ഇൻഡോർ: ഏതാനും രോഗികളുടെ കുടലിലും പാൻക്രിയാസിലും ബ്ലാക്ക് ഫംഗസിന്റെ സാന്നിധ്യം കണ്ടെത്തിയതായി മധ്യപ്രദേശിലെ ഇൻഡോറിലെ ഒരു വിഭാഗം ഡോക്ടർമാർ. ശ്വാസകോശത്തെയും തലച്ചോറിനെയും ഈ ഫംഗസ് ബാധിക്കുന്നതായും ഡോക്ടർമാർ 16/06/21 ബുധനാഴ്ച അവകാശപ്പെട്ടു.
ജൂൺ രണ്ടാംവാരത്തിൽ കോവിഡിൽ നിന്ന് സുഖം പ്രാപിച്ച രണ്ട് പേരുടെ കുടലിലും പാൻക്രിയാസിലും ബ്ലാക്ക് ഫംഗസ് അണുബാധ കണ്ടെത്തിയതായി ഇൻഡോർ ചാരിറ്റബിൾ ആശുപത്രിയിലെ ഗ്യാസ്ട്രോഎൻട്രോളജി വിഭാഗം മേധാവി ഡോ. അജയ് ജെയിൻ പറഞ്ഞു.
“രോഗബാധിതരായവരിൽ 62 വയസ്സുള്ള ഒരു വ്യക്തി കുടൽ പ്രശ്നങ്ങളുടെ പരാതിയുമായി ഞങ്ങളുടെ അടുത്തെത്തി. ഞങ്ങൾ അദ്ദേഹത്തിന് ശസ്ത്രക്രിയ നടത്തിയപ്പോൾ, ചെറുകുടലിന്റെ മൂന്നടി നീളമുള്ള ഭാഗത്ത് ഫംഗസ് ബാധിച്ചതായി ഞങ്ങൾ കണ്ടെത്തി, ഞങ്ങൾ അത് നീക്കം ചെയ്തു. പരിശോധനയിൽ, ഇത് ബ്ലാക്ക് ഫംഗസ് ബാധയാണെന്ന് സ്ഥിരീകരിച്ചു” ഡോക്ടർ ജെയിൻ പറഞ്ഞു.
‘രണ്ടാമത്തെ രോഗിയിൽ ബ്ലാക്ക് ഫംഗസ് പാൻക്രിയാസിനെ ബാധിച്ചതായും കണ്ടെത്തി’ ഡോക്റ്റർ പറഞ്ഞു.
“രണ്ട് രോഗികളുടെ വയറ്റിൽ ബ്ലാക്ക് ഫംഗസ് കണ്ടെത്തി, മറ്റ് എട്ട് കേസുകളിൽ ഇത് ശ്വാസകോശത്തിൽ കണ്ടെത്തി. കോവിഡ് -19 ൽ നിന്ന് സുഖം പ്രാപിച്ച രോഗികളിൽ ഈ പുതിയ പ്രശ്നം റിപ്പോർട്ട് ചെയ്യപ്പെടുന്നു. ” ശ്രീ അരബിന്ദോ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസിലെ (സൈംസ്) പൾമോണോളജിസ്റ്റ് ഡോ. രവി ഡോസി പറഞ്ഞു, ഇൻഡോറിലെ ആശുപത്രികളിൽ ബ്ലാക്ക് ഫംഗസ് ബാധിച്ച അഞ്ഞൂറിലധികം രോഗികൾ ഇപ്പോൾ ചികിത്സയിലാണ്.
