ജയ്പൂർ, 2026 ഓഗസ്റ്റ് 21 –

രാജസ്ഥാനിലെ സർക്കാർ സ്കൂൾ സന്ദർശിക്കാനെത്തിയ കോക്രോച്ച് ജനതാ പാർട്ടി സി.ജെ.പി പ്രവർത്തകരെ നാട്ടുകാർ തടഞ്ഞു. ജയ്പൂരിലെ ബഗ്രു നിയമസഭാ മണ്ഡലത്തിലെ രാംപുര കൻവർപുര ഗ്രാമത്തിലാണ് സംഭവം. ‘സ്കൂൾ ഠീക് കരോ’ ക്യാമ്പയിന്റെ ഭാഗമായി 2026 ഓഗസ്റ്റ് 21ന് സ്കൂളിലെ സൗകര്യങ്ങൾ പരിശോധിക്കാനെത്തിയ സംഘത്തെയാണ് നാട്ടുകാർ എതിർത്തത്. തർക്കത്തിനിടെ പ്രവർത്തകരെ ഗ്രാമത്തിൽ നിന്ന് തള്ളിപ്പുറത്താക്കിയെന്നാണ് റിപ്പോർട്ട്.

റോഡ് തടഞ്ഞ് വാഹനങ്ങളും പരിശോധിച്ചു

സി.ജെ.പി സംഘം എത്തുന്നതിന് മുമ്പുതന്നെ ഗ്രാമത്തിലേക്കുള്ള പ്രധാന റോഡ് നാട്ടുകാർ തടഞ്ഞിരുന്നു. പ്രദേശത്തേക്ക് എത്തിയ വാഹനങ്ങളും പരിശോധിച്ചു. സ്കൂളിലെത്തി വിദ്യാർഥികളോടും അധ്യാപകരോടും സംസാരിക്കാനായിരുന്നു സി.ജെ.പി പ്രവർത്തകരുടെ പദ്ധതി. എന്നാൽ നാട്ടുകാരും പ്രവർത്തകരും തമ്മിൽ തർക്കമുണ്ടായി. പിന്നീട് നാട്ടുകാർ സ്കൂളിന് മുന്നിൽ കുത്തിയിരുന്ന് സി.ജെ.പിക്കെതിരെ മുദ്രാവാക്യം വിളിച്ചു. സംഭവത്തെക്കുറിച്ച് അറിയില്ലെന്നാണ് ബഗ്രു ഡിഎസ്പി ധർമേന്ദ്ര ശർമ പ്രതികരിച്ചത്.

അപകടാവസ്ഥയിലുള്ള സ്കൂൾ അടച്ചിട്ടു

ഗ്രാമത്തിലെ സർക്കാർ പ്രൈമറി സ്കൂൾ കെട്ടിടം സുരക്ഷിതമല്ലെന്ന് കണ്ടെത്തിയതിനെ തുടർന്ന് വിദ്യാർഥികൾക്കായി അടച്ചിട്ടിരിക്കുകയാണ്. ഇപ്പോൾ സമീപത്തെ കന്നുകാലികളെ പാർപ്പിക്കുന്ന സ്ഥലത്താണ് ക്ലാസുകൾ നടക്കുന്നത്. ബി.ജെ.പി പ്രവർത്തകരും നാട്ടുകാർക്കൊപ്പം പ്രതിഷേധത്തിൽ പങ്കെടുത്തു. സ്കൂൾ പ്രാദേശികമായി തന്നെ അറ്റകുറ്റപ്പണി നടത്താമെന്നും ഇതിനായി സർക്കാർ പണം അനുവദിച്ചിട്ടുണ്ടെന്നുമാണ് നാട്ടുകാരുടെ വാദം.

‘സ്കൂൾ ഠീക് കരോ’ ക്യാമ്പയിനുമായി സി.ജെ.പി

ഗ്രാമീണ മേഖലയിലെ സർക്കാർ സ്കൂളുകളുടെ കെട്ടിടം, അടിസ്ഥാന സൗകര്യങ്ങൾ, വിദ്യാർഥികൾക്കുള്ള സൗകര്യങ്ങൾ, പഠനക്രമം എന്നിവ പരിശോധിക്കാനാണ് സി.ജെ.പി ‘സ്കൂൾ ഠീക് കരോ’ ക്യാമ്പയിൻ നടത്തുന്നത്. അധ്യാപകരിൽ നിന്നും വിദ്യാർഥികളിൽ നിന്നും വിവരങ്ങൾ ശേഖരിക്കുന്നുമുണ്ട്. നേരത്തെ സി.ജെ.പി നടത്തിയ പരിശോധനകൾക്ക് പിന്നാലെ സർക്കാർ സ്കൂളുകളിൽ പുറത്തുനിന്നുള്ളവർക്കും മാധ്യമപ്രവർത്തകർക്കും പ്രവേശന നിയന്ത്രണം ഏർപ്പെടുത്തിയെന്ന വിവാദവും നിലനിൽക്കുകയാണ്.

സർക്കാർ സ്കൂളുകളുടെ അവസ്ഥ മറയ്ക്കുന്നുവെന്ന് ആരോപണം

സ്കൂളുകളുടെ മോശം അവസ്ഥ പുറത്തറിയാതിരിക്കാനാണ് രാജസ്ഥാൻ സർക്കാർ നിയന്ത്രണങ്ങൾ ഏർപ്പെടുത്തുന്നതെന്ന് സി.ജെ.പി കോ-കൺവീനർ ആശുതോഷ് റാങ്ക ആരോപിച്ചു. സർക്കാർ ഉത്തരവിൽ ഭയപ്പെടില്ലെന്നും സംസ്ഥാനത്തെ സർക്കാർ സ്കൂളുകളുടെ സ്ഥിതി മെച്ചപ്പെടുന്നതുവരെ ക്യാമ്പയിൻ തുടരുമെന്നും അദ്ദേഹം വ്യക്തമാക്കി.