വിനോദസഞ്ചാര-ആതിഥേയ മേഖലയിൽ വ്യാപാര സൗകര്യം വർധിപ്പിക്കുന്നതിനായി കേന്ദ്ര വിനോദസഞ്ചാര മന്ത്രാലയം ന്യൂഡൽഹിയിൽ ഉന്നതതല കൂടിയാലോചന സംഘടിപ്പിച്ചു. കേന്ദ്ര വിനോദസഞ്ചാര-സാംസ്കാരിക മന്ത്രി ഗജേന്ദ്ര സിങ് ശെഖാവത്തിന്റെ അധ്യക്ഷതയിൽ നടന്ന യോഗത്തിൽ വിവിധ വ്യവസായ സംഘടനകളുടെ പ്രതിനിധികൾ പങ്കെടുത്തു. ഇന്ത്യയുടെ വിനോദസഞ്ചാര മേഖലയിലെ വളർച്ചാ സാധ്യതകൾ കൂടുതൽ പ്രയോജനപ്പെടുത്താൻ ആവശ്യമായ പരിഷ്കാരങ്ങളാണ് ചർച്ചയായത്.

രാജ്യത്തെ വിനോദസഞ്ചാര-ആതിഥേയ മേഖലയെ കൂടുതൽ മത്സരക്ഷമവും നിക്ഷേപ സൗഹൃദവുമാക്കുക എന്ന ലക്ഷ്യത്തോടെയാണ് ചർച്ചകൾ നടന്നത്. ഹോട്ടൽ വിഭാഗീകരണ സംവിധാനത്തിൽ പരിശോധനാ അടിസ്ഥാനത്തിലുള്ള രീതിക്ക് പകരം സ്വയം പ്രഖ്യാപന രീതി കൊണ്ടുവരണമെന്ന നിർദേശവും മുന്നോട്ടുവന്നു. വിസ നടപടിക്രമങ്ങൾ, നികുതി സംവിധാനം, ലൈസൻസ് അനുവദിക്കുന്നതിനുള്ള സമയപരിധി, നിക്ഷേപങ്ങൾക്ക് അനുമതി ലഭ്യമാക്കൽ, ഡിജിറ്റൽ ഭരണസംവിധാനങ്ങൾ എന്നിവയും യോഗത്തിൽ ചർച്ചയായി. രേഖകൾ കൈമാറാനും പരിശോധിക്കാനും സഹായിക്കുന്ന പ്രത്യേക ഡിജിറ്റൽ സംവിധാനത്തെക്കുറിച്ചും അഭിപ്രായങ്ങൾ ഉയർന്നു.

വിനോദസഞ്ചാര മേഖലയിൽ തുടർച്ചയായ പരിഷ്കാരങ്ങൾ നടപ്പാക്കി ഇന്ത്യയെ ആഗോളതലത്തിൽ കൂടുതൽ ശക്തമായ കേന്ദ്രമാക്കാനുള്ള പ്രതിബദ്ധത സർക്കാർ ആവർത്തിച്ചു. ഹോട്ടലുകൾ, താമസസൗകര്യങ്ങൾ, വിനോദസഞ്ചാര സേവനദാതാക്കൾ എന്നിവയുടെ വിവരശേഖരം ഒരുക്കണമെന്നും പങ്കാളികൾ നിർദേശിച്ചു. തത്സമയ പരിപാടികൾ, അനുഭവാധിഷ്ഠിത വിനോദസഞ്ചാരം, വിനോദപാർക്കുകൾ, വീടുകളിലെ താമസസൗകര്യങ്ങൾ തുടങ്ങിയ വളർച്ചാ മേഖലകൾക്ക് കൂടുതൽ പിന്തുണ നൽകണമെന്നും അഭിപ്രായമുയർന്നു. സംസ്ഥാന സർക്കാരുകളുമായും വ്യവസായ സംഘടനകളുമായും ചേർന്ന് കൂടുതൽ പരിഷ്കാരങ്ങൾ മുന്നോട്ട് കൊണ്ടുപോകുമെന്ന് മന്ത്രാലയം അറിയിച്ചു.