദിപ്പിക്കുന്നതിനാൽ കൽക്കരിക്ക് പകരം ആണവോർജം ഉപയോഗിക്കുന്നത് കാർബൺ ഡൈഓക്സൈഡ് പുറന്തള്ളൽ കുറയ്ക്കുന്നു. പ്ലൂട്ടോണിയമോ മറ്റ് ആണവ വസ്തുക്കളോ സ്പർശിച്ചാൽ തന്നെ മരണം സംഭവിക്കുമെന്ന ധാരണയ്ക്കും അടിസ്ഥാനമില്ലെന്ന് രേഖ വ്യക്തമാക്കുന്നു. കർശന സുരക്ഷാ നടപടികളും പ്രത്യേക സംരക്ഷണ ഉപകരണങ്ങളും ഉപയോഗിച്ചാണ് ഇത്തരം വസ്തുക്കൾ കൈകാര്യം ചെയ്യുന്നത്.

പുനരുപയോഗ ഊർജം മതിയെന്നും ആണവോർജം വേണ്ടെന്നും പറയുന്ന വാദത്തിനും രേഖ മറുപടി നൽകുന്നു. ആണവോർജവും പുനരുപയോഗ ഊർജവും പരസ്പരം പൂരകങ്ങളാണ്. ആണവ വൈദ്യുതി 24 മണിക്കൂറും വിശ്വസനീയമായി ലഭ്യമാക്കാനാകുകയും സൗരോർജത്തെക്കാൾ വളരെ കുറച്ച് ഭൂമി മാത്രം ആവശ്യപ്പെടുകയും ചെയ്യുന്നു.

ജാർഖണ്ഡിലെ യുറേനിയം കോർപ്പറേഷൻ ഓഫ് ഇന്ത്യ ലിമിറ്റഡിന്റെ ഖനന മേഖലകൾക്ക് ചുറ്റുമുള്ള ഗ്രാമങ്ങളിൽ നടത്തിയ വ്യാപക ആരോഗ്യ പഠനങ്ങളിൽ കണ്ടെത്തിയ ആരോഗ്യ പ്രശ്നങ്ങൾ സമാന സാമൂഹിക-സാമ്പത്തിക സാഹചര്യങ്ങളുള്ള സാധാരണ ഗ്രാമപ്രദേശങ്ങളിൽ കാണുന്നവയ്ക്ക് സമാനമാണെന്ന് രേഖ പറയുന്നു. പ്രദേശത്തെ രോഗങ്ങളുടെ സ്വഭാവത്തിന് റേഡിയേഷൻ സമ്പർക്കവുമായി ബന്ധമുണ്ടെന്ന തെളിവില്ല. യുറേനിയം കോർപ്പറേഷൻ, ഭാഭാ ആണവ ഗവേഷണ കേന്ദ്രം, നിയന്ത്രണ ഏജൻസികൾ എന്നിവ ചേർന്ന് ആരോഗ്യനിരീക്ഷണം, പരിസ്ഥിതി പരിശോധന, സമൂഹക്ഷേമ പ്രവർത്തനങ്ങൾ എന്നിവ തുടരുകയാണ്.

ആണവ സുരക്ഷ, സുരക്ഷിതത്വം, സംരക്ഷണ മാനദണ്ഡങ്ങൾ എന്നിവ ശക്തിപ്പെടുത്താൻ ഇന്ത്യ അന്താരാഷ്ട്ര ആണവോർജ ഏജൻസിയുമായും അടുത്ത് പ്രവർത്തിക്കുന്നു. ഊർജസുരക്ഷ, സാങ്കേതിക സ്വയംപര്യാപ്തത, പൊതുജനക്ഷേമം, ഉയർന്ന സുരക്ഷാ നിലവാരം എന്നിവയ്ക്കുള്ള കേന്ദ്ര സർക്കാരിന്റെ പ്രതിബദ്ധതയാണ് ആണവ പദ്ധതി പ്രതിഫലിപ്പിക്കുന്നതെന്ന് പശ്ചാത്തല രേഖ പറയുന്നു.

2011ലെ ഫുകുഷിമ അപകടത്തിനു ശേഷം ഇന്ത്യയിലെ എല്ലാ ആണവ വൈദ്യുത നിലയങ്ങളിലും സമഗ്ര സുരക്ഷാ അവലോകനം നടത്തിയിരുന്നു. ഇതിലൂടെ രാജ്യത്തെ റിയാക്ടർ രൂപകൽപ്പനയുടെ സുരക്ഷ വീണ്ടും വിലയിരുത്തി. നിർദേശിച്ച ഹ്രസ്വകാല, ഇടക്കാല സുരക്ഷാ മെച്ചപ്പെടുത്തലുകൾ മുഴുവൻ പൂർത്തിയാക്കി. നിലവിലുള്ളതും ഭാവിയിൽ വരാനിരിക്കുന്നതുമായ റിയാക്ടറുകളിൽ ദീർഘകാല സുരക്ഷാ നവീകരണം തുടരുകയാണ്.

2047ലെ വികസിത ഭാരത ലക്ഷ്യത്തിലേക്കും 2070ലെ നെറ്റ് സീറോ ലക്ഷ്യത്തിലേക്കും രാജ്യം നീങ്ങുമ്പോൾ ശുദ്ധ വൈദ്യുതി, ഊർജസുരക്ഷ, സാങ്കേതിക സ്വയംപര്യാപ്തത, ചികിത്സ, കൃഷി, വ്യവസായം, ശാസ്ത്ര ഗവേഷണം എന്നിവയെ പിന്തുണയ്ക്കുന്ന പ്രധാന മേഖലയായി ആണവോർജം തുടരുമെന്നാണ് പി.ഐ.ബി പശ്ചാത്തല രേഖ വ്യക്തമാക്കുന്നത്.