ചണ്ഡീഗഡ്, ജൂലൈ 14-

മക്കളില്ലാത്ത ജാട്ട് സമുദായക്കാരനെ പരിചരിക്കുകയും സേവനം ചെയ്യുകയും ചെയ്ത വ്യക്തിക്ക് വിൽപത്രത്തിലൂടെ പൂർവികസ്വത്ത് കൈമാറാമെന്ന് പഞ്ചാബ്-ഹരിയാന ഹൈക്കോടതി. വസ്തുവിന്റെ യഥാർഥ ഉടമയായിരുന്ന ബിഷൻ സിങ്, ദേബോ എന്ന സ്ത്രീക്ക് സ്വത്ത് നൽകിയ നടപടി ചോദ്യം ചെയ്ത് ബന്ധുക്കൾ നൽകിയ ഹർജി ജസ്റ്റിസ് ഹർക്കേഷ് മനുജ തള്ളി. മുൻ കീഴ്‌ക്കോടതികൾ ദേബോയ്ക്ക് അനുകൂലമായി പുറപ്പെടുവിച്ച വിധികൾ ഹൈക്കോടതി ശരിവച്ചു. ബേലി റാമിന്റെ നിയമാവകാശികളായ സുർമുഖ് സിങ്ങും മറ്റുള്ളവരുമായിരുന്നു അപ്പീലുകാർ. അപ്പീലുകാർക്കായി അഭിഭാഷകൻ അശോക് കുമാർ ഖുബ്ബറും ദേബോ ഉൾപ്പെടെയുള്ള എതിർകക്ഷികൾക്കായി അഭിഭാഷകരായ എസ്.പി. ലാലർ, ശുഭം സരോഹ എന്നിവരും ഹാജരായി.

42 ബിഘയോളം വരുന്ന ഭൂമിക്കായുള്ള അവകാശവാദം ബന്ധുക്കൾ ചോദ്യം ചെയ്തു

ജഗാധ്രി താലൂക്കിലെ സങ്കേര ഗ്രാമത്തിൽ ബിഷൻ സിങ്ങിന്റെ പേരിലുണ്ടായിരുന്ന 23 ബിഘയും 19 ബിസ്വയും വരുന്ന കൃഷിഭൂമിയെച്ചൊല്ലിയായിരുന്നു തർക്കം. മക്കളില്ലാതെ 1979 ഓഗസ്റ്റിൽ മരിച്ച ബിഷൻ സിങ്, തന്റെ മരണത്തിന് മുൻപ് എഴുതിയ വിൽപത്രത്തിലൂടെയും സമ്മതവിധിയിലൂടെയും ഭൂമിയുടെ അവകാശം ദേബോയ്ക്ക് നൽകിയിരുന്നു. എന്നാൽ, ഇത് പൂർവികസ്വത്തായതിനാൽ കുടുംബത്തിലെ അടുത്ത ബന്ധുക്കളുടെ അവകാശം മറികടന്ന് മറ്റൊരാൾക്ക് കൈമാറാൻ ജാട്ട് ആചാരപ്രകാരം കഴിയില്ലെന്നായിരുന്നു സുർമുഖ് സിങ്ങിന്റെയും കൂട്ടരുടെയും വാദം.

ഭാര്യയല്ലെങ്കിലും ദീർഘകാല പരിചരണം വിൽപത്രത്തിന് സാധുത നൽകും

ദേബോ ബിഷൻ സിങ്ങിന്റെ ഭാര്യയായിരുന്നു എന്ന വാദവും കേസിലുണ്ടായിരുന്നു. എന്നാൽ വിവാഹബന്ധം പൂർണ്ണമായി തെളിയിക്കാനായില്ലെങ്കിലും, ദേബോ ദീർഘകാലം ബിഷൻ സിങ്ങിനൊപ്പം താമസിക്കുകയും അദ്ദേഹത്തെ പരിചരിക്കുകയും ചെയ്തതായി രേഖകൾ വ്യക്തമാക്കുന്നുവെന്ന് കോടതി വിലയിരുത്തി. മക്കളില്ലാത്ത ഭൂവുടമയ്ക്ക് ജീവിതകാലത്ത് തന്നെ പരിചരിച്ച വ്യക്തിക്ക് സ്വത്ത് നൽകാൻ ജാട്ട് പൊതുആചാരം അനുവദിക്കുന്നുണ്ടെന്നും അങ്ങനെയുള്ളവരെ അടുത്ത പുരുഷബന്ധുവിന് സമാനമായി കാണാമെന്നും കോടതി വ്യക്തമാക്കി.

പൂർവികസ്വത്ത് കൈമാറാനേ കഴിയില്ലെന്ന വാദം കോടതി തള്ളി

ജാട്ട് ആചാരപ്രകാരം പൂർവികസ്വത്ത് ബന്ധുക്കളുടെ അവകാശം മറികടന്ന് കൈമാറാനാകില്ലെന്ന പൊതുവാദം മാത്രം ഇവിടെ നിലനിൽക്കില്ലെന്ന് ഹൈക്കോടതി ചൂണ്ടിക്കാട്ടി. അത്തരം കർശനമായ ആചാര നിയന്ത്രണങ്ങളുണ്ടെങ്കിൽ അത് വ്യക്തമായ തെളിവുകളോടെ സ്ഥാപിക്കണമായിരുന്നു. മക്കളില്ലാത്ത ഉടമയെ പരിചരിച്ച വ്യക്തിക്ക് സ്വത്ത് നൽകാൻ ആചാരത്തിൽ ഒഴിവുകളില്ലെന്ന് തെളിയിക്കാൻ അപ്പീലുകാർക്ക് കഴിഞ്ഞില്ലെന്ന് കോടതി കണ്ടെത്തി.

വിൽപത്രം നിയമപരമെന്ന് കോടതി; അപ്പീൽ തള്ളി

വിൽപത്രത്തിലെ സാക്ഷിയുടെ മൊഴിയും രേഖയിലെ നോട്ടറി ഒപ്പും ചേർന്ന് വിൽപത്രം നിയമാനുസൃതമായാണ് തയ്യാറാക്കിയതെന്ന് തെളിയിക്കുന്നുണ്ടെന്ന് കോടതി വ്യക്തമാക്കി. മുൻപ് നടന്ന കോടതി നടപടികളിൽ ദേബോയുടെ സ്വത്തവകാശം അംഗീകരിച്ചവർ, പിന്നീട് വിൽപത്രത്തെയും വിവാഹത്തെയും നിഷേധിക്കുന്നത് പരസ്പരവിരുദ്ധമായ നിലപാടാണെന്നും കോടതി ഓർമ്മിപ്പിച്ചു. കീഴ്‌ക്കോടതികളുടെ കണ്ടെത്തലുകളിൽ പിഴവുകളില്ലെന്ന് വ്യക്തമാക്കി ഹൈക്കോടതി രണ്ടാം അപ്പീൽ തള്ളി. ഇതോടെ ദേബോയ്ക്കും അവരിൽ നിന്ന് ഭൂമി വാങ്ങിയവർക്കുമുള്ള അവകാശം നിലനിൽക്കും.