രാജ്യത്തെ ശാസ്ത്ര, സാങ്കേതിക, നവീകരണ മേഖലകൾ കഴിഞ്ഞ പന്ത്രണ്ട് വർഷത്തിനിടെ വലിയ മാറ്റം കൈവരിച്ചതായി കേന്ദ്രമന്ത്രി ജിതേന്ദ്ര സിങ് പറഞ്ഞു. ന്യൂഡൽഹിയിലെ ശാസ്ത്ര-വ്യവസായ ഗവേഷണ കൗൺസിൽ ആസ്ഥാനത്ത് നടന്ന വാർത്താസമ്മേളനത്തിലാണ് അദ്ദേഹം ഇക്കാര്യം വ്യക്തമാക്കിയത്. രണ്ടായിരത്തി പതിനാലിൽ ഏകദേശം പത്ത് ബില്യൺ ഡോളറായിരുന്ന ജൈവസമ്പദ് വ്യവസ്ഥ ഇന്ന് നൂറ്റി തൊണ്ണൂറ് ബില്യൺ ഡോളറിലേറെയായി വളർന്നുവെന്നും അദ്ദേഹം പറഞ്ഞു. ബഹിരാകാശ മേഖലയിൽ നിരവധി പുതിയ സംരംഭങ്ങൾ രൂപപ്പെട്ടതായും കാലാവസ്ഥാ പ്രവചന രംഗത്ത് വലിയ പുരോഗതി ഉണ്ടായതായും അദ്ദേഹം വ്യക്തമാക്കി.

ശാസ്ത്ര സാങ്കേതിക രംഗത്തെ നേട്ടങ്ങൾ ഇന്ന് സാധാരണ ജനങ്ങളുടെ ജീവിതവുമായി നേരിട്ട് ബന്ധപ്പെടുന്നുണ്ടെന്ന് ജിതേന്ദ്ര സിങ് പറഞ്ഞു. ആരോഗ്യരംഗം, കൃഷി, ബഹിരാകാശം, കാലാവസ്ഥാ ശാസ്ത്രം, അടിസ്ഥാനസൗകര്യ വികസനം, ഊർജ മേഖല തുടങ്ങിയവയിൽ സ്വദേശീയ സാങ്കേതികവിദ്യകൾ വ്യാപകമായി ഉപയോഗിക്കപ്പെടുന്നുവെന്നാണ് അദ്ദേഹത്തിന്റെ വിശദീകരണം. രണ്ടായിരത്തി പതിനാലിൽ പതിനേഴ് കാലാവസ്ഥാ റഡാറുകൾ മാത്രമുണ്ടായിരുന്ന രാജ്യത്ത് ഇപ്പോൾ ഏകദേശം അമ്പത് റഡാറുകൾ പ്രവർത്തിക്കുന്നുണ്ടെന്നും മറ്റൊരു അമ്പത് റഡാറുകൾ കൂടി പദ്ധതിയിലുണ്ടെന്നും അദ്ദേഹം പറഞ്ഞു. കാലാവസ്ഥാ പ്രവചന സേവനങ്ങൾ മുന്നൂറോളം നഗരങ്ങളിൽ നിന്ന് ആയിരത്തി എഴുന്നൂറോളം കേന്ദ്രങ്ങളിലേക്ക് വ്യാപിച്ചതായും അദ്ദേഹം കൂട്ടിച്ചേർത്തു.

ചന്ദ്രയാൻ മൂന്ന് ദൗത്യത്തിന്റെ വിജയം രാജ്യത്തിന്റെ ശാസ്ത്രശേഷി ലോകത്തിന് മുന്നിൽ തെളിയിച്ചുവെന്ന് മന്ത്രി പറഞ്ഞു. ചന്ദ്രന്റെ ദക്ഷിണധ്രുവത്തിന് സമീപം വിജയകരമായി ഇറങ്ങുന്ന ആദ്യ രാജ്യമായി ഇന്ത്യ മാറിയതും അദ്ദേഹം ഓർമിപ്പിച്ചു. രണ്ടായിരത്തി മുപ്പത്തിയഞ്ചോടെ ഭാരതീയ ബഹിരാകാശ നിലയം സ്ഥാപിക്കാനും രണ്ടായിരത്തി നാൽപ്പതോടെ ഇന്ത്യക്കാരെ ചന്ദ്രനിലിറക്കാനുമുള്ള ലക്ഷ്യവുമായി രാജ്യം മുന്നോട്ടുപോകുകയാണെന്നും അദ്ദേഹം അറിയിച്ചു. ആണവോർജ മേഖലയിലെ സ്വകാര്യ പങ്കാളിത്തം നിക്ഷേപവും നവീകരണവും വർധിപ്പിക്കുമെന്ന പ്രതീക്ഷയും അദ്ദേഹം പങ്കുവച്ചു.