ന്യൂഡൽഹി, 2026 ജൂൺ 19
ടെലികമ്മ്യൂണിക്കേഷൻ വകുപ്പ് കീഴിലെ സാങ്കേതിക വിഭാഗമായ ടെലികമ്മ്യൂണിക്കേഷൻ എൻജിനീയറിങ് സെന്റർ ന്യൂഡൽഹിയിലെ ആസ്ഥാനത്ത് ഉന്നത ഉപഗ്രഹ ആശയവിനിമയ സാങ്കേതികവിദ്യകളും സേവന നിലവാര മാനദണ്ഡങ്ങളും സംബന്ധിച്ച ശിൽപശാല സംഘടിപ്പിച്ചു. ജൂൺ 18ന് നടന്ന പരിപാടിയിൽ ഉപഗ്രഹ ആശയവിനിമയ മേഖലയിലെ പുതിയ പ്രവണതകൾ, ഉപഗ്രഹ പിന്തുണയുള്ള അഞ്ചാം തലമുറയും ആറാം തലമുറയും ഉൾപ്പെട്ട ശൃംഖലകൾ, സ്പെക്ട്രം ഉപയോഗം തുടങ്ങിയ വിഷയങ്ങൾ ചർച്ചയായി.
ഇന്ത്യൻ ദേശീയ ബഹിരാകാശ പ്രോത്സാഹന-അനുമതി കേന്ദ്രം, യൂറോപ്യൻ ബഹിരാകാശ ഏജൻസി, ഡൽഹി സാങ്കേതിക വിദ്യാഭ്യാസ സ്ഥാപനം, വിവിധ ഉപഗ്രഹ സേവന സ്ഥാപനങ്ങൾ എന്നിവയുടെ പ്രതിനിധികൾ പങ്കെടുത്തു. സർക്കാർ സ്ഥാപനങ്ങൾ, നിയന്ത്രണ ഏജൻസികൾ, അക്കാദമിക് മേഖല, അന്താരാഷ്ട്ര സംഘടനകൾ, ഉപഗ്രഹ മേഖലയിലെ വിവിധ പങ്കാളികൾ എന്നിവരെ ഒരുമിച്ചുകൂട്ടുക എന്ന ലക്ഷ്യത്തോടെയായിരുന്നു പരിപാടി. ഉപഗ്രഹവും ഭൗമാധിഷ്ഠിതവുമായ ശൃംഖലകളുടെ ഏകീകരണം, സ്പെക്ട്രം പങ്കിടൽ മാതൃകകൾ, സേവന നിലവാര സമീപനങ്ങൾ, ഉപഗ്രഹ അധിഷ്ഠിത ബന്ധസൗകര്യങ്ങളുടെ സാധ്യതകളും വെല്ലുവിളികളും ചർച്ചയായി.
സാങ്കേതിക പുരോഗതിക്കൊപ്പമെത്താനും അന്താരാഷ്ട്ര നിലവാരങ്ങൾ പിന്തുടരാനും ഇത്തരം സംവാദങ്ങൾ അനിവാര്യമാണെന്ന് ടെലികമ്മ്യൂണിക്കേഷൻ എൻജിനീയറിങ് സെന്റർ വ്യക്തമാക്കി. ശിൽപശാലയിൽ നിന്നുള്ള നിർദേശങ്ങളും കണ്ടെത്തലുകളും രാജ്യത്തിന്റെ ഡിജിറ്റൽ ആശയവിനിമയ സംവിധാനത്തിന്റെ വികസനത്തിനും ഭാവിയിലെ സേവന നിലവാര മാനദണ്ഡങ്ങൾ രൂപപ്പെടുത്തുന്നതിനും ശക്തമായ ഉപഗ്രഹ ആശയവിനിമയ പരിസ്ഥിതി സൃഷ്ടിക്കുന്നതിനും സഹായകരമാകുമെന്നാണ് വിലയിരുത്തൽ.
