ന്യൂഡൽഹി, 2026 ജൂൺ 26 

അടിയന്തരാവസ്ഥ പ്രഖ്യാപിച്ചതിന്റെ അൻപത് വർഷം പൂർത്തിയായതിന്റെ ഭാഗമായി സാംസ്കാരിക മന്ത്രാലയം ഭരണഘടനാ ഹത്യാ ദിനം ആചരിച്ചു. മന്ത്രാലയത്തിന് കീഴിലുള്ള സ്വയംഭരണ സ്ഥാപനമായ സാംസ്കാരിക വിഭവ-പരിശീലന കേന്ദ്രത്തിന്റെ ന്യൂഡൽഹി ക്യാമ്പസിലായിരുന്നു പ്രത്യേക പരിപാടി. ജനാധിപത്യം, ഭരണഘടനാ മൂല്യങ്ങൾ, പൗരന്മാരുടെ അവകാശങ്ങൾ എന്നിവയെക്കുറിച്ചുള്ള പൊതുജന ബോധവൽക്കരണം ശക്തിപ്പെടുത്തുക എന്ന ലക്ഷ്യത്തോടെയായിരുന്നു പരിപാടി സംഘടിപ്പിച്ചത്.

സാംസ്കാരിക-വിനോദസഞ്ചാര മന്ത്രി ഗജേന്ദ്ര സിങ് ഷെഖാവത്ത് മുഖ്യാതിഥിയായി പങ്കെടുത്തു. ഇന്ത്യയുടെ അടിസ്ഥാന സ്വഭാവത്തിൽ തന്നെ ജനാധിപത്യമുണ്ടെന്നും, സ്വാതന്ത്ര്യ സമരത്തിലെ അറിയപ്പെടാതെ പോയ പോരാളികളെ ആദരിക്കാനുള്ള അവസരമാണ് ഈ ദിനമെന്നും അദ്ദേഹം പറഞ്ഞു. ജനാധിപത്യം തെരഞ്ഞെടുപ്പിൽ മാത്രം ഒതുങ്ങുന്നതല്ലെന്നും അഭിപ്രായസ്വാതന്ത്ര്യം, വിയോജിക്കാനുള്ള അവകാശം, സ്വതന്ത്ര മാധ്യമങ്ങൾ, പൗരന്മാരുടെ അന്തസ്, ഭരണഘടനയുടെ പരമോന്നത സ്ഥാനം എന്നിവയും അതിന്റെ ഭാഗമാണെന്നും അദ്ദേഹം വ്യക്തമാക്കി. ചടങ്ങിൽ പ്രദർശനങ്ങൾ, ഹ്രസ്വചലച്ചിത്ര പ്രദർശനം, സാംസ്കാരിക അവതരണം, ഡിജിറ്റൽ ജില്ലാ ശേഖര ആദരിക്കൽ ചടങ്ങ് എന്നിവയും നടന്നു. അടിയന്തരാവസ്ഥക്കാലത്ത് തടവിലാക്കപ്പെട്ട മാധ്യമപ്രവർത്തകനും എഴുത്തുകാരനുമായ റാം ബഹാദൂർ റായിയും പ്രത്യേക പ്രഭാഷണം നടത്തി.

അടിയന്തരാവസ്ഥയുടെ സ്വാധീനവും ജനാധിപത്യ സ്ഥാപനങ്ങളുടെ പ്രാധാന്യവും അവതരിപ്പിക്കുന്ന പ്രദർശനവും ഇന്ത്യയുടെ സ്വാതന്ത്ര്യസമരവുമായി ബന്ധപ്പെട്ട ജില്ലാതല ചരിത്രങ്ങൾ രേഖപ്പെടുത്തുന്ന ഡിജിറ്റൽ ജില്ലാ ശേഖര പ്രദർശനവും പരിപാടിയുടെ ഭാഗമായി ഒരുക്കി. ജൂൺ ഇരുപത്തിനാലിന് ആരംഭിച്ച പ്രദർശനത്തിൽ ആയിരത്തിലധികം വിദ്യാർഥികൾ പങ്കെടുത്തു. രാജ്യത്തിന് നൽകിയ സംഭാവനകളെ മാനിച്ച് മുതിർന്ന സ്വാതന്ത്ര്യസമര പോരാളികളെയും അവരുടെ കുടുംബാംഗങ്ങളെയും ചടങ്ങിൽ ആദരിച്ചു. ശേഖരത്തിന്റെ വികസനത്തിൽ പങ്കുവഹിച്ച അധ്യാപകരെയും ഗവേഷകരെയും സ്ഥാപനങ്ങളെയും അനുമോദിച്ചു. രാജ്യവ്യാപക സേവാ പർവ് സംരംഭത്തിന്റെ ഭാഗമായി ഒരുക്കിയ കലാസൃഷ്ടികളുടെ പ്രത്യേക പ്രദർശനവും നടന്നു.