വിഴിഞ്ഞം, 2026 ജൂൺ 24 –

കേരളത്തിന്റെ സ്വപ്നപദ്ധതിയായ വിഴിഞ്ഞം അന്താരാഷ്ട്ര തുറമുഖം മറ്റൊരു ചരിത്രനേട്ടം സ്വന്തമാക്കി. എംഎസ്‌സിയുടെ കൂറ്റൻ മദർഷിപ്പ് ലൂസിയാനയുടെ വരവോടെ തുറമുഖം കൈകാര്യം ചെയ്ത കപ്പലുകളുടെ എണ്ണം ആയിരം തികഞ്ഞു. രണ്ടുവർഷത്തിൽ താഴെ സമയത്തിനുള്ളിൽ ഈ നേട്ടം കൈവരിച്ചതോടെ ലോകത്ത് ഏറ്റവും വേഗത്തിൽ വളരുന്ന തുറമുഖങ്ങളിലൊന്നായി വിഴിഞ്ഞം മാറിയിരിക്കുകയാണ്.

പ്രതീക്ഷിച്ചതിലും കൂടുതൽ വളർച്ചയാണ് തുറമുഖം രേഖപ്പെടുത്തുന്നത്. ഇതുവരെ 21.1 ലക്ഷം കണ്ടെയ്നറുകൾ കൈകാര്യം ചെയ്തിട്ടുണ്ട്. അന്താരാഷ്ട്ര കപ്പൽപാതയിൽ നിന്ന് വെറും പത്ത് നോട്ടിക്കൽ മൈൽ അകലെയുള്ള തന്ത്രപ്രധാന സ്ഥാനം വിഴിഞ്ഞത്തെ ദക്ഷിണേഷ്യ, പശ്ചിമേഷ്യ, യൂറോപ്പ്, ആഫ്രിക്ക, ദക്ഷിണ അമേരിക്ക എന്നിവയെ ബന്ധിപ്പിക്കുന്ന പ്രധാന ട്രാൻസ്‌ഷിപ്മെന്റ് കേന്ദ്രമാക്കി മാറ്റിയിട്ടുണ്ട്. 2024 ജൂലൈ 11ന് ആദ്യ കപ്പലിനെ സ്വീകരിച്ച തുറമുഖം പിന്നീട് വാണിജ്യ പ്രവർത്തനങ്ങൾ ആരംഭിക്കുകയും തുടക്കം മുതൽ മികച്ച പ്രതികരണം നേടുകയും ചെയ്തു.

2025 ഓഗസ്റ്റിൽ പത്ത് ലക്ഷം ടി ഇ യു കണ്ടെയ്നർ കൈകാര്യം ചെയ്ത നേട്ടവും വിഴിഞ്ഞം സ്വന്തമാക്കിയിരുന്നു. ലോകോത്തര നിലവാരത്തിലുള്ള അടിസ്ഥാന സൗകര്യങ്ങളും പ്രവർത്തന കാര്യക്ഷമതയും ആഗോള ഷിപ്പിങ് കമ്പനികളുടെ വിശ്വാസവും തുറമുഖത്തിന്റെ വളർച്ചയ്ക്ക് കരുത്താകുന്നതായി അധികൃതർ പറയുന്നു. ഏകദേശം 16,000 കോടി രൂപയുടെ നിക്ഷേപത്തോടെ രണ്ടാംഘട്ട വികസന പ്രവർത്തനങ്ങൾ പുരോഗമിക്കുകയാണ്. 2028ഓടെ ഇത് പൂർത്തിയാകുന്നതോടെ കണ്ടെയ്നർ കൈകാര്യം ചെയ്യാനുള്ള ശേഷി ഗണ്യമായി വർധിക്കുകയും സമ്പൂർണ കയറ്റുമതി-ഇറക്കുമതി പ്രവർത്തനങ്ങൾക്ക് കൂടുതൽ സൗകര്യമൊരുങ്ങുകയും ചെയ്യും.