ശാസ്ത്രീയമായി അടച്ച 42 കൽക്കരി ഖനികളുടെ നേട്ടവുമായി ‘ആരോഹ്’ റിപ്പോർട്ട്

ന്യൂഡൽഹി, 2026 ജൂലൈ 21 

രാജ്യത്ത് ആദ്യമായി ശാസ്ത്രീയമായി അടച്ച 42 കൽക്കരി ഖനികളുടെ മാറ്റങ്ങൾ വിശദീകരിക്കുന്ന ‘ആരോഹ്’ വാർഷിക റിപ്പോർട്ട് കേന്ദ്ര കൽക്കരി മന്ത്രാലയം പുറത്തിറക്കും. ജൂലൈ 22ന് ന്യൂഡൽഹിയിലാണ് ചടങ്ങ്. ഖനനഭൂമി വീണ്ടെടുത്തതും പരിസ്ഥിതി പുനഃസ്ഥാപിച്ചതും അടച്ച ഖനിപ്രദേശങ്ങൾ വീണ്ടും ഉപയോഗപ്രദമാക്കിയതുമാണ് റിപ്പോർട്ടിൽ അവതരിപ്പിക്കുന്നത്.

ഖനികൾ അടയ്ക്കുന്നതിലും പുതിയ മാതൃക

കേന്ദ്ര കൽക്കരി-ഖനി മന്ത്രി ജി. കിഷൻ റെഡ്ഡി ചടങ്ങിൽ മുഖ്യാതിഥിയാകും. കേന്ദ്ര പരിസ്ഥിതി മന്ത്രി ഭൂപേന്ദർ യാദവ്, കേന്ദ്രമന്ത്രി ജിതേന്ദ്ര സിങ്, കൽക്കരി സഹമന്ത്രി സതീഷ് ചന്ദ്ര ദുബെ എന്നിവരും പങ്കെടുക്കും. അംഗീകൃത പദ്ധതികൾ പാലിച്ചാണ് 42 ഖനികളും ശാസ്ത്രീയമായി അടച്ചത്. ഭൂമി വീണ്ടെടുക്കൽ, പച്ചപ്പ് പുനഃസ്ഥാപിക്കൽ, പ്രദേശവാസികളുടെ പങ്കാളിത്തം എന്നിവയ്ക്കാണ് പ്രധാന്യം നൽകിയത്.

ഖനനഭൂമി വീണ്ടും ജനങ്ങൾക്ക്

അടച്ച ഖനിപ്രദേശങ്ങളെ വെറുതെ ഉപേക്ഷിക്കാതെ കൃഷി, സാമൂഹിക വികസനം, തൊഴിൽ, സാമ്പത്തിക പ്രവർത്തനങ്ങൾ എന്നിവയ്ക്കായി ഉപയോഗിക്കുകയാണ് ലക്ഷ്യം. ഇതിനായി പ്രാദേശിക ജനങ്ങളെ ഉൾപ്പെടുത്തുന്ന ‘റിക്ലെയിം’, സുസ്ഥിര ഖനി അടച്ചുപൂട്ടലിനുള്ള ‘ലൈവ്സ്’, ഭൂമിയുടെ ഭാവി ഉപയോഗം കണ്ടെത്താനുള്ള ‘സുവികൽപ്’ സംവിധാനം എന്നിവ മന്ത്രാലയം നടപ്പാക്കിയിട്ടുണ്ട്.

കൽക്കരി മേഖലകളിൽ ശുദ്ധജലം

കോൾ ഇന്ത്യയുടെ അനുബന്ധ സ്ഥാപനങ്ങൾ സ്ഥാപിച്ച ‘കോൾ നീർ’ കുടിവെള്ള പദ്ധതികളും ചടങ്ങിൽ ഉദ്ഘാടനം ചെയ്യും. കൽക്കരി ഖനന മേഖലകളിലെ ജനങ്ങൾക്ക് സുരക്ഷിതവും സ്ഥിരവുമായ കുടിവെള്ളം ലഭ്യമാക്കുകയാണ് പദ്ധതിയുടെ ലക്ഷ്യം. കോൾ ഇന്ത്യ, എൻ.എൽ.സി ഇന്ത്യ, സിംഗരേണി, എൻ.ടി.പി.സി, സ്വകാര്യ ഖനി സ്ഥാപനങ്ങൾ എന്നിവയുടെ പരിസ്ഥിതി പുനരുദ്ധാരണ പദ്ധതികളും പ്രദർശിപ്പിക്കും.

ജർമനിയുമായി സാങ്കേതിക സഹകരണം

അടയ്ക്കാനിരിക്കുന്ന കൽക്കരി ഖനികളുടെ ശാസ്ത്രീയ പുനരുദ്ധാരണത്തിനായി ഇന്ത്യയും ജർമനിയും നടപ്പാക്കൽ കരാറിൽ ഒപ്പിടും. ജർമൻ വികസന സഹകരണ സ്ഥാപനമായ ജി.ഐ.സെഡുമായാണ് ധാരണ. വിദഗ്ധ അറിവ് പങ്കിടാനും രാജ്യാന്തര മാതൃകകൾ ഇന്ത്യയിൽ നടപ്പാക്കാനും കരാർ സഹായിക്കും.

ഝാരിയയിൽ തൊഴിൽ പരിശീലനം

പുതുക്കിയ ഝാരിയ മാസ്റ്റർ പദ്ധതിയുടെ ഭാഗമായി തൊഴിൽ പരിശീലന കേന്ദ്രങ്ങൾ തുടങ്ങുന്നതിനുള്ള ത്രികക്ഷി ധാരണാപത്രങ്ങളും ഒപ്പിടും. ഭാരത് കോക്കിങ് കോൾ, ഝാരിയ പുനരധിവാസ വികസന അതോറിറ്റി, ഹിൻഡാൽകോ, രാജധാനി യൂണിവേഴ്സൽ ഫാബ്രിക്സ് എന്നിവയാണ് പദ്ധതിയിൽ പങ്കാളികളാകുന്നത്. ഖനികൾ അടയ്ക്കുന്നതിനെ പരിസ്ഥിതി സംരക്ഷണത്തിന്റെയും പുതിയ തൊഴിലവസരങ്ങളുടെയും സാധ്യതയാക്കി മാറ്റുകയാണ് മന്ത്രാലയത്തിന്റെ ഭാവി ലക്ഷ്യം.