കോട്ടയം, 2026 ജൂൺ 10 –
പാലാ നഗരസഭയിലെ യുഡിഎഫിനുള്ളിലെ തർക്കം കൂടുതൽ രൂക്ഷമായി. കോൺഗ്രസ് കൗൺസിലറുടെ പരാതിയെ തുടർന്ന് ചെയർപേഴ്സൺ ദിയ പുളിക്കകണ്ടത്തിന്റെ ഭർത്താവ് ബിനു പുളിക്കകണ്ടത്തിനെതിരെ പൊലീസ് കേസെടുത്തു. ഇതിന് പിന്നാലെ ചെയർപേഴ്സൺ ദിയ പുളിക്കകണ്ടം കൗൺസിലർ ബിജു തോമസിനെതിരെ പരാതിയുമായി രംഗത്തെത്തി.
തന്റെ ചേംബറിൽ സൂക്ഷിച്ചിരുന്ന വിലപിടിപ്പുള്ള വാച്ചും പ്രധാനപ്പെട്ട ഫയലും നഷ്ടമായെന്നാണ് ദിയ പുളിക്കകണ്ടത്തിന്റെ പരാതി. ബിനു പുളിക്കകണ്ടത്തിനെതിരെ പരാതി നൽകിയ കൗൺസിലർ ബിജു തോമസ് ചേംബറിൽ വന്നുപോയതിന് ശേഷമാണ് സാധനങ്ങൾ കാണാതായതെന്ന് പരാതിയിൽ പറയുന്നു. കഴിഞ്ഞ ദിവസം കേസുമായി ബന്ധപ്പെട്ട മഹസർ തയ്യാറാക്കുന്നതിനായി ബിജു തോമസും പൊലീസ് ഉദ്യോഗസ്ഥരും ചെയർപേഴ്സൺ ഇല്ലാത്ത സമയത്ത് ചേംബറിൽ എത്തിയിരുന്നുവെന്നും ദിയ ചൂണ്ടിക്കാട്ടുന്നു.
അതേസമയം, ബിജു തോമസിന്റെ പരാതിയിലാണ് ബിനു പുളിക്കകണ്ടത്തിനും അദ്ദേഹത്തിന്റെ സഹോദരനും എതിരെ പൊലീസ് എഫ്ഐആർ രജിസ്റ്റർ ചെയ്തത്. കയ്യേറ്റം, അസഭ്യം പറയൽ തുടങ്ങിയ വകുപ്പുകൾ ഉൾപ്പെടുത്തിയാണ് കേസ് എടുത്തിരിക്കുന്നത്. ഇതോടെ പാലാ നഗരസഭയിലെ യുഡിഎഫ് നേതൃത്വത്തിനുള്ളിലെ തർക്കം പുതിയ തലത്തിലേക്ക് കടന്നിരിക്കുകയാണ്.
