ന്യൂഡൽഹി, 2026 ജൂൺ 20
നാഷണൽ ഇന്റർനെറ്റ് എക്സ്ചേഞ്ച് ഓഫ് ഇന്ത്യയുടെ ഇരുപത്തിമൂന്നാം സ്ഥാപകദിനം ആഘോഷിച്ചു. നയരൂപകർ, വ്യവസായ രംഗത്തെ പ്രമുഖർ, ഇന്റർനെറ്റ് സമൂഹാംഗങ്ങൾ, അക്കാദമിക് വിദഗ്ധർ, സാങ്കേതിക വിദഗ്ധർ എന്നിവർ ചടങ്ങിൽ പങ്കെടുത്തു. ഇന്ത്യയുടെ ഡിജിറ്റൽ വളർച്ചയും ഇന്റർനെറ്റ് അധിഷ്ഠിത വികസനത്തിന്റെ ഭാവിയും ചർച്ച ചെയ്യാനായിരുന്നു പരിപാടി. ചടങ്ങിന്റെ പ്രധാന ആകർഷണമായി നാല് പുതിയ ഡിജിറ്റൽ സംരംഭങ്ങളും അവതരിപ്പിച്ചു.
ഇലക്ട്രോണിക്സ്, വിവരസാങ്കേതിക മന്ത്രാലയ സെക്രട്ടറിയും നിക്സി ചെയർമാനുമായ എസ്. കൃഷ്ണനാണ് പുതിയ സംരംഭങ്ങൾ ഉദ്ഘാടനം ചെയ്തത്. ഐഎക്സ് പോർട്ടൽ, മൈഐറിൻ പോർട്ടൽ, ഡോട്ട് ഇൻ ലേല പോർട്ടൽ, കൃത്രിമ ബുദ്ധിശേഷി ഉപയോഗിച്ചുള്ള ഹൂഇസ് പരിശോധനാ വേദി എന്നിവയാണ് അവതരിപ്പിച്ചത്. ഉപയോക്തൃ അനുഭവം മെച്ചപ്പെടുത്താനും പ്രവർത്തനക്ഷമത വർധിപ്പിക്കാനും കൂടുതൽ സുതാര്യത ഉറപ്പാക്കാനും പരിശോധനാ സംവിധാനങ്ങൾ ശക്തിപ്പെടുത്താനുമാണ് ഇവ ലക്ഷ്യമിടുന്നത്. പുതിയ ഹൂഇസ് പരിശോധനാ വേദി സംശയാസ്പദമായ വെബ്സൈറ്റുകൾ കണ്ടെത്താനും ഡൊമെയ്ൻ സുരക്ഷ വർധിപ്പിക്കാനും സഹായിക്കുമെന്ന് അധികൃതർ അറിയിച്ചു. ചടങ്ങിൽ ഇന്റർനെറ്റ് മേഖലയുടെ വളർച്ചയ്ക്ക് സംഭാവന നൽകിയ സ്ഥാപനങ്ങളെയും ആദരിച്ചു.
ഇന്റർനെറ്റ് സംവിധാനത്തിൽ വിശ്വാസവും സുരക്ഷയും കൂടുതൽ പ്രധാനമാകുകയാണെന്ന് ചടങ്ങിൽ സംസാരിച്ചവർ പറഞ്ഞു. കഴിഞ്ഞ ഇരുപത്തിമൂന്ന് വർഷത്തിനിടെ നിക്സി ഇന്ത്യയുടെ ഇന്റർനെറ്റ് അടിസ്ഥാനസൗകര്യ വികസനത്തിൽ നിർണായക പങ്കുവഹിച്ചിട്ടുണ്ട്. നിലവിൽ മുപ്പത്തിയൊൻപത് ലക്ഷത്തിലധികം ഡൊമെയ്ൻ നാമങ്ങൾ നിക്സി കൈകാര്യം ചെയ്യുന്നു. രാജ്യത്താകെ എഴുപത്തൊൻപത് ഇന്റർനെറ്റ് എക്സ്ചേഞ്ച് കേന്ദ്രങ്ങളും പ്രവർത്തിക്കുന്നുണ്ട്. ഇരുപത്തിരണ്ട് ഇന്ത്യൻ ഭാഷകളിൽ ഡൊമെയ്ൻ രജിസ്ട്രേഷൻ പിന്തുണയും ലഭ്യമാണ്. സുരക്ഷിതവും എല്ലാവരെയും ഉൾക്കൊള്ളുന്നതുമായ ഡിജിറ്റൽ പരിസ്ഥിതി സൃഷ്ടിക്കാനുള്ള പ്രതിബദ്ധത തുടരുമെന്നും നിക്സി അറിയിച്ചു.
