അതേ മണ്ണിൽ തന്നെ വീടുകൾ; മലയിടംതുരുത്ത് കുടിയിറക്കൽ സമരം അവസാനിച്ചു

കൊച്ചി, ജൂൺ 14: എറണാകുളം മലയിടംതുരുത്തിലെ ദളിത് കുടുംബങ്ങളുടെ കുടിയിറക്കൽ ഭീഷണിയെ ചൊല്ലി നീണ്ടുനിന്ന തർക്കങ്ങൾക്കും പ്രതിഷേധങ്ങൾക്കും ഒടുവിൽ പരിഹാരമായി. മന്ത്രി റോജി എം ജോൺയുടെ നേതൃത്വത്തിൽ സർക്കാർ, ജനപ്രതിനിധികൾ, സമരസമിതി പ്രതിനിധികൾ എന്നിവർ പങ്കെടുത്ത ചർച്ചയിൽ സമവായ ധാരണയിലെത്തിയതോടെയാണ് സമരം ഔദ്യോഗികമായി അവസാനിപ്പിച്ചത്.

ദളിത് കുടുംബങ്ങൾക്ക് അവർ ഇപ്പോൾ താമസിക്കുന്ന പ്രദേശത്ത് തന്നെ തുടരാൻ അവസരമൊരുക്കണമെന്ന ആവശ്യമാണ് ചർച്ചയിലൂടെ അംഗീകരിക്കപ്പെട്ടത്. തർക്കങ്ങൾ പരിഹരിച്ച് മുന്നോട്ടുപോകാൻ ധാരണയായതായി ചർച്ചയ്ക്കുശേഷം മന്ത്രി അറിയിച്ചു.

പുതിയ കരാർ പ്രകാരം മലയിടംതുരുത്തിൽ തർക്കവിഷയമായിരുന്ന ശങ്കരൻ നായരുടെ ഉടമസ്ഥതയിലുള്ള ഭൂമിയിൽ നിന്ന് ഓരോ കുടുംബത്തിനും അഞ്ച് സെന്റ് വീതം സ്ഥലം അനുവദിക്കും. ഈ ഭൂമിയിൽ സർക്കാർ മുൻകൈയെടുത്ത് പുതിയ വീടുകൾ നിർമിച്ച് നൽകും. ഒരു വർഷത്തിനകം വീടുകളുടെ നിർമ്മാണം പൂർത്തിയാക്കുകയാണ് ലക്ഷ്യം.

അതുവരെ കുടുംബങ്ങൾക്ക് നിലവിലുള്ള വീടുകളിൽ സുരക്ഷിതമായി താമസിക്കാം. പുതിയ വീടുകൾ പൂർത്തിയായ ശേഷം അവിടേക്ക് മാറും. ധാരണയിലെ വ്യവസ്ഥകൾ ഔദ്യോഗിക കരാറാക്കി മാറ്റാനും തുടർനടപടികൾ കേരള ഹൈക്കോടതിയെ അറിയിക്കാനും തീരുമാനിച്ചു.

കുടിയൊഴിപ്പിക്കലുമായി ബന്ധപ്പെട്ട സമരങ്ങളുടെ ഭാഗമായി രജിസ്റ്റർ ചെയ്ത കേസുകൾ പിൻവലിക്കാനും ധാരണയായി. രണ്ടു ദിവസത്തിനകം ഇരുവിഭാഗങ്ങളും കരാറിൽ ഒപ്പുവെക്കും. തുടർന്ന് അഡ്വക്കേറ്റ് ജനറൽ മുഖേന ജൂൺ 16-ന് ഹൈക്കോടതിയിൽ കരാർ സമർപ്പിക്കും.

വീടുനിർമാണം പൂർത്തിയാകുന്നതുവരെയുള്ള നടപടികൾ ഏകോപിപ്പിക്കുന്നതിനായി മൂവാറ്റുപുഴ ആർ.ഡി.ഒയും ഡി.വൈ.എസ്.പിയും ചുമതലപ്പെടുത്തുമെന്ന് മന്ത്രി അറിയിച്ചു.

അതേ മണ്ണിൽ തന്നെ ജീവിക്കണമെന്ന തങ്ങളുടെ പ്രധാന ആവശ്യം സർക്കാർ അംഗീകരിച്ചതിനാൽ ചർച്ചയിലെ തീരുമാനങ്ങൾ പൂർണമായി സ്വാഗതം ചെയ്ത് സമരം അവസാനിപ്പിക്കുന്നതായി സമരസമിതി ഭാരവാഹികളും അറിയിച്ചു. പ്രതിഷേധങ്ങളുമായി ബന്ധപ്പെട്ട് സമരക്കാരെതിരെ എടുത്ത പോലീസ് കേസുകളും പിൻവലിക്കാൻ ധാരണയായിട്ടുണ്ട്.

ജില്ലാ കളക്ടറുടെ ചേംബറിൽ നടന്ന യോഗത്തിൽ വി.പി. സജീന്ദ്രൻ, ജില്ലാ കളക്ടർ ജി. പ്രിയങ്ക, എറണാകുളം റൂറൽ എസ്.പി. സുന്ദർശൻ, അഡീഷനൽ ജില്ലാ മജിസ്ട്രേറ്റ് കെ. മനോജ്, വിവിധ ജനപ്രതിനിധികൾ, സമരസമിതി അംഗങ്ങൾ, ഉദ്യോഗസ്ഥർ എന്നിവർ പങ്കെടുത്തു.