പൂനെ, 2026 ജൂൺ 24 –

മരണത്തിന് ശേഷം സാമൂഹിക മാധ്യമത്തിലെ വികാരനിറഞ്ഞ കുറിപ്പ്

കേതന്റെ മരണത്തിന് പിന്നാലെ സിയ സാമൂഹിക മാധ്യമത്തിൽ വികാരനിറഞ്ഞ കുറിപ്പ് പങ്കുവെച്ചിരുന്നു. വിവാഹത്തിന് തൊട്ടുമുമ്പ് തന്നെ വിട്ടുപോയെന്നും തിരികെ വരണമെന്നുമായിരുന്നു കുറിപ്പിലെ പരാമർശങ്ങൾ. കേതനൊപ്പമുള്ള വീഡിയോയും ചിത്രങ്ങളും പങ്കുവെച്ചിരുന്നു. എന്നാൽ അന്വേഷണത്തിനിടെ സിയയും ചേതനും ചേർന്ന് കുറ്റകൃത്യം ആസൂത്രണം ചെയ്തെന്ന നിഗമനത്തിലേക്കാണ് പൊലീസ് എത്തിയത്. ഇതോടെ ആ കുറിപ്പും ഇപ്പോൾ വ്യാപക ചർച്ചയായിരിക്കുകയാണ്.

കുറിപ്പ് ഇപ്രകാരം:-

“तुमने मुझे मेरे जन्मदिन पर अकेला छोड़ दिया। तुम तब चले गए जब हम अपनी शादी के बेहद करीब थे। मुझे अभी भी समझ नहीं आ रहा कि तुमने मेरे साथ ऐसा क्यों किया? मेरे कई सपने थे, ऐसे कई सवाल थे जिनके जवाब मुझे अब कभी नहीं मिलेंगे। जब मैं तुमसे इतना बेपनाह प्यार करती थी तो तुमने मुझे क्यों छोड़ दिया? भगवान तुम्हारी आत्मा को शांति दे।”

അർഥം ഇപ്രകാരം:-

“നീ എന്റെ ജന്മദിനത്തിൽ എന്നെ ഒറ്റയ്ക്കാക്കി വിട്ടുപോയി. നമ്മുടെ വിവാഹം വളരെ അടുത്തിരിക്കെയായിരുന്നു നീ പോയത്. നീ എനിക്കൊപ്പം ഇങ്ങനെ ചെയ്തത് എന്തുകൊണ്ടാണെന്ന് എനിക്ക് ഇന്നും മനസ്സിലാകുന്നില്ല. എനിക്ക് ഒരുപാട് സ്വപ്നങ്ങളുണ്ടായിരുന്നു, ഇനി ഒരിക്കലും ഉത്തരങ്ങൾ ലഭിക്കാത്ത നിരവധി ചോദ്യങ്ങളും ഉണ്ടായിരുന്നു. ഞാൻ നിന്നെ ഇത്രയും അതിരില്ലാതെ സ്നേഹിച്ചിരുന്നപ്പോൾ നീ എന്നെ എന്തിന് വിട്ടുപോയി? ദൈവം നിന്റെ ആത്മാവിന് ശാന്തി നൽകട്ടെ.”

വിവാഹം ഒഴിവാക്കാൻ കൊലപാതക ആസൂത്രണമെന്ന് പൊലീസ്

കേതനും സിയയും തമ്മിലുള്ള വിവാഹത്തിനുള്ള ഒരുക്കങ്ങൾ പൂർത്തിയായിരുന്നുവെന്നാണ് അന്വേഷണത്തിൽ കണ്ടെത്തിയത്. ഉദയ്പൂരിൽ വിവാഹ ചടങ്ങുകൾക്കായി വൻ ഒരുക്കങ്ങളും നടത്തിയിരുന്നു. എന്നാൽ സിയയ്ക്ക് ഈ വിവാഹത്തിൽ താൽപര്യമില്ലായിരുന്നുവെന്നും കാമുകനായ ചേതനോടൊപ്പം ജീവിക്കാനാണ് ആഗ്രഹിച്ചതെന്നും പൊലീസ് പറയുന്നു. ജൂൺ 14-ന് തന്നെ കേതനെ കൊക്കയിലേക്ക് വീഴ്ത്താനുള്ള ശ്രമം നടത്തിയിരുന്നുവെന്നും അത് പരാജയപ്പെട്ട ശേഷമാണ് ജൂൺ 18-ന് വീണ്ടും പദ്ധതി നടപ്പാക്കിയതെന്നുമാണ് അന്വേഷണ സംഘത്തിന്റെ കണ്ടെത്തൽ. കേസിൽ ഇരുവരും പൊലീസ് കസ്റ്റഡിയിലാണ്.

ലോഹ്ഗഡ് കോട്ടയ്ക്ക് സമീപമുള്ള 400 അടി താഴ്ചയുള്ള കൊക്കയിലേക്ക് തള്ളിയിട്ട് കേതനെ കൊലപ്പെടുത്തിയെന്നാണ് കേസ്. ജൂൺ 18-നാണ് സംഭവം നടന്നത്. തുടർന്ന് ശക്തമായ കാറ്റിൽ കാലുതെറ്റി വീണതാണെന്നായിരുന്നു ആദ്യം നൽകിയ വിശദീകരണം.