കൊച്ചി, 2026 ജൂൺ 14 –
പട്ടിമറ്റം ചെങ്ങരയിലെ റബർ തോട്ടത്തിൽ മരിച്ച നിലയിൽ കണ്ടെത്തിയ നോർത്ത് വലമ്പൂർ ആക്കാംപാറ തെക്കേക്കര സ്വദേശി ജിജോ (ജോൺ, 53)യുടെ തലയ്ക്ക് ഗുരുതര പരിക്ക് ഉണ്ടായിരുന്നുവെന്ന് പോസ്റ്റ്മോർട്ടം റിപ്പോർട്ട്. തലച്ചോറിൽ അമിത രക്തസ്രാവം ഉണ്ടായിരുന്നതായും എറണാകുളം സർക്കാർ മെഡിക്കൽ കോളേജിൽ നടത്തിയ ഫൊറൻസിക് പരിശോധനയിൽ കണ്ടെത്തി. സംഭവത്തിൽ ദുരൂഹതയുണ്ടെന്ന സംശയത്തെ തുടർന്ന് കുന്നത്ത്നാട് പോലീസ് അന്വേഷണം ആരംഭിച്ചു.
വ്യാഴാഴ്ച രാത്രി സുഹൃത്തുക്കളായ രണ്ട് പേർക്കൊപ്പം റബർ തോട്ടത്തിൽ മദ്യപിക്കാനെത്തിയ ജിജോയെ വെള്ളിയാഴ്ച രാവിലെ 8.30ഓടെയാണ് മരിച്ച നിലയിൽ കണ്ടെത്തിയത്. മദ്യപിച്ച് അബോധാവസ്ഥയിലായ ജിജോയെ തോട്ടത്തിന് സമീപത്തെ ടാർപോളിൻ കെട്ടിയ സ്ഥലത്ത് കിടത്തിയശേഷം വീട്ടിലേക്ക് മടങ്ങിയെന്നാണ് സുഹൃത്തുക്കൾ പോലീസിനോട് പറഞ്ഞത്. തോട്ടത്തിലേക്ക് പോകുന്നതിനിടെ ജിജോയുടെ ബൈക്ക് മറിഞ്ഞിരുന്നുവെന്നും ഇവരിൽ ഒരാൾ മൊഴി നൽകിയിട്ടുണ്ട്.
എന്നാൽ സമീപ പ്രദേശങ്ങളിലെ സി.സി.ടി.വി ദൃശ്യങ്ങൾ പരിശോധിച്ചപ്പോൾ മൂവരും ഒരുമിച്ചല്ല തോട്ടത്തിലേക്ക് എത്തിയതെന്ന് വ്യക്തമായി. ഇതോടെ ജിജോയുടെ തലയ്ക്കേറ്റ പരിക്ക് എങ്ങനെ സംഭവിച്ചുവെന്നതിലാണ് അന്വേഷണം കേന്ദ്രീകരിച്ചിരിക്കുന്നത്. രാത്രി ജിജോ വീട്ടിലെത്താതിരുന്നതിനെ തുടർന്ന് ഭാര്യ സുഹൃത്തുക്കളെ ബന്ധപ്പെട്ടെങ്കിലും വ്യക്തമായ മറുപടി ലഭിച്ചിരുന്നില്ല. തുടർന്ന് നടത്തിയ പരിശോധനയിലാണ് മൃതദേഹം കണ്ടെത്തിയത്. ജിജോയ്ക്കൊപ്പം ഉണ്ടായിരുന്നവരെ വിശദമായി ചോദ്യം ചെയ്തുവരികയാണെന്ന് പോലീസ് അറിയിച്ചു.
