ന്യൂഡൽഹി, 2026 ജൂലൈ 8-

പശ്ചിമേഷ്യയിലെ പുതിയ സംഘർഷങ്ങളും ആർട്ടിഫിഷ്യൽ ഇന്റലിജൻസ് (AI) മേഖലയിലെ ടെക്നോളജി ഓഹരികളുടെ അമിത മൂല്യനിർണയത്തെക്കുറിച്ചുള്ള ആശങ്കകളും മൂലം ആഗോള ഓഹരി വിപണികളിൽ ചൊവ്വാഴ്ച കനത്ത വിൽപ്പന സമ്മർദ്ദം ദൃശ്യമായി. നിക്ഷേപകർ കൂട്ടത്തോടെ ജാഗ്രതൈ നിലപാട് സ്വീകരിച്ചതോടെ ഏഷ്യൻ വിപണികളിലാണ് ഇടിവ് ഏറ്റവും കൂടുതൽ പ്രതിഫലിച്ചത്. ദക്ഷിണ കൊറിയൻ സൂചികയായ ‘കോസ്‌പി’ (KOSPI) കുത്തനെ താഴോട്ട് പോയി.

എഐ ഓഹരികളിൽ ലാഭമെടുപ്പ് ശക്തം

സാംസങ് ഇലക്ട്രോണിക്സ് ഉൾപ്പെടെയുള്ള പ്രമുഖ ടെക്നോളജി, സെമികണ്ടക്ടർ ഓഹരികളിൽ വൻതോതിലുള്ള ലാഭമെടുപ്പാണ് നടന്നത്. നടപ്പ് സാമ്പത്തിക വർഷത്തെ രണ്ടാം പാദത്തിൽ സാംസങ് മികച്ച പ്രവർത്തന ലാഭം രേഖപ്പെടുത്തിയിട്ടും വിപണിയിൽ അത് അനുകൂല ചലനമുണ്ടാക്കിയില്ല. എഐ തരംഗത്തെത്തുടർന്ന് ഐടി കമ്പനികൾ കൈവരിച്ച അതിവേഗ വരുമാന വളർച്ച വരും ദിവസങ്ങളിൽ നിലനിർത്താനാകുമോ എന്ന ആശങ്കയാണ് വിപണിയെ പിടിച്ചുലച്ചത്. ഇതോടെ ചിപ്പ് നിർമ്മാതാക്കളും മറ്റ് പ്രമുഖ ടെക് ഓഹരികളും കനത്ത സമ്മർദ്ദത്തിലായി.

ഇന്ത്യൻ, യൂറോപ്യൻ വിപണികളിലും ഇടിവ്

ഏഷ്യൻ വിപണിയിലെ തളർച്ച തുടർന്നുള്ള മണിക്കൂറുകളിൽ യൂറോപ്യൻ വിപണികളിലേക്കും പടർന്നു. അവിടെയും ടെക്നോളജി ഓഹരികൾ വലിയ തിരിച്ചടി നേരിട്ടു. യു.എസ്. ഓഹരി ഫ്യൂച്ചേഴ്സും സൂചികകളുടെ ദുർബലമായ തുടക്കത്തിനുള്ള സൂചനകളാണ് നൽകിയത്.

തുടർച്ചയായ നാല് ദിവസത്തെ നേട്ടത്തിന് ശേഷം ഇന്ത്യൻ വിപണിയും നേരിയ നഷ്ടത്തോടെയാണ് വ്യാപാരം അവസാനിപ്പിച്ചത്. ഐടി മേഖല രണ്ടര ശതമാനത്തോളം നേട്ടമുണ്ടാക്കിയെങ്കിലും റിയൽ എസ്റ്റേറ്റ്, മെറ്റൽസ്, ഡിഫൻസ് ഓഹരികളിലുണ്ടായ ഇടിവ് ഇന്ത്യൻ വിപണിയെ താഴേക്ക് നയിച്ചു.

എണ്ണവില വർധനയും പലിശനിരക്ക് ആശങ്കയും

പശ്ചിമേഷ്യയിലെ പുതിയ ഭൗമരാഷ്ട്രീയ സാഹചര്യങ്ങളും വിപണിയുടെ താളം തെറ്റിച്ചു. ഹോർമുസ് കടലിടുക്കിൽ ഖത്തറിന്റെ എൽഎൻജി (LNG) കപ്പലിന് നേരെയുണ്ടായ ആക്രമണ വാർത്തകൾ ഊർജ വിതരണ സുരക്ഷയെക്കുറിച്ചുള്ള ആശങ്കകൾ വർധിപ്പിക്കുകയും ക്രൂഡ് ഓയിൽ വില ഉയരുകയും ചെയ്തു.

എണ്ണവില വർധിക്കുന്നത് പണപ്പെരുപ്പം വീണ്ടും ഉയരാൻ കാരണമാകുമെന്ന ഭീതി നിക്ഷേപകർക്കുണ്ട്. ഇത് കേന്ദ്ര ബാങ്കുകൾ പലിശനിരക്ക് കുറയ്ക്കുന്നതിനുള്ള സാധ്യതകളെ ബാധിക്കുമെന്ന ആശങ്കയും വിപണിയിൽ പ്രകടമായി. ഇതോടെ നിക്ഷേപകർ കൂടുതൽ മുൻകരുതൽ എടുക്കാൻ നിർബന്ധിതരായി.