തിരുവനന്തപുരം മെട്രോ ഡിപിആർ തയ്യാറായി; 31 കിലോമീറ്റർ പാതയ്ക്ക് 8000 കോടി രൂപ ചെലവ് പ്രതീക്ഷ

തിരുവനന്തപുരം, 2026 ജൂൺ 17 –

തിരുവനന്തപുരം മെട്രോ റെയിൽ പദ്ധതിയുടെ വിശദമായ പദ്ധതി റിപ്പോർട്ട് തയ്യാറായി. പുതുക്കിയ അലൈൻമെന്റിൽ 31 കിലോമീറ്റർ ദൂരമാണ് മെട്രോ പാതയ്ക്ക് നിശ്ചയിച്ചിരിക്കുന്നത്. പാപ്പനംകോട് മുതൽ ഈഞ്ചക്കൽ വരെയാണ് മെട്രോ സർവീസ് നിർദേശിച്ചിരിക്കുന്നത്. ആകെ 27 സ്റ്റേഷനുകളാണ് പദ്ധതിയിലുള്ളത്. ഇതിൽ മൂന്ന് സ്റ്റേഷനുകൾ ഇന്റർചേഞ്ച് സ്റ്റേഷനുകളായിരിക്കും. പദ്ധതിക്കായി ഏകദേശം 8000 കോടി രൂപ ചെലവ് പ്രതീക്ഷിക്കുന്നുണ്ട്.

ഡൽഹി മെട്രോ റെയിൽ കോർപ്പറേഷൻ തയ്യാറാക്കിയ പദ്ധതി റിപ്പോർട്ട് കൊച്ചി മെട്രോ റെയിൽ ലിമിറ്റഡിന് ഇന്നോ നാളെയോ കൈമാറും. തുടർന്ന് കെഎംആർഎൽ രണ്ടാഴ്ചയ്ക്കുള്ളിൽ റിപ്പോർട്ട് സംസ്ഥാന സർക്കാരിന് സമർപ്പിക്കും. മന്ത്രിസഭ അംഗീകാരം നൽകിയാൽ കേന്ദ്ര സർക്കാരിന് അയച്ച് അനുമതി തേടും. കേന്ദ്രത്തിന്റെയും സംസ്ഥാനത്തിന്റെയും സാമ്പത്തിക പങ്കാളിത്തം അന്തിമ അനുമതിക്ക് ശേഷമാകും വ്യക്തമാകുക.

ആദ്യഘട്ട അലൈൻമെന്റിൽ നിർദേശിച്ചിരുന്ന കേശവദാസപുരം വഴിയുള്ള പട്ടം-ഉള്ളൂർ റൂട്ടിൽ മാറ്റം വരുത്തിയിട്ടുണ്ട്. പുതിയ റിപ്പോർട്ട് പ്രകാരം പട്ടത്ത് നിന്ന് മെഡിക്കൽ കോളേജ് വഴിയാണ് മെട്രോ ഉള്ളൂരിലേക്ക് കടക്കുക. പാപ്പനംകോട്, കൈമനം, കരമന, തമ്പാനൂർ, സെക്രട്ടേറിയറ്റ്, പാളയം, പ്ലാമൂട്, പട്ടം, മുറിഞ്ഞപാലം, മെഡിക്കൽ കോളേജ്, ഉള്ളൂർ, പൊങ്ങുമൂട്, ശ്രീകാര്യം, പങ്ങപ്പാറ, ഗുരുമന്ദിരം, കാര്യവട്ടം, ടെക്നോപാർക്ക് ഫേസ് 1, ടെക്നോപാർക്ക് ഫേസ് 3, കുളത്തൂർ, ടെക്നോപാർക്ക് ഫേസ് 2, ആക്കുളം കായൽ, കൊച്ചുവേളി, വെൺപാലവട്ടം, ചാക്ക, എയർപോർട്ട്, ഈഞ്ചക്കൽ, കഴക്കൂട്ടം, കാര്യവട്ടം എന്നിവയാണ് റിപ്പോർട്ടിൽ ഉൾപ്പെടുത്തിയിരിക്കുന്ന സ്റ്റേഷനുകൾ.