റേവ, 2026 ജൂൺ 27
മധ്യപ്രദേശിലെ ഭൂമിശാസ്ത്രപരമായ പ്രത്യേകതയുടെ അംഗീകാരം ലഭിച്ച റേവ സുന്ദർജ മാമ്പഴത്തിന്റെ ആദ്യ വാണിജ്യ കയറ്റുമതി ഐക്യ അറബ് എമിറേറ്റ്സിലേക്ക് നടന്നു. ഒരു മെട്രിക് ടൺ മാമ്പഴമാണ് ജൂൺ 26ന് കയറ്റുമതി ചെയ്തത്. രാജ്യത്തെ പ്രത്യേക കാർഷിക ഉൽപ്പന്നങ്ങൾക്ക് ആഗോള വിപണിയിൽ കൂടുതൽ അവസരങ്ങൾ ഒരുക്കുന്ന പ്രധാന നാഴികക്കല്ലായാണ് ഈ നീക്കത്തെ വിലയിരുത്തുന്നത്.
വാണിജ്യ, വ്യവസായ മന്ത്രാലയത്തിന് കീഴിലെ കാർഷിക, സംസ്കരിച്ച ഭക്ഷ്യ ഉൽപ്പന്ന കയറ്റുമതി വികസന അതോറിറ്റിയുടെ നേതൃത്വത്തിലാണ് നടപടി നടന്നത്. മധ്യപ്രദേശ് ഉദ്യാനവകുപ്പ്, കയറ്റുമതിക്കാർ, കർഷക ഉൽപ്പാദക സംഘടനകൾ, പാക്ക് ഹൗസ് നടത്തിപ്പുകാർ, അന്താരാഷ്ട്ര വാങ്ങുന്നവർ എന്നിവർ ചേർന്നാണ് കയറ്റുമതിക്കുള്ള ബന്ധം ഒരുക്കിയത്. റേവ ജില്ലയിലെ ഗോവിന്ദ്ഗഡിൽ നിന്നുള്ള കർഷകനിൽ നിന്നും കർഷക ഉൽപ്പാദക കമ്പനിയിൽ നിന്നുമാണ് മാമ്പഴം ശേഖരിച്ചത്. ഗുണനിലവാര പരിശോധനയും പാക്കിംഗും പൂർത്തിയാക്കിയ ശേഷം വാരാണസി വിമാനത്താവളം വഴി ഐക്യ അറബ് എമിറേറ്റ്സിലേക്ക് അയച്ചു.
ഈ കയറ്റുമതി റേവ മേഖലയിലെ മാമ്പഴ കർഷകർക്ക് സാമ്പത്തിക നേട്ടമുണ്ടാക്കുമെന്നാണ് പ്രതീക്ഷ. പ്രാദേശിക വിപണിയിൽ കിലോയ്ക്ക് ലഭിക്കുന്ന വിലയെക്കാൾ കൂടുതൽ വിലയ്ക്കാണ് കയറ്റുമതിക്കാരൻ മാമ്പഴം വാങ്ങിയത്. ഇതിലൂടെ കർഷകർക്ക് നേരിട്ട് കൂടുതൽ വരുമാനം ലഭിക്കും. അസാധാരണ മധുരം, സമൃദ്ധമായ സുഗന്ധം, നാരില്ലാത്ത മാംസള ഭാഗം, പ്രത്യേക രുചി എന്നിവയാണ് റേവ സുന്ദർജ മാമ്പഴത്തിന്റെ പ്രത്യേകത. ഈ കയറ്റുമതി ഈ ഇനത്തിന് ആഗോള അംഗീകാരം വർധിപ്പിക്കുമെന്നും മധ്യപ്രദേശിനെ മികച്ച മാമ്പഴ കയറ്റുമതി കേന്ദ്രമായി ഉയർത്താൻ സഹായിക്കുമെന്നും പ്രതീക്ഷിക്കുന്നു.
