കൊട്ടിയൂർ, 2026 ജൂൺ 7 –
വൈശാഖ മഹോത്സവത്തിലെ പ്രധാന ചടങ്ങുകളിലൊന്നായ ഇളനീരാട്ടവും രണ്ടാം ആരാധനയായ അഷ്ടമി ആരാധനയും നാളെ കൊട്ടിയൂരിൽ നടക്കും. വിവിധ മഠങ്ങളിൽ നിന്നുള്ള ഇളനീർ വ്രതക്കാരായ തണ്ടയാൻമാർ ഇന്നലെ മുതൽ കൊട്ടിയൂരിലെത്തിത്തുടങ്ങി. ഇളനീർക്കാവുകളുമായി എത്തുന്ന വ്രതക്കാർ ക്ഷേത്രത്തിന്റെ കിഴക്കേനടയിൽ ബാവലിപ്പുഴക്കരയിൽ ഇളനീർ വയ്പ്പിനുള്ള മുഹൂർത്തത്തിനായി കാത്തിരിക്കും.
വേട്ടയ്ക്കൊരു മകൻ ക്ഷേത്രത്തിൽ നിന്ന് എരുവട്ടി തണ്ടയാൻ എള്ളെണ്ണയും ഇളനീരുമായെത്തിയ ശേഷം രാത്രിയിലെ പൂജയും ശ്രീഭൂതബലിയും കഴിഞ്ഞാണ് ചടങ്ങുകൾ ആരംഭിക്കുക. കാര്യത്ത് കൈക്കോളൻ തിരുവഞ്ചിറയിലെ കിഴക്കേനടയിൽ തട്ടും പോളയും വിരിക്കും. തുടർന്ന് വീരഭദ്രവേഷത്തിൽ അഞ്ഞൂറ്റാൻ എഴുന്നള്ളുകയും വിവിധ ആചാരങ്ങൾ നടക്കുകയും ചെയ്യും. രാശി വിളിക്കുന്നതോടെ വ്രതക്കാർ ബാവലിപ്പുഴയിൽ മുങ്ങിയെണീറ്റ് സന്നിധാനത്തിലേക്ക് ഓടിയെത്തി ഇളനീർക്കാവുകൾ സമർപ്പിക്കും. തുടർന്ന് വീരഭദ്രനെ വണങ്ങി ഭണ്ഡാരം പെറുക്കി മടങ്ങും. ഇളനീർ അഭിഷേകത്തിനായി ഉപയോഗിക്കുന്ന കത്തികളും തണ്ടയാൻമാർ സമർപ്പിക്കും.
അതേസമയം, വൈശാഖ മഹോത്സവത്തിന് ഇന്നലെ കൊട്ടിയൂരിൽ റെക്കോർഡ് ഭക്തജന പ്രവാഹമാണ് അനുഭവപ്പെട്ടത്. പ്രാഥമിക കണക്ക് പ്രകാരം രണ്ടരലക്ഷത്തിലധികം ഭക്തർ എത്തിയതായി വിലയിരുത്തുന്നു. പുലർച്ചെ മുതൽ തന്നെ അക്കരെ കൊട്ടിയൂരും ഇക്കരെ കൊട്ടിയൂർ പരിസരങ്ങളും ഭക്തജനങ്ങളെ കൊണ്ട് നിറഞ്ഞു. ദർശനത്തിനായി മണിക്കൂറുകളോളം കാത്തുനിന്ന ശേഷമാണ് ഭക്തർ മടങ്ങിയത്. വലിയ തിരക്കിനെ തുടർന്ന് ഗതാഗതക്കുരുക്കും അനുഭവപ്പെട്ടു. ദേവസ്വം വിപുലമായ പാർക്കിംഗ് സൗകര്യങ്ങൾ ഒരുക്കിയിരുന്നെങ്കിലും വാഹനങ്ങളുടെ എണ്ണം വർധിച്ചതോടെ എല്ലാ പാർക്കിംഗ് കേന്ദ്രങ്ങളും നിറഞ്ഞു.
